Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на декабрь

Ночные литургии в Свято-Духовском кафедральном соборе в декабре - в ночь с 21 на 22 (с четверга на пятницу) - благодарственная и в ночь с 31 на 1 (с воскресенья на понедельник) - новогодняя

Молитва о мире в Украине

Томос о даровании Украинской Православной Церкви самостоятельности в управлении

Обращение Патриарха к министру юстиции по вопросу независимости УПЦ

Официальные документы Украинской Православной Церкви относительно ситуации в нашей стране

Благотворительная акция «ПОДАРИ ПОДАРОК СИРОТЕ»

 Положение о проведении XI христианского городского фестиваля детского творчества ОСТРОВ РОЖДЕСТВА

Акафист всем преподобным ОТЦЕМ в подвизе просиявшим

 

День памяти:

суббота сырной седмицы

 

 

Тропарь, глас 4

Боже отец наших, творяй присно с нами по Твоей кротости, не остави милость Твою от нас, но молитвами их в мире управи живот наш.

 

Кондак, глас 8

Яко благочестия проповедники и нечестия обуздатели богоносных собор уяснил еси, подсолнечную осиявающия; в мире совершенном тех молитвами, Тебе славящия и величающия сохрани, поющия Ти, Господи: Аллилуиа.

 

Кондак 1

Избранным угодником Христовым, во всем мире в постничестве просиявшим и ныне с ликостоянии Херувимскими окрест огнезрачнаго Престола Пресвятыя Троицы Трисвятую песнь воспевающим, мы, грешнии, дерзаем принести похвальное сие пение. Вы же, отцы преподобнии, милостивно сие смиренное приношение приемше, молитвами вашими испросите нам от Господа духа покаяния и терпения и исправление греховныя жизни, со умилением вам зовущим: Радуйтеся, вси отцы преподобнии, наставницы монахов и собеседницы Ангелов.

 

  Икос 1

Ангельскому житию подражати желая, преблаженне Пахомие, отверглся еси мира и сущих в мире, и пришед ко преподобному Паламону, купно с ним в пощении и бдениих всенощных служа Вседержителю Богу, сподобился еси, яко новый Моисей, прияти  посланная тебе от Бога законоположения жития иноческаго от руки Ангела, явльшагося тебе во образе великаго чина святыя схимы, и от него научен быв о чине молитвенном, времени, мере пощения и всем устроении жития монашескаго, предал еси то во уставех хотящим во иночестве подвизатися; темже и явился еси праотец духовный новаго Израиля. Мы же, по благодати чада твоя, ублажаем тя и сподвижников твоих, с тобою подвизавшихся, благохвалении сими:

Радуйся, богоизбранне Пахомие, возсиявый, яко звезда, на тверди небесе монашескаго жительства.

Радуйся, приявый от руки Ангеловы уставы постничества.

Радуйся, старцу твоему Паламону послуживый со всяким смирением.

Радуйся, с ним во остром тернии молитвы совершавый со многим терпением.

Радуйся, с духовным отцем твоим и по его преселении к Богу любовию духа не разлучивыйся.

Радуйся, в месте безмолвнем един с единым Богом вселивыйся.

Радуйся, повелением Божиим обители многия во спасение душ человеческих соградивый.

Радуйся, и сестру свою по плоти в чине иноческом Христу обручивый.

Радуйся, тую ликоначальницею дев Небесному Жениху уневестившихся быти убедивый.

Радуйся, и о телесных их потребах отеческое попечение показавый.

Радуйся, Освященнаго Феодора яко присное чадо духовное присвоивый.

Радуйся и ты, Феодоре, яко другий Елисей, милоть благодати отчия приявый.

Радуйтеся, вси отцы преподобнии, наставницы монахов и собеседницы Ангелов.

 

Кондак 2

Провидя Всевидец Господь будущая от начала до конца мира быти имущая, освяти страны Египетския Своим пришествием, егда бегаше от руки Иродовы, да и в пустынях Египетских возсияют аки звезды светлыя  лицы постников, бежавших мира, якоже Ирода, прославляющих же приносимаго во Египет во объятиях Девических Пресладкаго Иисуса и поющих Ему: Аллилуиа.

 

Икос 2

Разум божественный возсия в сердце твоем, богомудре Антоние: слышав бо словеса евангельския, восхотел еси последовати Христу, и Того ради презрев мир, юность сестры своея, любовь сродников, и вся имения оставль, во гробище заключился еси, идеже неизреченными борении с духи тьмы боряйся и тело свое умерщвляя, по многих летех особнаго пустынножительства, яко солнце, от затвора возсияв, собрал еси себе повелением Божиим души, последующия житию твоему, и населив пустыню, яко град, первый гражданин пустынный явился еси, приводя лики постников к гражданству Небесному, с нимиже приими от нас пения сия:

Радуйся, богоносне Антоние, пустынников и постников ликоначальниче.

Радуйся, великий Илларионе, того друже и сотаинниче.

Радуйся, великий Макарие, дивнаго Антония собеседниче.

Радуйся, другий Макарие, пределов Александрийских ангелоподобный всельниче.

Радуйся, Павле, препростый нравом, премудрый же духом подвижниче.

Радуйся, Аммоне, Нитрийския пустыни славо, девством осиянная.

Радуйся, со славным Патермуфием, светлый в подвизех Пиннуфрие.

Радуйся, безмолвнолюбивый Арсение, земная богатства и славу презревый.

Радуйся, Моисее, от греховныя работы мысленнаго фараона избежавый.

Радуйся, чудный Виссарионе, яко птица без пристанища на земли поживый.

Радуйся, со Анувием и Амонафа, цвети пустыннии.

Радуйся, Евфимие, неплодныя прозябение, Христу же плод сторичный добродетелей принесший.

Радуйтеся, вси отцы преподобнии, наставницы монахов и собеседницы Ангелов.

 

Кондак 3

Сила Вышняго укрепляше тя, трудолюбиве Антоние, егда известився от Бога о подвизающемся во внутреннейшей пустыне Павле Фивейском, путный труд в глубочайшую пустыню подъял еси; обрет же его и духовно с ним беседою насладився, погребению его послужил еси и душу его во славе возносимую горе видел еси, с нимже ныне Богу, венчающему святыя Своя, поеши серафимскую песнь: Аллилуиа.

 

Икос 3

Имея Господь попечение о спасении рода человеческаго, показа тайновидцу, возлюбленному ученику Своему, во откровении славу, уготованную чистым девственником, иже с женами не осквернишася. Тоя славы возжела, великий Онуфрий последова Ангцу Божию тесным и скорбным путем жития пустыннаго, идеже от рук ангельских причащение Святых Таин приимаше; ныне же, ликуя со безплотными пред Престолом Божиим слышит от нас похвалы сия:

Радуйся, вместо отвергшагося тебе плотскаго отца, усыновленный Царем царствующих.

Радуйся, в пустыню Ангелом, яко светлым лучем, приведенный.

Радуйся, пустыннолюбцем Пафнутием, яко сокровище, нам откровенный.

Радуйся, им в пустыне честно погребенный.

Радуйся, и других отцев сонме, темже Пафнутием в пустыни обретенный.

Радуйтеся, четверице юношей, Ангелом в пустыне питаемая.

Радуйтеся, и Святых Таин причащения от руки безплотнаго сподобляемая.

Радуйся, Тимофее пустынниче, образ по падении востания собою нам показавый.

Радуйся и ты, Пафнутие, дивная жития сих отцев списавый.

Радуйся, Петре, в горе Афонстей подобное Онуфрию житие провождавый.

Радуйся, со всеми в жребии Богоматере подвизавшимися равную древнейшим отцем славу восприявый.

Радуйся, с дивным Афанасием в сонме отцев в последнейшая лета просиявый.

Радуйтеся, вси отцы преподобнии, наставницы монахов и собеседницы Ангелов.

 

Кондак 4

Бури житейския бежа, преподобный Марк прииде в гору Франческую, в нейже поживе девятьдесят лет, и многая злострадания от бесов претерпе тридесятолетнее время, спогребаяся Христу, тридесятолетне Крещение приемшему во Иордане; темже молим тя, преподобне: на Небеси вселяяйся, призри и на нас, просящих твоея помощи, еюже от обуреваний греховных нас избави, да поем тобою нам благодеющему Богу: Аллилуиа.

 

Икос 4

Слышав преподобный Памва псалмопевца, глаголюща: «Рех, сохраню пути моя, еже не согрешати ми языком моим», - положи себе тое слово делом исполнити, и дошед стиха сего, остави учение книжное, да сему единому словеси внимая, достигнет совершенства духовнаго, егоже и стяжа; молчанием же своим многим быв образ спасения. Темже и прочия отцы безмолвием Богу послужившия да восхвалятся песнословии сими:

Радуйся, Памво, страхом Божиим, якоже узами, язык свой связавый.

Радуйся, точию на славословие Божие уста своя отверзавый.

Радуйся, кроткий Агафоне, для научения молчанию камень три лета во устех своих носивый.

Радуйся, Иоанникие, в горах и пустынях чудное житие поживый.

Радуйся, Серапионе, синдоном единым покрывавыйся, и исполнения ради Христова словесе, молчаливо обнажение понесый.

Радуйся, Андрониче, с блаженною молчания любительницею Афанасиею, дванадесятолетное время словесе земнаго не провещавый.

Радуйся, Давиде, якоже древле благоразумный разбойник, ко Христу возопивый.

Радуйся, яко на крест, на подвиг покаянный возшедый.

Радуйся, от Ангела, аки Захария, чудною немотою связанный ко глаголанию с человеки, Богу же славословия ясно вещавый.

Радуйся, Варваре, покаяния ради с безсловесными скоты себе сочисливый.

Радуйся, якоже благоразумный разбойник, во отверзшаяся тебе райская врата вшедый.

Радуйся, Виталие, заушение без вины молчаливо претерпевый и «прежде времени ничтоже судите», - завещавый.

Радуйтеся, вси отцы преподобнии, наставницы монахов и собеседницы Ангелов.

 

Кондак 5

Боготечная звезда в Палестине возсия - Освященный Савва, в егоже обители дивный Иоанн Дамаскин, якоже новый Давид, песньми богокрасными Церковь украси, христоподражательным смирением гордаго змия главу сотре, за честь икон Христовых пострадав, чудно Богоматерию исцелен бысть, и до конца живота своего Владычице благодарственная пояше, и неизреченно от Нея Рожденнаго пресладким гласом немолчно славословяше, поя: Аллилуиа.

 

Икос 5

Видев юноша Кириак ангелоподобное великаго Евфимия житие, притече к тому во осмьнадесятое лето возраста своего и, во ангельский образ облечен, обоих преподобных, Евфимия и Феоктиста, чудным добродетелем подражатель являшеся; с нимиже ныне и во славе Небесней торжествуя, приемлет от нас пения сия:

Радуйся, с пречудным Герасимом четыредесятодневный подвиг пощения мужественно совершавый.

Радуйся, во смирении своем себе худша всех вменявый.

Радуйся и ты, приснопамятный Иоанне, ветхия пещеры всельниче.

Радуйся, от тесноты пещерныя в широте райских селений упокоенный.

Радуйся, другий Иоанне, сан святительский во смирении своем сокрывый и, аки раб, подвизающимся отцем служивый.

Радуйся, преподобным Саввою, не ведущим тайны твоея, ко пресвитерству убеждаемый.

Радуйся, по слезном того молении Самим Богом о святительстве твоем объявленный.

Радуйся, Георгие, в Хозиве постивыйся и к постившемуся нас ради Христу в Небесная преселивыйся.

Радуйся, Феодоре, едину власяницу во одежду себе имевый.

Радуйся, Симеоне, на Дивней горе вселивыйся и Христа Бога умом выну созерцавый.

Радуйся, Исихие молчаливе, известивый нам, яко память смертную имый - не возможет согрешити.

Радуйся, с Василием, Прокопие, о чести икон святых гонения претерпевый.

Радуйтеся, вси отцы преподобнии, наставницы монахов и собеседницы Ангелов.

 

Кондак 6

Проповедницы равноапостольныя Феклы, благовествовавшия граду Иконийскому Христа, словесем внимая, преподобне Харитоне, возжелал еси Живоносному Гробу поклонитися, и в том пути в разбойники впад, Богом же от них дивно спасен, вертеп их во храм Божий претворил еси. И нас, богоносе, молитвами твоими от разбойников мысленных исхити и на путь ведущий в горний Иерусалим направи, да сподобившеся части подвизавшихся с тобою, благодарно поем Богу: Аллилуиа.

 

Икос 6

Возсия, якоже луча многосветлая, от Христа, Солнца Правды, свет приемлющая, Феодосий Великий, общее житие иноков уставивый, и ныне, со ученики своими вкупе в раи Господа своего веселяся, слышит от любве нашея приносимая похвалы сия:

Радуйся, от великаго провидца Симеона Столпника на подвиг иночества и предстательства приемый благословение.

Радуйся, с ним ныне и на Небеси сподобивыйся водворения.

Радуйся, смирением преизяществовавшему Маркиану друг и собеседник сотворивыйся.

Радуйся, зерном пшеничным, чудно от брады Маркиановы изъятым, обитель его в гладе препитавый.

Радуйся, Василия, ученика своего, истинным послушанием украшеннаго, ко Христу предпославый.

Радуйся, Герасиме, в техже странах Палестинских чудное житие показавый.

Радуйся, льва яко кроткаго послушника себе стяжавый.

Радуйся, Данииле, в подражание Симеону на столпе такожде просиявый.

Радуйся, Алипие, леты позднейший столпниче, равную с первыми мзду от Владыки восприявый.

Радуйся, и матерь свою ко приятию образа иноческаго чудным видением увещавый.

Радуйся, Варлааме, в дальней Индии Христа, посреде земли соделавшаго спасение, Иоасафу благовестивый.

Радуйся, Иоасафе, безценнаго камене Христа познавый и верою в Него отечество свое обогативый.  

Радуйтеся, вси отцы преподобнии, наставницы монахов и собеседницы Ангелов.

 

Кондак 7

Хотя Владыка всяческих показати, яко несть пред Ним разнствия мужескаго пола, ни женскаго, но вси у Него едино суть, дарова и женам благодать Свою, еже попрати древняго змия, Еву в раи запеншаго: Синклитикия бо пощением и терпением болезни - венчася; Аполлинария - при болоте в пустыни поживши, терпение дивное показа и, среди отцев всельшися, победи врага; Сарра и Матрона, Феодора и Иустина - в посте и молчании просияша; Кира и Марина  - железы тяжкими, ради любве Христовы, себе связаша; Феодора - клеветы напрасныя несением, прежний свой грех искупи; Анастасия - царския чертоги оставльши, в вертепе вселися и, единому Богу ведома, служаше пощением; Евгения, Феврония, другая Анастасия и Епистимия - мученическою кровию венчашася; ныне же вси со Христом, Женихом Безсмертным, радуются и ликуют, поюще Ему: Аллилуиа.

 

Икос 7

Новое чудо милосердия Божия явися, егда бывшия сосуды греха, к покаянию ученьми святых наставлены, Духа Святаго благодатию очистишася и блаженства Небеснаго сподобишася, изведоша бо отцы пустыннии честное от недостойнаго, с нимиже ныне и ублажаются похвалами сими:

Радуйся, Германе, огнем всенощныя молитвы твоея лед греховнаго сердца Евдокии растопивый.

Радуйся, Евдокие, богатство греха отвергшая и послежде кровию мучения Христу уневестившаяся.

Радуйся, Пелагие, словесы Нонна блаженнаго к покаянию возбужденная и в горе Вознесения житие свое боголепно совершившая.

Радуйся, Пафнутие, страхом вездеприсутствия и суда Божия сердце Таисии умягчивый.

Радуйся, Таисие, яко трилетняя твоя покаянная воздыхания проидоша небесныя облаки.

Радуйся, Колове Иоанне, другую Таисию, во единем часе покаявшуюся, якоже разбойника, к раю благости Господней приведый.

Радуйся, Мартиниане, покушавшуюся тебе от целомудрия отторгнути и саму диавола попрати убедивый.

Радуйся, Фотиние, шестилетное житие среди моря на камени мужественно совершившая.

Радуйся, Марие, Марином нарекшаяся и неповинное из монастыря изгнание претерпевшая.

Радуйся, Зосимо, в пустыни Иорданстей велию покаяния маргариту - Марию Египтяныню обретший.

Радуйся, Марие, четыредесятьосмолетным плачем тину греховную измывшая.

Радуйся, Иакове, по падении паки востанием образ безмернаго милосердия Божия к кающимся грешником явивый.  

Радуйтеся, вси отцы преподобнии, наставницы монахов и собеседницы Ангелов.

 

Кондак 8

Странно бе видение, егда дева юна Евфросиния, образ изменивши, со иноки всельшися, неопалима пребысть и, яко камень честен, по тридесяти летех постничества, во время к Богу своего отшествия родителю своему объявися; Ксения же, обручника бежавши, странна бе на земли, ангелом же совсельница явися на Небеси; Евпраксия, Макрина и Евстолия - девством и воздержанием, Олимпиада - страннолюбием Христу послужиша; Мелания - супружника к чистоте увеща, аки новая Мариам, победная воспе; Феоктиста - илиотропионом питающися в запустелой церкви Богоматери, Солнцу Правды незаходимому до дне преставления своего сладце пояше песнь: Аллилуиа.

 

Икос 8

Все иноческое собрание отцев дивляшеся, видя равноангельнаго Паисия безмерное пощение, емуже единых точию Святых Таин причащение довлеяше, без пищи бо телесныя семьдесят дний пребываше; темже и прият благодать от Бога, еже и великих грешников к покаянию обращати, умерших же в Православней вере, но не довле сотворивших о гресех своих, от вечных мучений изымати ходатайством своим. Тоя великия милости от Господа да не лишени будем и мы молитвами твоими, преподобне, воспевающия ти похвалу сию:

Радуйся, отпадшаго от Христа, ради любве женския, паки ко Творцу и подвигу иноческому молитвою твоею обративый.

Радуйся, о кающихся и душу свою положити готов бывый.

Радуйся, прозорливыма очима благодать Божию быти имевшую во отроке Пимене прозревый.

Радуйся и ты, Пимене, благословение великаго Паисия прияти еще в детстве твоем вожделевый.

Радуйся, иноки поучавый, да мертвых себе быти миру вменяют.

Радуйся, Сисое, при кончине твоей Самим Господом посещенный.

Радуйся, Оре, при видении врага, показавшаго тебе колесницу огненную, к гордости не восхищенный.

Радуйся, Геласие, житейскими печальми не возмущенный.

Радуйся, со другом твоим Евтихием, Флорентие, в смирении и простоте зверя дивияго в сожителя себе имевый.

Радуйся, Венедикте, множество постников от ученик твоих Господу приведший.

Радуйся, поданную тебе злобою вражиею сткляницу яда знамением Креста сокрушивый.

Радуйся, по заповеди Христовой, завистником твоим вся простивый.

Радуйтеся, вси отцы преподобнии, наставницы монахов и собеседницы Ангелов.

 

Кондак 9

Всяк слух ужасается пачеестественному самоотвержению твоему, предивне Алексие, человече Божий, како, по седминадесятилетном странствии, другия седмьнадесят лет пред враты родительскими пребывая, укорения, биения и поругания от своих рабов претерпел еси, никимже познаваем. Радуйся такожде и ты, Иоанне, в кущи у врат родительскаго дома, якоже Лазарь на гноищи, три лета прожив, самою материю своею презираемый, яже ни воззрети на тя хотяще, не познавая, яко ты сын ея, тайно от дому бежавый; матери убо своей, пред отшествием своим к Богу, подав книгу Евангельскую, тайну твою открыл еси. Мы же, к миру сему прилепившиися, молим вас: умолите о нас Владыку Христа, да и нас спасет, имиже весть судьбами, и научит пети Ему: Аллилуиа.

 

Икос 9

Вития богомудрыя явишася от отцев пустынных святители Христовы, от нихже просия Великий Василий - иноческаго жития уставы утвердивый и сам первее я делом совершивый, Григорий - Богослов новый явися, Златоустый же Иоанн - поручением милосердия Божия грешников к покаянию златоструйными учении привлекаяй, Николай Мирликийский - милостынею Бога прослави, Иоанн Милостивый - от осуждения ближних слух отвращаше, Афанасий и Павел - беды и изгнания за правоверие подъяша. С сими и прочии святители ублажим, поюще:

Радуйся, Спиридоне, с простотою словес дивное знамение в честь Троицы Единосущныя от плинфы показавый.

Радуйся, Кирилле, Пресвятую Богородицу истинную Матерь Божию быти исповедавый.

Радуйся, Григорие, Омиритский председателю, чудесы просиявый.

Радуйся, явлением Христа, грядущаго во славе, мудрецев иудейских ужасивый.

Радуйся, Нифонте, чудное пременение от жития тьмы к житию во свете покаянием явивый.

Радуйся, Григорие Двоеслове, во образе странника Ангела угостивый.

Радуйся, с нелицеприятным Амвросием, Григорие, Ниссийския Церкве пастырю богозванный.

Радуйся, с богомудрым Мелетием, Александре, от нищеты и смирения на высоту святительства вознесенный.

Радуйся, с братом твоим песнопевцем Феофаном, Феодоре, начертание на лице своем за честь образа Христова претерпевый.

Радуйся, со ученики своими, Студийский Феодоре, за иконы святыя пострадавый и лику святителей на Небеси причтенный.

Радуйся, со Иоанном и Павлом, Александре, Новаго Рима первопрестольниче.

Радуйся, Феодоре, Анастасиупольския Церкви пастырю и светильниче.  

Радуйтеся, вси отцы преподобнии, наставницы монахов и собеседницы Ангелов.

 

Кондак 10

Спасения стезю новую являя, призва Господь избранника Своего Андрея явлением Своим на неведомый дотоле путь юродства Христа ради: сего бо, яко Павла верховнаго, до третияго Небесе восхитив, славу обителей райских показа, иже и Богоматерь виде, омофором Своим молящияся люди покрывающую. Сему подвигу подражатель и Симеон Емессийский явися, во юродстве своем грешныя к покаянию обращаше. И от лика жен богоизбранная Исидора сим же путем ко Христу дойде. С нимиже и иныя, аще и миру неведомыя, но ныне вси купно окрест страшнаго Престола Пресвятыя Троицы на крылах безстрастия летающии, со огнезрачными умы поют Трисвятую песнь: Аллилуиа.

 

Икос 10

Стены каменныя твердее огрубеша сердца наша жестокостию греховною, ихже хотя умягчити, Человеколюбец Господь подаде угодником Своим источники словес благодатных, еже напаяти души истаявающия зноем грехов: богодухновеннаго бо Ефрема рыдания потрясают пустыни греховнаго запустения, Иоанн - лествицу к Небеси писании своими показа, Каллист и Игнатий, с Нилом Синайским и божественным Григорием - силу всепокланяемаго и пресладкаго имене Иисусова, в молитве призываемаго, нам показаша, и о многих прежде подвизавшихся праведницех - трудолюбный Палладий в писаниих своих возвести. Вся сия, нашему спасению послужившия, благодарно воспоем, зовуще:

Радуйся, Ефреме, словесы своими, яко трубою архангельскою, души ленивых от мертвости греховныя воздуждаяй.

Радуйся, Ефремов друже Авраамие, голубицу свою из челюстей адскаго змия исторгнувый и покаянием целу Христу возвративый.

Радуйся, Марие, пятнадесятолетным покаянным рыданием, якоже блудница у ног Христовых, двулетная своя прегрешения омывавшая.

Радуйся, Иоанне, с рыдавшими в темнице блаженными самоосужденники ныне вечною радостию веселящийся.

Радуйся, со Акакием незлобивым, Аввакире, на высоту безстрастия вознесшийся.

Радуйся, Исидоре, седмолетным смиренным исповеданием грехов бремене их свободивыйся.

Радуйся, Дорофее, болящим братиям, якоже Христу, послуживый.

Радуйся, Досифее, пятолетным отсечением воли своея послушливому Сыну Божию подражавый.

Радуйся, с безмолвным Варсонофием, великий Иоанне, души постничество проходящих братий к подвигу укреплявый.

Радуйтеся, Исихие, с Марком и Диадохом, словесы духоносными нас воодушевляющии.

Радуйся, Ксенофонте, с подружиею и чады твоими вседомовне Господеви послуживый.

Радуйся, с Маркеллом, Александре, чину неусыпаемаго псалмопения обители научивый.

Радуйтеся, вси отцы преподобнии, наставницы монахов и собеседницы Ангелов.

 

Кондак 11

Пения всеумиленная от любве приносимая вам не отвержите, отцы богоноснии, аще и несть красна песнь во устех грешника. Вы же, за любовь любовию воздающе, сиянием добродетелей ваших озарите душу, мглою грехов помраченную, и умолите Всемилосердаго Господа, да сподобит очиститися истинным покаянием вся к вам прибегающия и тамо узрети славу вашу и венцы, имиже венчани есте от Пресвятыя Троицы, да услышим ваш глас, празднующих в Небеснем Иерусалиме, идеже с лики безплотных поете Царю Славы Христу: Аллилуиа.

 

Икос 11

Светозарныя звезды, древним отцем подобныя, возсияша и в нашей земли, имже чиноначальницы явишася первоподвижницы Печерстии: Антоний - от жребия Богоматерня, Святыя Горы, благословение принесый, Феодосий - от юности ярем Христов подъявый, Никон, Варлаам, Стефан, Нестор и Пимен, Моисей, цвет целомудрия, и Иоанн Многострадальный - исправленьми своими, аки солнца светлая, облисташа страну нашу, от нихже, яко лучи светлы, возсияша подражатели тех и в позднейшая времена, яже с древними отцы да увенчаются похвалами сими:

Радуйся, Сергие, со ученики своими Никоном, Саввою, Стефаном, Михеем и прочими, подобно древнему Антонию подвизавыйся чудне.

Радуйся, с Савватием, Зосимо, на острове Соловецком рай жития иноческаго насадивый дивне.

Радуйтеся, с Германом, Сергие, северный град царствующий от Валаамския обители молитвами и благословением ограждающии.

Радуйтеся, Тихоне с Лаврентием, страну Калужскую чудесы исцелений просвещающии.

Радуйтеся, с Петром, Пафнутие, от невернаго корене израстшии, но ко Христу, жизненней Лозе, верою привившиися и мног плод принесшии.

Радуйтеся, Геннадие с Тихоном, Иаковом и Пахомием, пределы Костромския подвигами своими облиставшии.

Радуйся, со Авраамием, и Макарие, от Желтых Вод в страну Галичскую преселивыйся и зде обители на славословие Божие устроивый.

Радуйтеся, Дорофее со Адрианом, во области Ярославстей Богоматерню икону прославльшии.

Радуйся, Симеоне, в хладных странах Сибирских теплотою Духа Святаго согретый и дивными цветами добродетелей, аки крин райский, процветший.

Радуйся, с богопрославленными отцы и ты, Евфросиние, Полоцкое украшение и девам сияние.

Радуйся, с ликом святых жен, Евфросиние, страны Суздальския радость и ограждение.

Радуйся, Серафиме, новая звездо, светом своея любве всех во обитель Саровскую привлекающая.

Радуйтеся, вси отцы преподобнии, наставницы монахов и собеседницы Ангелов.

 

Кондак 12

Благодать Божественную испросите поющим вас, первопрестольницы Церкви нашея Петре, Алексие, Ионо, Филиппе с новопрославленными святители Митрофаном, Тихоном, Феодосием, Иоасафом, Питиримом, Ермогеном, Иоанном и Иннокентием, и весь личе архипастырей, в православнем нашем Отечестве просиявый и сонму древних богомудрых иерархов причтенный. С нимиже восхваляется и ревнитель Православия Иов, украшение страны Волынския, и прочии вси во обителех земли нашея Богу угодившии и во обителех Верховнаго Началопастыря Христа торжествующии ныне; помяните и нас во святых молитвах ваших, осените с высот Небесных благословением своим и научите достойно воспевати Богу: Аллилуиа.

 

Икос 12

Поем дивныя подвиги ваша, хвалим терпение, прославляем борения, со врагами спасения подъятыя, и очами веры смотряюще вас, радующихся в райских селениих, молим смиренно: не забудите духовнаго семени вашего, но от усыпления греховнаго возбудите нас к покаянию, да не с юродивыми девами обрящем затворены нам врата чертога Христова. Пастырие наши добрии! Сладким гласом вашим призовите нас, далече от вас удалившихся, и в сродство ваше приимите яко чада своя, да и в горней стране прославим вас, ихже на земли ублажаем, поюще:

Радуйся, Пахомие, провидевый искушения, последних иноков ожидающия.

Радуйся, о тех слезное рыдание Христу приносивый.

Радуйся, во утешение от Спаса услышавый, яко последнии иноцы скорбьми и болезньми спасение обрящут.

Радуйся, обетование приемый, яко претерпевшия скорби равне с подвизавшимися Христа обрящут.

Радуйся, Антоние, смотрением Божиим известивый, яко аще бы и диавол смирился, то в первую славу вчинен был милосердием Божиим.

Радуйся, тем извещением от отчаяния к покаянию многия воззвавый.

Радуйся, Памво, о иноцех последняго рода ясно пророчествовавый.

Радуйся, Исхирионе, позднейшим спасение чрез смирение возможно быти извествовавый.

Радуйся, со Иоанном, Софроние, во утешение наше луг духовный насадивый.

Радуйся, Евфросине, в поварне братии служивый телом, духом же в рай восхищаемый.

Радуйся, и новый златоусте Димитрие, жития святых писанию предавый.

Радуйся, весь именованный и не именованный богосветлый сонме отцев, неисчислимый умом человеческим, яко звезды небесныя множеством.

Радуйтеся, вси отцы преподобнии, наставницы монахов и собеседницы Ангелов.

 

Кондак 13

О богоблаженнии и пречуднии отцы преподобнии, во всех странах мира Господу послужившии! Малое сие моление милостивно приемше, помяните восхваляющих ваша подвиги и к сокрушению о гресех обратите нас, умолите Человеколюбца Бога, да в день Судный десныя части со овцами благословенными сподобит нас, да не отвержени будем светлаго лика вашего, но помиловани Господем, в радости святых благодарно воспоем Ему: Аллилуиа.

 

(Этот кондак читается трижды, затем икос 1 и кондак 1)

 

 
Молитва

Преподобнии и богоноснии отцы, во всем мире чудными подвиги равноангельнаго жития просиявшии и нам разновидныя пути спасения примеры своими показавшии, молим вас: призрите с высоты горних селений на нас, долу волнами житейскими обуреваемых и в пустынях греховнаго уныния заблуждающих, прострите нам руку помощи вашея, да ихже образ видимо сподобихомся носити в жизни сей, с теми и по смерти удостоимся вчинени быти, да не обрящет в нас части своей борющий нас диавол, но да отбежит, отгоняем бичем молитв ваших, не могий восхитити нас от рук Ангельских, егда будем преходити воздушныя мытарства. Якоже иногда Василий Новый душу послужившия ему Феодоры духовным златом добродетелей своих от злобных мытарей искупи, тако и вы, все неисчетное множество, аще изыдете во сретение души, на помощь вас призывающия, сильны будете ю от власти князя тьмы исторгнути и о ней милосердаго Христа умолити, да избавлена будет муки нескончаемыя, обеща бо Господь волю боящихся Его сотворити и молитву их услышати. Умолите общаго всех Владыку, да всех хвалящих святая имена ваша на земли, тех имена да сподобятся написаны быти в книгах жизни Божественнаго Агнца, вземлющаго грехи мира, с Нимже вы на земли сраспястеся, с Тем и воцаритися имате во Царствии Его, славяще Его со Безначальным Отцем и Животворящим Утешителем Духом в безконечныя веки веков. Аминь.

 

По благословению

  митрополита Херсонского и Таврического Иоанна

Опубликована: 25.02.2017