Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе Херсона на сентябрь

Ночные литургии в Свято-Духовском кафедральном соборе:

в сентябре - с 28 на 29; в октябре - с 10 на 11 и с 24 на 25

Служба священномученикам ПРОКОПИЮ архиепископу ХЕРСОНСКОМУ и ИОАННУ пресвитеру

 

НА ВЕЛИЦЕЙ ВЕЧЕРНИ

На Господи, воззвах: стихиры, гл. 6:
 
Прехвальнии священномученицы Прокопие и Иоанне,/ восхваляем вы с любовию,/ вас бо не потопила вода безверия,/ ни буря ярости беззакония,/ ни ветры ересей погибельных,/ но Духом Святым просвещеннии,/ яко жертвы непорочныя Царю Славы принесостеся,/ Емуже молитеся о душах наших.
 
Прокопие богомудре,/ в лике новомученик прославленный,/ гласом немолчным паству твою наставлял еси,/ от волков хищных и наемник лукавых защищал еси,/ душу твою полагая за овцы, яко пастырь добрый,/ и ныне Христу молися/ даровати душам нашим мир и велию милость.

Всехвальне Прокопие новомучениче,/ за чистоту души твоея,/ увенча тя Владыка венцем славы вечныя,/ прияв твоя страдания и смерть/ яко жертву всесовершенну,/ темже и во светлостех небесных ныне ликовствуеши,/ Христу молящеся/ о спасении тя призывающих.
 
Отрасле рода благочестиваго,/ дарами Святаго Духа преизобильно украшенный,/ служителю Христов Прокопие,/ на ниве Господней потрудился еси,/ плод сторицею во ученицех принесл еси/ и богодухновенными возгремел еси глаголы,/ сораспятися Христу призывая/ и яве образ тебе самаго предлагая.
 
Прехвальне священномучениче Иоанне,/ тя ни темница изнурила есть,/ ни глад умори,/ ни озлобление и раны смятоша,/ во еже разлучити тя от любве Божия;/ темже Христу, святе, молися/ даровати Церкви нашей мир и велию милость.
 
       Слава, глас 8:
Славою и честию нетленною,/ яко подвижников добропобедных,/ венча вас Христос Подвигоположник,/ священномученицы Прокопие и Иоанне,/ и Царствие Небесное дарова,/ идеже со всем собором святых земли Херсонския/ в неприступнем свете пребывающе,/ прославляете Троицу Живоначальную и Нераздельную.
 
И ныне, Богородичен, глас тойже:
Царь Небесный за человеколюбие на земли явися / и с человеки поживе,/ от Девы бо Чистыя плоть приемый/ и из Нея прошедый с восприятием,/ Един есть Сын, сугуб естеством,/ но не Ипостасию./ Темже, совершенна Того Бога/ и совершенна Человека воистину проповедающе,  исповедуем Христа Бога нашего,/ Егоже моли, Мати Безневестная,/ помиловатися душам нашим.
 

Вход. Прокимен дня.

Чтения 3.

Пророчества Исаиина чтение (глава 43):

Тако глаголет Господь: вси языцы собрашася вкупе, и соберутся князи от них, кто возвестит сия в них? Или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину. Будите Ми свидетели, и Аз Свидетель, -  глаголет Господь Бог, -  и отрок, егоже избрах, да познаете и веруете Ми, и разумеете, яко Аз есмь; прежде Мене не бысть ин бог и по Мне не будет. Аз есмь Бог, и несть, разве Мене, спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог. И еще от начала Аз есмь, и несть от рук Моих избавляяй; сотворю, и кто отвратит то? Сице глаголет Господь Бог, избавляяй вас, Святый Израилев.

 Премудрости Соломоновы чтение (глава 3):

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие - сокрушение; они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему, яко благодать и милость в преподобных Его и посещение во избранных Его.

 Премудрости Соломоновы чтение (главы 5 и 6):

Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие - рвение Свое и вооружит тварь в месть врагом. Облечется в броня правды и возложит шлем - суд нелицемерен. Приимет щит непобедимый преподобие - поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И, от каменометныя ярости исполнь, падут грады; вознегодует на них вода морская, реки же потопят я нагло; сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех языков, яко дана есть от Господа держава вам и сила от Вышняго.

На литии стихиры, глас 1:
Прокопия священномученика/ приидите, вернии, вси почтим/ пении и песньми духовными,/ сей бо, мужеством препоясася,/ исповедник был еси крепок/ и мучения венец светел восприим благодатию,/ Христа прослави.

Цвете еси прекрасный, Прокопие богомудре,/ ты бо храмы душевныя чад своих созидая,/ егда же время приспе - душу твою за овцы положил еси,/ яко пастырь добрый и исповедник,/ и кровь твою честную за Христа излиял еси,/ темже от Вседержителевы руки подвигов почесть прияв,/ украсился еси неувядаемаго цвета сиянием.
 
Слава, глас 8:
В Небесный вшедши Чертог,/ багряницею украшеннии,/  Троице Святей с велиим сонмом новомучеников и исповедников  предстали есте,/ Прокопие и Иоанне многострадальнии;/ мы же днесь, память вашу светоносную совершающе,/ прославльшаго вас Господа величаем.
 
И ныне, Богородичен, глас тойже:
Приидите, людие,/ ублажим Заступницу усердную рода христианскаго,/ се бо предстоит Престолу Царя Славы/ и со слезами молит о земнем уделе Своем,/ с Неюже вкупе и собор святых Херсонских вопиет:/ Владыко Христе, спаси землю нашу.
 
На стиховне, глас 4:
Исповедник и священномученик явился еси,/ Прокопие славне,/ во изгнании и темнице паству твою наставлял еси,/ и мучением сияя, Ангелом уподобился еси;/ темже тя чтим и любовию празднуем/ светоносную память твою.

Стих: Праведник яко финикс процветет,/ яко кедр, иже в Ливане, умножится. 

Православныя веры ревнителю,/ богословия догматов и святоотеческаго учения/ проповедниче и исполнителю/ и Божественныя службы пламенный служителю,/ плоды трудов твоих Христу принесл еси,/ Емуже и до смерти последовал еси,/ Егоже ныне зриши в сиянии славы вечныя,/ священномучениче Прокопие.

Стих: Насаждении в дому Господни,/ во дворех Бога нашего процветут.

Не скорбети, но радоватися повелел еси чадом твоим,/ Прокопие блаженне,/ егда призва тя Господь последовати Ему страданием;/ аще гоним и истязуем бе,/ всего себе в руце Владычни предал еси,/ телесныя раны превозмогаяй/ силою вседетельною Духа.

Слава, глас 8:
Кровию обагривше священныя ваша одежды,/ внити сподобилися есте во Святая Святых,/ священномученицы Прокопие и Иоанне,/ мужественно страдания и смерть за Христа прияли есте,/ лесть и неистовство богоборческое поправше,/ врага победили есте;/ темже молим вас:/ укрепите молитвами вашими души наша.
 
И ныне, Богородичен, глас тойже:
Призри на моления Твоих раб, Всенепорочная,/ и всякия скорби избави землю нашу,/ да не постыдимся, Владычице,/ Тя призывающии,/ Ты бо еси православных помощь и покров/ и спасение душ наших.
 
Тропарь, глас 1
Светильник всесветлый во граде Херсоне явился еси,/ пастырю добрый, священномучениче Прокопие,/ любовь и милосердие в сердцах верных насаждая,/ твердо стояти во исповедании веры православныя призывал еси;/ мученически со пресвитером Иоанном за Христа пострадавый,/ и ныне купно с ним на Небеси Престолу Божию предстояще,/ молите Милостиваго Бога/ отечество наше в Православии и благочестии утвердити,/ мир Церкви даровати/ и душам нашим велию милость.
 
 
НА УТРЕНИ
 
По 1-м стихословии седален, глас 6:
Отвергнувся себе, ярем делания пастырскаго мужественно подъял еси, не убоявся прещения власти богоборческия, чадолюбиве отче и исповедниче Христов: ни гонения бо, ни темница не возможе отлучити тя от служения сего.
 
Слава, и ныне, Богородичен:
О Всепетая Дево, Тя вемы покров земли нашея, Тебе бо, грешнии, имамы предстательство, Тебе стяжахом в напастех спасение, Едину Всенепорочную.
 
По 2-м стихословии седален, глас 2:
О благолепии храма и Божественныя службы благоговейнаго совершения ревнуя, наставник и учитель благославный многих явился еси, Прокопие достохвальне, к познанию неизреченныя сладости жизни вечныя возводя послушная чада твоя.
 
Слава, и ныне, Богородичен, глас 2:
Молитвеннице теплая, Заступнице рода христианскаго,/ приими моления раб Твоих/ и осени Церковь Православную покровом Твоея благости.
 
Величание:
Величаем вас,/ священномученицы Прокопие и Иоанне,/ и чтим честная страдания ваша,/ яже за Христа претерпели есте.
 
Псалом избранный:

Бог нам прибежище и сила.

Помощник в скорбех, обретших ны зело.

Сего ради не убоимся, внегда смущается земля.

Боже, кто уподобится Тебе? Да не премолчиши, ниже укротиши, Боже.

Яко се врази Твои возшумеша, и ненавидящии Тя воздвигоша главу.
 
По полиелеи седален, глас 2:
Светло торжествующе празднуем память вашу,/ Прокопие и Иоанне священномученицы,/ и верою исполняемся,/ яко не оставляете паствы вашея своим попечением:/ предстояще незримо со Ангелы и всеми святыми,/ моление сие приимите,/ предстательствуя о спасении поющих вас.
 
Слава, и ныне, Богородичен:
Державным Твоим покровом от врагов навета нас, Владычице, сохрани вся неврежденны: Тебе бо стяжахом едино прибежище в нуждах.
 
Прокимен, глас 4: Проидохом сквозе огнь и воду,/ и извел еси ны в покой.

Стих: Разжегл ны еси, якоже разжизается сребро.

Евангелие от Матфея, зачало 36.

 
 По 50-м псалме стихира, глас 6:
Егда попусти Господь по грехом нашим/ братоубийство, гонения и веры Христовы поругание,/ тогда вы, священномученицы Прокопие и Иоанне,/ Церкве столпи непоколебимии явилися есте,/ и кровь свою за Христа пролиявши,/ паству во единстве соблюли есте,/ ныне же на Небеси предстоя с лики новомучеников,/ молите спастися душам нашим.
 
КАНОН, глас 2

Песнь 1

Ирмос: Грядите, людие,/ поим песнь Христу Богу,/ раздельшему море и наставльшему люди, / яже изведе из работы египетския,/ яко прославися.
 
Припев: Священномученицы Прокопие и Иоанне, молите Бога о нас.
 
Престолу ныне предстоя Христову яко архиерей и мученик преславный, Прокопие всечестне, приими молитвы наша, с любовию тебе возсылаемыя.
 
Плод благославен древа праведнаго прозябл еси, избранниче Божий Прокопие, от источника святости отеческия питаемь, подвигом исповедническим достойно трапезе райския принеслся еси.
 
Дар Богу, всеблаженне, себе самаго принесл еси, священномучениче пресвитере Иоанне, житием многотрудным и честным страданием.

Богородичен: Бога без семене рождшая, паче ума человеча, Дево Пречистая и Мати, Егоже моли помиловати поющих Тя.

 Песнь 3

Ирмос: На камени мя веры утвердив,/ разширил еси уста моя на враги моя,/ возвесели бо ся дух мо й, внегда пети:/ несть свят, якоже Бог наш,/ и несть праведен, паче Тебе, Господи. 

Миром помазания духовнаго украшен, Прокопие славне, добре священствовал еси, жезлом веры отгоняя ересей ловитвы и сохраняя стадо словесное от волков губящих е.

Нощь отгнал еси суетства, богоглаголиве святителю Прокопие, блистании премудраго проповедания, и верных мысли просветил еси.

Возносимую презрел еси зиму безбожия, отче Иоанне, возлюбив учения святых отец догматы, теплотою Божественнаго Духа невредимо сердце твое соблюл еси.

Богородичен: Утверждение буди, прибежище и покров, Дево Пречистая, верою к Тебе прибегающим и любовию воспевающих Рождшагося из Тебе.
 
Седален, глас 3:
В незлобии Христу подражавый, истязания и раны от безбожник лютых кротко претерпел еси, Стефана первомученика гласом моляся за обидящих тя, Прокопие многострадальне.
 
Слава, и ныне, Богородичен:
Не имамы инаго прибежища, разве Тебе, Богородице, отечества нашего усердная Заступнице: всяк бо, почитаяй Тя, надежду обретает.
 
Песнь 4

Ирмос: Услышах, Господи,/ славное Твое смотрение/ и прославих, Человеколюбче,/  непостижимую Твою силу.

Паству твою премудро наставляя, богословия поборник явился еси, священнодейственне путеводящ добродетельных, Прокопие, деяний.

Тайны горняго мира чрез участие в богослужении познавати учил еси, богомудре святителю, прилеплятися же всем сердцем Небесным покровителем нашим, и тем приуготовитися вечности.
 
Утеснил еси нечестие, отче Иоанне, пространством истиннаго благочестия, и пути в сие ведущия, показал еси, спасая души, потопляемыя прелести богоборчества водами.
 
Богородичен: Просвети, Пречистая, омраченную душу мою светом Твоим, яже Свет рождшая Един Ипостасный.
 
Песнь 5

Ирмос: Света Подателю и веков Творче, Господи,/ во свете Твоих повелений настави нас:/ разве бо Тебе, иного бога не знаем.

На Древе Простершемуся волею подобяся, святителю Христов, Егоже милосердию подражая, евангельски молил еси: Отче Благий, ихже дал еси мне, сохрани, да никтоже от них погибе.

Душа твоя крепкая козни вражеския низложи, мрак неверия и лукавствия разгнася твердейшею верою твоею, Прокопие всехвальне, архиереев похвало.

Смиряяся оскорбляем, темницы и изгнания горечь претерпел еси, темже блаженную улучил еси, отче Иоанне, славу и светлость.

Богородичен: Иже образ Ипостаси Отчи, из Тебе прият смешение, Богородительнице, и истлевший образ прослави, и сего нова сотвори.
 
Песнь 6

Ирмос: В бездне греховней валяяся,/ неизследную милосердия Твоего призываю бездну:/ от тли, Боже, мя возведи.

Падшаго естества возношение, Духом укрепляемь, поправ, мужественно облеклся еси багряницею нетления, Прокопие священномучениче: темже прославляемый Ангелы и человеки.

Кровию страдания, святителю блаженне, освятил еси землю, духом же на Небеса возшед, присовокупися гласу святых новомучеников, воспевающих Святую Троицу.
 
Молитвы твоя прияты быша яко кадило, отче Иоанне, в воню благоухания духовнаго, Возсиявшаго от Девы исповедавшаго.
 
Богородичен: Вземлющаго грехи всего мира, Христа заченши, Пречистая, не престай просящи грехов прощения воспевающим Тя.
 
Кондак, глас 4
Во святителех благочестно пожив/ и мучения путь прошед,/ безбожия силу побеждая,/ поборник явился еси Херсонстей пастве, святителю Прокопие;/ темже со пресвитером Иоанном, сподвижником твоим, тя почитающе,/ со умилением вопием:/ от бед избавите нас/ усердными вашими мольбами,/  священномученицы преславнии.
 
 
Икос
К высшему подвигу мученичества устремися, Прокопие преславне, яко всесожжение Божественное и жертва живая принеслся еси Спасу всех. Темже вопием ти: радуйся, исповедническаго подвига сияние прославивый; радуйся, мученический крест во дни гонений на Церковь избравый. Радуйся, Христа распинаемаго паче жизни временныя возлюбивый; радуйся, темницу, страдания и смерть за Него претерпевый. Радуйся, паству Христову, вверенную тебе, от расхищения соблюдый; радуйся, и во изгнании сирых чад твоих не оставивый, пламенною молитвою от звероуловления тех ограждая. Радуйся, со пресвитером Иоанном за веру Христову смерть приявый. Радуйтеся, молитвенницы наши пред Богом, священномученицы преславнии.
 
 Песнь 7

Ирмос: Образу златому, на поле Деире служиму,/ трие Твои отроцы небрегоша безбожнаго веления,/ посреде же огня ввержени, орошаеми, пояху:/ благословен еси, Боже отец наших.

Глагол твоих вещание и святоотеческих преданий сила обтече, святителю богодухновенне, землю Херсонскую, напаяя сию  Божественною благодатию.

Святых жития не токмо умом познавати учил еси, святителю Прокопие, житием бо твоим и деяньми тех подвиги проповедуя, Божественным разумом души пасомых просвети.

Не поклонився, священномучениче Иоанне, делом рук беззаконных, претерпев поношения, заточение и раны, чистоту веры православныя непоколебимо исповедал еси.

Богородичен: Радосте скорбящих и отчаянных, Ты еси, Мати Преблагая, Спаса рождшая рода нашего.
 
Песнь 8

Ирмос: В пещь огненную ко отроком еврейским снизшедшаго/ и пламень в росу преложшаго Бога/ пойте, дела, яко Господа/ и превозносите во вся веки.

Ни темница, ни ярость мучителей, ни страдания, ни даже смерть не возмогоша разлучити тя от любве Божия, святителю Христов, но тою укрепляяся, воспевал еси: благословен Бог отец наших.

Воистину блажим тя, Прокопие многострадальне, ибо сподобился еси соделатися общником Страстей Христовых, и себе самаго в дар Зиждителю принося, вопиял еси: благословен Бог отец наших.

Возмогл еси Божиею вседетельною силою богоборческия прелести вселукавое мудрование, отче Иоанне, победити и венец нетленный от всех Владыки прияти, поя: благословен Бог отец наших.
 
Богородичен: Столп крепости тверд, и Хранительницу, и Заступницу стяжавше Тя верою поющии: благословен Бог отец наших.
 
Песнь 9

Ирмос: От Бога Бога Слова,/ неизреченною мудростию пришедшаго обновити Адама,/ ядию в тление падшаго люте,/ от Святыя Девы неизреченно воплотившагося нас ради,/ вернии, единомудренно песньми величаем.

Верою просящия тя спасай от всякия беды, Прокопие блаженне, во Царствии Небеснем пребываеши бо присно, яко мученик непобедим.

Возвышен явился еси страдании честными, приял еси венец победы, священномучениче Иоанне, и ныне в лике новомученик и исповедник предстояще Божественному Престолу, радуешися вечною радостию.

Наставниче и молитвениче наш, святителю Прокопие, со иереем Иоанном, сподвижником твоим, приидите, станите с нами: днесь бо празднуем честную память вашу.

Богородичен: Ты Едина Богу, всяческая мудростию создавшему, Мати позналася еси Неискусобрачная, Дево Пречистая, темже Тя Ангели и человецы песньми величают.
 
Светилен:

Одежды твоя, Прокопие досточудне, кровию обагришася, страданием светло просветися лик твой, темже Христос венцем мученическим увенча тя.

 Слава, и ныне, Богородичен:

О Тебе мы хвалимся, Богородительнице,  и к Богу Тя имамы Предстательство,  простри руку Твою необоримую  и сокруши враги Церкве Православныя.  

 На хвалитех стихиры, глас 4:

Святителю всемудре Прокопие,/ сквозе бурю безумнаго неистовства/ к тихому пристанищу таинств церковных/ всепобеждающею Божественною силою/ Христово стадо, вверенное ти, направил еси;/ темже, воспевающе, молим тя:/ помози и нам не погибнути/ во страстей пучине.

Сосуд священ Духа Святаго был еси,/ от корене праведнаго плод совершен,/ Прокопие священномучениче,/ чада твоя любовию Христовою возлюбил еси/ и за тех душу свою положил еси, взывая:/ Господи, ихже дал еси мне, сохранил есть,/ да не погибнут.
 

Предстателие Церкве Православныя,/ священномученицы Прокопие и Иоанне всехвальнии,/ выну зрящии лице Господа на Небесех,/ не презрите ни единаго  от малых чад ея,/ но радостно покаяние наше приимите/ и молите присно/ всем православным христианом спастися.

глас 6:

Воспоим, боголюбивии людие,/ песньми и пении духовными/ святую память священномучеников Херсонских,/ святителя Прокопия и пресвитера Иоанна достохвальных,/ Православие добропобедным гласом/ небоязненно пред мучители исповедавших / и многим путь спасения показавшим./ Темже радуются ныне Ангельстии чини/ и сликовствуют святии земли нашея,/ с нимиже и священномученицы Херсонстии / прославляют Христа Бога нашего.

 Слава, глас 8:

Срадуйтеся нам Ангельския чины и святии вси,/ днесь бо празднуем память священномучеников Прокопия и Иоанна,/ кровию Царствия вечнаго достигших;/ веруем, яко духом вкупе с нами пребывая,/ моление сие приимут и Христу принесут,/ ходатайствуя о спасении нашем.

 И ныне, глас тойже:

Владычице, приими молитвы раб Твоих/ и избави нас/ от всякия нужды и печали.

 

НА ЛИТУРГИИ


Прокимен, глас 7: Честна пред Господем / смерть преподобных Его.

Стих: Что воздам Господеви о всех, яже воздаде ми?

Апостол, к Римляном, зачало 99.

Аллилуия, глас 4: В
оззваша праведнии, и Господь услыша их, и от всех скорбей их избави их.

Стих: Многи скорби праведным, и от всех их избавит я Господь.

Евангелие, от Луки, зачало 106.

Причастен: Р
адуйтеся, праведнии, о Господе,/ правым подобает похвала.

 

Молитва

О преславнии священномученицы, святителю Прокопие и пресвитере Иоанне! Призрите на моление нас, почитающих святую память вашу, и испросите нам у Христа Бога прощения грехов наших, да не до конца прогневается на нас Господь: согрешихом бо и недостойни явихомся милосердия Божия. Молите о нас Спасителя всех, да низпослет мир на грады и веси наша, да избавит нас от нашествия иноплеменников, междоусобныя брани и всяких раздоров и нестроений. Утвердите, священномученицы всеблаженнии, веру и благочестие во всех нас, и да избавит нас Господь от ересей, расколов и всякаго суеверия. О милостивии наши предстатели! Молитеся за ны ко Господу, да сохранит нас от глада и всяких болезней и да подаст вся на потребу человеком полезная. Наипаче же да сподобимся молитвами вашими Небеснаго Царствия Христа Бога нашего, Емуже честь и поклонение подобает со Безначальным Его Отцем и Пресвятым Духом, ныне и присно и во веки веков. Аминь.

 

По благословению

митрополита Херсонского и Таврического Иоанна

 

Опубликована: 04.08.2018