Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на декабрь

Ночные литургии в Свято-Духовском кафедральном соборе в декабре - в ночь с 21 на 22 (с четверга на пятницу) - благодарственная и в ночь с 31 на 1 (с воскресенья на понедельник) - новогодняя

Молитва о мире в Украине

Томос о даровании Украинской Православной Церкви самостоятельности в управлении

Обращение Патриарха к министру юстиции по вопросу независимости УПЦ

Официальные документы Украинской Православной Церкви относительно ситуации в нашей стране

Благотворительная акция «ПОДАРИ ПОДАРОК СИРОТЕ»

 Положение о проведении XI христианского городского фестиваля детского творчества ОСТРОВ РОЖДЕСТВА

Акафист Пресвятой Богородице в честь иконы Ее НЕУВЯДАЕМЫЙ ЦВЕТ

 

Празднование:

16 апреля (н. ст.)

 

Тропарь, глас 5

Радуйся, Богоневесто, жезле тайный, Цвет Неувядаемый процветший, радуйся, Владычице, Еюже радости наполняемся и жизнь наследствуем.

 

Кондак, глас 6

Не имамы иныя помощи, не имамы иныя надежды, разве Тебе, Владычице, Ты нам помози: на Тебе надеемся, и Тобою хвaлимся, Твои бо есмы раби, да не постыдимся.

 

Кондак 1

О Преблагословенная Богородице Дево, радосте и прибежище всем христианом, покланяяся Твоему пречистому образу, Тебе поем хвалебную песнь, Тебе приносим свои нужды, горе и слезы. Ты же, о, кроткая Заступнице наша, Тебе так близки вся земныя скорби и печали, приими наша в молитвах воздыхания, помози нам и от бед спаси, неустанно бо и со умилением зовем Ти: Радуйся, Мати Божия, Цвете Неувядаемый.

 

Икос 1

Яко Божие благословение и яко дар небесный, долгожданный, непрестанною молитвою испрошенная от Бога, ниспослана была еси, Богородице, праведным и многообрадованным родителем Твоим Иоакиму и Анне. Ты же о, Богоизбранная Отроковице, оставила еси родительское лоно и, яко светильник веры неугасимый, яко кадильница благовонная, во смирении предстала еси у порога храма Господня, и сила Вышняго вознесе Тя до самаго входа, введе во Святая Святых и отверзе вся сокровенная неба. О Премилосердная Богородице Дево! Отверзи и наша сердца к Твоему славословию и вознеси нашу молитву к Сыну Твоему и Богу нашему, да зовем Ти таковая:

Радуйся, чистото недосягаемая и кротосте неизреченная.

Радуйся, во смирении Своем возвеличенная.

Радуйся, сосуде Богом избранный.

Радуйся, Заступнице наша усердная.

Радуйся, Мати Божия, Цвете Неувядаемый.

 

Кондак 2

О Пресвятая Дево Марие, помыслы греховными и делы студными, долу приклоненны есмы, сердце наше холодом жизни объято, очи отягощены греховным сном. Но Ты, о Цвете Неувядаемый, омый нас росою утреннею, согрей нас солнцем любви и милосердия. Подыми нас, о Владычице, от праха земнаго ко Господу, да принесем Ему смиренное моление сие наше и вопием Ему: Аллилуиа.

 

Икос 2

Архангел Гавриил послан бысть от Бога во град Галилейский Назарет и принесе Ти, о Пречистая Дево, святое благовестие, глаголя: «Радуйся, Благодатная, Господь с Тобою!» Мы же, недостойнии, зряще величие таковое, во смирении сердца взываем:

Радуйся, обретшая благодать у Бога и паче Ангел возвеличенная.

Радуйся, яко зачала еси Сына, Иже наследит престол Давида, отца Его.

Радуйся, Свет неугасимый во тьме возжегшая.

Радуйся, жизни вечныя двери нам отверзающая.

Радуйся, Мати Божия, Цвете Неувядаемый.

 

Кондак 3

В скорбех мятемся, в суете и печали жития своего дни проводим. Но Ты, о Благословенная, освети души наша смирением, да приклонив главы наша, речем: «Се раби Господни, да будет нам по воли Твоей». Тебе же, о Цвете Неувядаемый, и от Тебе Рожденному всечасно поем: Аллилуиа.

 

Икос 3

Во дни же тыя иде Мариам во град Иудов, и вниде в дом Захариин, и целова Елисавет. И услыша Елисавет целование Мариино, и исполнися Елисавет Духа Свята, и возопи гласом велиим, глаголя: «Откуду мне сие, да прииде Мати Господа Моего ко мне?» О Пречистая Дево! Посети и нас, немощных и убогих, и вознеси воздыхания наша, яко дым кадильный ко Престолу Всевышняго, да от полноты благодарнаго сердца поем Тебе сице:

Радуйся, яко призре Господь на смирение рабы Своея.

Радуйся, яко ублажат Тя вси роди.

Радуйся, яко сотвори Ти величие Сильный.

Радуйся, источниче жизни и безсмертия.

Радуйся, Мати Божия, Цвете Неувядаемый.

 

Кондак 4

О Цвете Неувядаемый! О Красото благоуханная! Посети нас в скорбней земней юдоли нашей, умоли Сына Твоего, да сохранит нас от всякия беды и печали, гнева и воздыхания, да низпослет мир в сердца наша, да дарует нам, елико просим у Него, комуждо по своей потребе, и покрыет нас Своею неисчерпаемою милостию. Мы же, чающе Твоего всесильнаго заступления, величаем душею нашего Господа и вопием Ему: Аллилуиа.

 

Икос 4

Пастырем, стрегущим стражу нощную, Ангел Господень благовествова радость велию: яко родися Христос Господь во граде Давидове, повит и в яслех положен. О Пречистая Мати, рождшая Сына Твоего Первенца, приими от нас сицевая:

Радуйся, Дево Богородице, яко Тобою возсия мирови Свет разума незаходимый.

Радуйся, звездо, путь нам во тьме указующая.

Радуйся, заре таинственнаго дне.

Радуйся, в скорбех верное прибежище и скорая Помощнице.

Радуйся, Мати Божия, Цвете Неувядаемый.

 

Кондак 5

Се грядет Царь мира! Се Жертва тайная совершается! Ангели поют на небесех: «Слава в вышних Богу!» Раждается Спаситель мира! Христос приходит! Великая Божественная тайна: Бог явися во плоти. И мы, недостойнии раби, отложив всякое житейское попечение, во страсе и радости, яко пастырие и яко волсви, покланяемся Тебе, о Богомати, и Твоему Божественному Сыну непрестанно зовем: Аллилуиа.

 

Икос 5

Се праведный Симеон прииде духом в церковь, и прием Отроча Иисуса на руки своя,  благослови Бога и рече: «Ныне отпущаеши раба Твоего, Владыко, по глаголу Твоему, с миром! А Тебе, о Мати Марие, оружие пройдет душу, яко да открыются от многих сердец помышления». Мы же, спасеннии Тобою, вопием:

Радуйся, Преблагословенная, в радость печаль велию приводящая.

Радуйся, Мати Бога нашего, величайшия радости и величайшую скорбь о Сыне Своем претерпевшая.

Радуйся, Царице мира.

Радуйся, всем плачущим Надеждо и Утешение.

Радуйся, Мати Божия, Цвете Неувядаемый.

 

Кондак 6

О Преблагая Мати Марие! С бурею и гневом вздымается житейское море, глубокия бездны готовы нас поглотити, сердце наше трепещет, омрачена наша радость. Но Ты, о Кроткая и Милостивая, умоли Сына Твоего, да поможет нам, скорбным и сирым, в печалех наших, да укротит мятежныя волны греховных страстей, да отвратит от нас всякую беду и напасть, да научит нас како соблюсти Его вечную правду, а при кончине жизни нашея укажи нам тихую пристань и сподоби нас с Симеоном Богоприимцем возопити: «Ныне отпущаеши раба Твоего, Владыко!» Помози же нам, о Неувядаемый Цвете, не остави нас и спаси зовущих Богу: Аллилуиа.

 

Икос 6

Отроча растяше и крепляшеся духом и благодатию; и Ты, о Мати Его, с любовию слагала еси вся глаголы о Сыне в сердце Своем. Скорбна и печальна ищуще Его и в дружине, и во сродницех, и знаемых, егда возвращашеся с празднества Иерусалимскаго, и с радостию велиею обретши Его в церкви, седяща посреде учителей, иже дивляхуся и ужасахуся о Божественнем Его разуме. О Пречистая Кротосте наша! О Сладчайшее Сердце, любовию весь мир согревающее! Услыши нас, вопиющих Ти таковая:

Радуйся, Божественнаго Сына любовию возрастившая.

Радуйся, Руководительнице мудрая родительских сердец.

Радуйся, стено нерушимая чадом и отроком.

Радуйся, целомудрия и девства Хранительнице.

Радуйся, Мати Божия, Цвете Неувядаемый.

 

Кондак 7

«Чадо, что сотвори нам тако?», - вопрошаеши Сына Своего Иисуса, удивляяся, зряще Его седящим во храме посреде прегордых и суемудрых первосвященников иудейских. О снизойди же, Всеблагая Мати, и к нашим чадом, помолись о них Сыну Твоему и Богу нашему, да открыет им свет истиннаго Богопознания, покрый их краем Твоего благоуханнаго покрова; наши сыны и дщери просвети светом разума, укрепи их силы телесныя и душевныя, соблюди их в страсе Божием, в послушании родителем и в чистоте душевней, сподоби их возрасти на славу Богу и на благо земли отцев наших. О Светильниче любве неугасимый, умасти их елеем милости Твоея, согрей их кротостию очей Твоих, осени их ризою Своего материнства. О Цвете Неувядаемый! С крепкою верою, непоколебимою надеждою и великим сокрушением сердца, припадши к ногам Твоим, непрестанно вопием Богу: Аллилуиа.

 

Икос 7

Ходатаице теплая за род прелюбодейный и грешный! По глаголу твоему на браке в Кане Галилейстей Сын Твой и Бог наш сотвори начаток знамением, претворив воду в вино. Упроси же, о Матерь Божия, и ныне Сына Твоего, да сотворит и над нами чудо: да претворит скорбныя дни наша, повитыя ложью, обидою и слезами, в радость возрождения, в торжество любве и правды, да укрепит в нас начало Божественнаго Света, источник чистый Духа - Бога Святаго, Триединаго, все же лукавое и нечистое да изженет из сердец наших. О Чистото недосягаемая и Милосердие неизреченное! Приклони ухо Твое к молитве нашей и сподоби нас звати сице:

Радуйся, лучезарный Свете любве и всепрощения.

Радуйся, сосуде Божественный вечнаго блаженства.

Радуйся, за всех нас усердная пред Господем Молитвеннице.

Радуйся, нужды наша скоро ко Престолу Божию возносящая.

Радуйся, Мати Божия, Цвете Неувядаемый.

 

Кондак 8

Любви несть, правда исчезе, ложь и вражда, гнев и ненависть посеяны в сердце людское. Брат возстает на брата, чада на родители и родители на чада. О Милосердый Боже! Кто оскверни дивную жатву Твою, кто всея среди пшеницы плевелы и волчцы? Гнев Твой праведен, уже и секира при корени. Но се к Тебе припадает Матерь Твоя, усердная Заступница мира. О величайшая Любве и благоуханнейшее Сердце! Отврати от нас гнев Божий, за грехи наша праведно на нас движимый, укрепи любящия нас, да не поколеблет их ни гонение, ни время лютое; вразуми ненавидящих нас и творящих нам напасти, прости врагов наших, не ведущих что творят, смягчи гневное сердце их и озари их мрак светом любви Христовой, а злобу и ненависть их претвори в стыд и раскаяние. О Цвете благоуханный! Сосуды наша пусты, елея добрых дел несть у нас и светильники веры нашея от бури житейския угасают. Умилосердися же над нами: наполни сердца наша веселием чистых радостей, духовно обнови нас, да благодарными устами непрестанно со умилением поем Богу: Аллилуиа.

 

Икос 8

Весь быв в нижних, и вышних никакоже отступивый, Божественный Учителю, болящия исцеляя, мертвыя воскрешая, прокаженныя очищая, весь мир наполняя любовию, Кроткий Страдальче! Се висиши, пригвожденный ко кресту среди злодеев, и вси людие, стояще, ругахуся над Тобою, и с ними князи и воины. А Ты, о Скорбная Мати, поникла еси главою у креста Сына Твоего, и оружие пройде Твое матернее сердце. Мы же, почитая скорби материнскаго сердца Твоего, из глубины души вопием Ти сице:

Радуйся, Сладчайшая Дево Марие, яко печаль Твоя в радость будет и радости сия никтоже возмет от Тебе.

Радуйся, величайшия муки познавшая, зря Сына Твоего, кровию истекающа на кресте, уничижена, распята, оплевана.

Радуйся, яко Царицею мира наречешися и возсядеши одесную Престола Сына Твоего и Бога.

Радуйся, яко в скорби сердца Твоего Ты скорбь всего мира и грехи всех человеков омыла еси слезами.

Радуйся, Мати Божия, Цвете Неувядаемый.

 

Кондак 9

Тако возлюби Бог мир, яко и Сына Своего Единороднаго дал есть, да всяк веруяй в Него не погибнет, но имать жизнь вечную. И се неблагодарныя и злонравныя людие, яко злодея, пригвоздиша Его ко кресту. Мы же зряще таковая, ужасом объяти бывше, вопием: Боже, милостив буди нам, грешным! За наша бо прегрешения терпиши страшныя муки. О Скорбная Мати, не отврати лица Твоего от нас, разорви узы наша греховныя, очисти наша сердца от страстей и похотей лукавых, да в горении духовнем, яко свеща покаяния, возжжемся пред Крестом Божественнаго Твоего Сына, непрестанно моля с благоразумным разбойником: помяни нас, Господи, во Царствии Твоем! Молитвами Твоими, Богородице, исправи стопы наша к деланию заповедей Господних, омый нас от греха, соделай лучшими, подыми к Лучезарному Незаходимому свету, да зовем Богу: Аллилуиа.

 

Икос 9

«Совершишася! Отче, в руце Твои предаю Дух Мой». О Пречистая Мати! Слышиши ли, яко земля от печали содрагается, грудь ея распадается, гробы отверзаются, мертвыя востают и церковная завеса раздирается? Видиши ли, яко великая тьма объяла землю и людие в страсе и трепете перси своя биюще, глаголют: «Воистину Божий Сын бе Сей!» Мы же, таковому чудеси удивляяся и воистину Сына Твоего – Сына Божия исповедающе, верно вопием Ти:

Радуйся, Мати Божия, се бо вся глаголы, яже слагала еси в сердце Твоем, совершишася.

Радуйся, Благодатная Дево, Заре немеркнущая Дне незаходимаго.

Радуйся, Источниче нашего безсмертия.

Радуйся, Подательнице Божественныя благости.

Радуйся, Мати Божия, Цвете Неувядаемый.

 

Кондак 10

Да молчит всякая плоть человеча, и да стоит со страхом и трепетом, и ничтоже земное в себе да помышляет: се бо за грехи мира приносится Великая Жертва, се Спаситель мира Благообразным Иосифом во гробе нове полагается и повивается чистою плащаницею, душею же Своею низходит во ад сокрушити вереи вечныя и извести на свободу от века содержащия связанныя; из гроба же Своего провещает Матери Своей: «Не рыдай Мене, Мати, зрящи во гробе, Егоже родила еси Сына: востану бо и прославлюся, и вознесу со славою, яко Бог, верою и любовию Тя величающия». Отложим все земное и суетное и с чистым сердцем припадем ко Престолу Царя Славы, непрестанно вопия: Свят, Свят, Свят Господь Саваоф! О Мати нашего спасения! Сотвори и нас причастниками светлаго Воскресения Сына Твоего и вечнаго блаженства, да зовем Богу: Аллилуиа.

 

Икос 10

Во едину от суббот, зело рано приидоша жены на гроб, носяще ароматы, и се, пришедше, зрят: камень отвален от гроба и несть телесе Господа Иисуса. Ангел же к ним светло блистаяся, глагола: «О жены! Не бойтеся и не ищите Живаго с мертвыми: Христос бо воскресе, якоже и рече!»; Тебе же, о Владычице, научи вся приглашати сице:

Радуйся, Сын бо Твой воскресе тридневен от гроба.

Радуйся, яко вся земля ликует и вси Ангели поют на небеси: «Христос воскресе из мертвых, смертию смерть поправ и сущим во гробех живот даровав!».

Радуйся, яко Тобою вереи вечныя сокрушишася.

Радуйся, Подательнице жизни вечныя, нескончаемыя.

Радуйся, Мати Божия, Цвете Неувядаемый.

 

Кондак 11

О Иерусалиме, Иерусалиме, избивающий пророки! Тяжкое твое злодеяние прощено у Господа, и над миром возсияло Солнце правды незаходимое. Очисти же и наша души, Кроткая Дево! Очисти наша чувствия, да узрим Христа из гроба исходяща; одень нас в брачныя одежды, да с радостию внидем в украшенный чертог Христов, поюще Ему Воскресшему: Аллилуиа.

 

Икос 11

Егда приблизися час Твоего к Богу отшествия, о Богомати Дево, паки Ангел Господень Гавриил, светло блистаяся, предста пред Тобою, вручив Тебе светлую, неувядаемую рая лилию; и се Ты со смирением и радостию прияла еси волю Господню и тихо отошла к Божественному Твоему Сыну. О неустанная Молитвеннице наша! О Неувядаемый Цвете светлаго рая небеснаго! Низпошли и нам, Милосердная, тихий и безболезненный исход из сей юдоли плача, воздыханий и скорбей, да вопием Тебе таковая:

Радуйся, вознесенная на Небо Сыном Твоим, Царице Небесная.

Радуйся, скорая и верная пред Ним наша Помощнице и Заступнице.

Радуйся, Всепетая Дево, яко имя Твое неувядаемо красуется и ублажается из рода в род.

Радуйся, в бурях житейских надежное наше и тихое пристанище.

Радуйся, Мати Божия, Цвете Неувядаемый.

 

Кондак 12

О, страшный последний час наш! Сердце и вся уды трепещут, егда токмо помышляем о нем! Како оставим сирыми наша близкия и любимыя? Како пойдем посреди тьмы и сени смертныя к новой жизни? Како предстанем на Страшный Суд Творца и Бога? О наша Утешительнице! О добрая наша Помощнице! Помози нам, егда настанет сие, руку любящую Свою материнскую положи на чело наше, да утихнут наша страдания и душа наша возродится, умири тоску разлучения нашего с миром сим, и свет вечныя правды да возсияет пред нашими очами. О Пречистая Мати! На Тебе надеемся, Тебе молимся, и вопием Богу: Аллилуиа.

 

Икос 12

О душе моя, душе моя! Востани, что спиши? Конец приближается! Почто грехами богатееши? Почто не радиши, не готовишися? Господь при дверех, в чесом надежду полагаеши? Кий ответ проглаголеши Господеви, егда приидет Он, грозный Судия, судити землю? Ни часа, ни дне сего не веси. От края земнаго и до края звучит труба Архангельская, и мертвии востают, и собираются вси языцы. И се грядет Сын Человеческий на облацех с силою Своею, во всей славе Своей. Где наша добрая дела? Где милосердие? Где любовь? Прегрешений же наших многое множество закрыша небо. О Всемилостивая Богородице! В сей страшный день предстани нам и буди Ходатаицею за нас пред Сыном Твоим. На Тебе едину надеемся: не остави нас, грешных, буди нам защитою и укреплением. С теплою верою и упованием припадаем к пречистому Твоему образу и со слезами зовем таковая:

Радуйся, на Страшнем Судище Христове нас заступающая.

Радуйся, Небесная Царице, Мати Бога и Господа небесе и земли.

Радуйся, Своим омофором весь мир от бед и скорбей покрывающая.

Радуйся, верным чадом Своим вечную радость уготовляющая.

Радуйся, Мати Божия, Цвете Неувядаемый.

 

Кондак 13

О Неувядаемый Цвете! О Всепетая Мати Марие, рождшая всех святых Святейшее Слово! Нынешнее приими наше приношение, от всякия избави напасти всех и Небеснаго Царствия нас, Царице, сподоби, о Тебе вопиющих: Аллилуиа.

 

(Этот кондак читается трижды, затем икос 1 и кондак 1)

 

Молитва

 

О Пресвятая Дево, Мати Господа Вышних сил, Небесе и земли Царице, града и страны нашея всемощная Заступнице! Приими хвалебное пение сие от нас, недостойных раб Твоих, и вознеси молитвы наша ко Престолу Бога Сына Твоего, да милостив будет неправдам нашим и пробавит благодать Свою чтущим всечестное имя Твое и с верою и любовию покланяющимся пречистому образу Твоему. Несмы бо достойни от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорей Заступнице нашей: услыши нас, молящихся Тебе, удиви на нас великия и богатыя милости Твоя, яви нам небесную помощь Твою и заступление, и испроси у Бога Сына Твоего пастырем нашим ревность и бдение о душах, градоправителем мудрость и силу, судиям правду и нелицеприятие, наставником разум и смиренномудрие, супругом любовь и согласие, чадом послушание, обидимым терпение, обидящим страх Божий, скорбящим благодушие, радующимся воздержание; нам же всем низпосли дух разума и благочестия, дух милосердия и кротости, дух чистоты и правды. Ей, Госпоже Пречистая! Умилосердися на немощныя люди Твоя: разсеянныя собери, заблуждшия на путь правый настави, недугующия уврачуй, старость поддержи, юныя уцеломудри, младенцы воспитай, и призри на всех нас призрением милостиваго Твоего заступления, воздвигни нас из глубины греховныя и просвети сердечныя очи наша ко зрению спасения. Милостива нам буди зде и на Страшнем Суде Сына Твоего; преставльшияся же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава Небесных и упование земных, Ты по Бозе наша надежда и Заступница всех притекающих к Тебе с верою. Тебе убо молимся, и Тебе, яко всемогущей Помощнице, сами себе и друг друга и всю жизнь нашу предаем, ныне и присно и во веки веков. Аминь.

 

Икона Божией Матери «Неувядаемый Цвет»

Время появления на Руси этого образа неизвестно. Название «Неувядаемый Цвет» связано с песнопениями, посвященными Богоматери. На некоторых списках вместо лилий изображены розы или другие цветы. Издревле в молитвословиях встречается символическое сравнение Пресвятой Богородицы с «неувядаемым, благоуханным цветом». Также наименование Богородицы «Неувядаемый Цвет» восходит к канону Иосифа Песнописца. А происхождение иконы «Неувядаемый Цвет» связано с Афоном: по склонам Святой Горы росли цветы-бессмертники, считавшиеся символом чистоты.

Известно два варианта иконы «Неувядаемый Цвет». В первом, так называемом «тип Одигитрии», Богоматерь держит на левой руке Младенца Христа, а цветок лилии держит сам Христос либо Богоматерь. Во втором случае Богоматерь обращена к Младенцу, стоящему на высоком подножии — престоле. Христос в царском облачении: корона на голове, в руках скипетр и держава. Богородица поддерживает Его левой рукой, а в правой у Нее — процветший райскими цветами жезл.

Перед иконой «Неувядаемый Цвет» молятся прежде всего о том, чтобы сохранить себя в чистоте и праведности, а также о вразумлении при выборе будущего супруга. Обращаются и с молитвой при горестях в семейной жизни. Молитва перед иконой «Неувядаемый Цвет» помогает людям в нашествии печали, при потере близких людей, в состоянии одиночества. Во всех этих случаях Божия Матерь помогает обрести духовные силы для преодоления испытаний, продолжения жизни, исполнения христианского долга. Одной из самых проникновенных молитв, обращенных пред этой иконой ко Пресвятой Богородице, является акафист.

 

По благословению

митрополита Херсонского и Таврического Иоанна

Опубликована: 28.07.2017