Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на декабрь

Ночные литургии в Свято-Духовском кафедральном соборе в декабре - в ночь с 21 на 22 (с четверга на пятницу) - благодарственная и в ночь с 31 на 1 (с воскресенья на понедельник) - новогодняя

Молитва о мире в Украине

Томос о даровании Украинской Православной Церкви самостоятельности в управлении

Обращение Патриарха к министру юстиции по вопросу независимости УПЦ

Официальные документы Украинской Православной Церкви относительно ситуации в нашей стране

Благотворительная акция «ПОДАРИ ПОДАРОК СИРОТЕ»

 Положение о проведении XI христианского городского фестиваля детского творчества ОСТРОВ РОЖДЕСТВА

Акафист праведному СИМЕОНУ БОГОПРИИМЦУ

 


День памяти:
 
 
16 февраля (н. ст.)
 
 
 
Тропарь, глас 4

Симеон старец днесь веселится, восприят на руку свою Младенца Превечнаго Бога, от уз плоти разрешитися прося и вопия: видеста очи мои спасение Твое мирови.

 

Кондак, глас 4

Старец днесь отрешитися от уз молящеся сего жития тленнаго, Христа восприят на руки, Зиждителя и Господа.

 

Кондак 1

Избранный в благовестника явления Христова в человецех, святый праведный старче Симеоне, похвальная пения приносим ти, Богоприимче. Ты же, яко имеяй дерзновение ко Господу, Егоже во объятиих Твоих носил еси, моли спастися нам, любовию зовущим: Радуйся, Симеоне, старче праведный, Богоприимче преблаженный.

 

Икос 1

Ангел Господень послан бысть извествовати старцу Симеону, яко воистину от Девы родитися имать обетованный Спас миру Христос. Егда бо той, чтущу ему книгу пророка Исаии, достиже места, идеже бе написано: «Се Дева во чреве приимет и родит сына Еммануила», и недоумеваяй о реченных, помышляше в себе, како могут сия быти, тогда явися ему Ангел и возвести, яко не имать видети смерти, дондеже видит рождшагося от Девы Христа Господня. Таковому дивному о нем промышлению Божию чудящеся, воззовем к нему таковая:

Радуйся, старче Божий, старцев благочестивых украшение.

Радуйся, праведниче святый, праведников и святых радование.

Радуйся, с сединами старческими и мудрость истинную стяжавый.

Радуйся, Духом Божиим, яко муж праведен и благочестив свидетельствованный.

Радуйся, во всех оправданиих Господних непорочно и непреткновенно ходивый.

Радуйся, всем житием Твоим Господеви угодивый.

Радуйся, Симеоне, старче праведный, Богоприимче преблаженный.

 

Кондак 2

Видя старец, яко умножающимся летом живота, умножаются ему труд и болезнь, зело скорбяшe душею, яко продолжися время пришельствия его на земли. Темже, желание имый разрешитися и ко отцем преити, слезне просяще отпущения себе, зовый Богу: Аллилуиа.

 

Икос 2

Разум недоразуменный возвещенных от Ангела разумети, старец ища, недоумеваше, в себе глаголя: «Что сие есть странное и неудобь сказуемое таинство, яко Дева во чреве зачнет и родит Сына. Еда Дева чиста, яже мужа не знает, родити может, и кто будет Сей, Иже имать родитися без мужа, Сын Девы?» Паче же и паче испытуя писания, уразуме от них велию сию благочестия тайну, яко подобает Богу явитися во плоти, да спасет человека Богом же и человеком. Темже мы, дивному премудрости Божия совету чудящеся, воспоим блаженнаго сотаинника Премудрости, зовуще к нему таковая:

Радуйся, яко святою жизнию сердце твое очистил еси.

Радуйся, яко чистотою сердца пламенную любовь к Богу стяжал еси.

Радуйся, яко любовию к Богу ум твой чист сотворил еси.

Радуйся, яко чистотою ума разум Божественных писаний уяснил еси себе.

Радуйся, яко разумением писаний к вере во Христа приведен был еси.

Радуйся, яко верою и упованием к чаянию утехи Израилевой наставлен был еси.

Радуйся, Симеоне, старче праведный, Богоприимче преблаженный.

 

Кондак 3

Сила Духа Божия воздвиже во он день старца приити в церковь, и егда введоста родителя Отроча Иисуса, сотворити има по обычаю законному о Нем, и той, узрев Отроча, абие уразуме Духом, яко Сей есть обетованный Спас миру Христос и, радуяся, возопи Богу: Аллилуиа.

 

Икос 3

Имея ум зряй к Богу и быв в Дусе, прият тогда старец Симеон Младенца Иисуса на руку своею и благослови Бога и рече к Марии, Матери Его: «Се, лежит сей на падение и на востание многим во Израили и в знамение пререкаемо, яко да открыются от многих сердец помышления их». Таковому убо прозрению святаго дивящеся, ублажим Богоприимца пении сими:

Радуйся, Боговедче прозорливый, Христа Господня, во образе Младенца четыредесятодневна явльшася, Духом Божиим абие познавый.

Радуйся, Богопроповедниче святый, Бога, Того во плоти пришедша, во спасение миру велегласно проповедавый.

Радуйся, Боголюбче благочестивый, пришествием чаянныя тобою утехи Израилевой несказанно обрадованный.

Радуйся, Боговидче преблаженный, Бога во плоти явльшася не умныма точию, но и телесныма очима узревый.

Радуйся, Богоприимче праведный, всю тварь Содержащаго дланию старческими твоими дланьми восприявый.

Радуйся, Богоносче истинный, Бога, Егоже небо и земля носити не могут, во объятиях твоих телесне носивый.

Радуйся, Симеоне, старче праведный, Богоприимче преблаженный.

 

Кондак 4

Буря внутрь помышлений тревожных вниде в душу святыя Богоотроковицы, егда благословив Ю Симеон, приложи глаголати к Ней: «И Тебе же Самой пройдет душу оружие». Еже слышавше Святая Дева, первее убо смутися о словеси сем, таже, яко раба Господня сущи, предаде Себе в волю Господню, зовущи Ему: Аллилуиа.

 

Икос 4

Слышаще Иосиф и Пречистая Матерь и Дева дивная проречения прозорливаго старца о Отрочате, чудяхуся о глаголанных о Нем. Мати же Его соблюдаше вся глаголы сия, слагающи в сердцы Своем. Темже и мы, пророческим дивнаго старца глаголом чудящеся, воззовем тепле ему таковая:

Радуйся, пророче Божий, пророческаго дара богатно исполненный. Радуйся, древних пророков удобрение и новых провидцев похвало.

Радуйся, яко страж верен, посреде двою Заветов, Ветхаго же и Новаго, на Божественней стражи поставленный.

Радуйся, отсюду мимошедшая и грядущая мира и рода человеческаго единым зрением ока соглядавый.

Радуйся, яко страж верен, неусыпне бдяй и стрегий, пришедшу Домовладыце Христу абие во сретение исшедый.

Радуйся, страсти Христовы еще Младенцу сущу Ему предуведевый и болезнь и тугу сердечную Матери Его предсказавый.

Радуйся, Симеоне, старче праведный, Богоприимче преблаженный.

 

Кондак 5

Боготечную звезду, предтечу Божественнаго света зрим тя, Богоприимче преблаженный. Сей бо, Егоже свет языком быти возвестил еси, возсия убо просвещение истины во всех языцех, от нихже и мы, светом Его просвещеннии, благодарне пети навыкохом Богу: Аллилуиа.

 

Икос 5

«Видесте очи мои спасение Твое, Владыко, еже уготовал еси пред лицем всех людей, свет во откровение языком и славу людей Твоих Израиля», - возопил еси, блаженне Симеоне, приемь на руку твоею Младенца Иисуса, Емуже мы ныне, со страхом и любовию покланяющеся, воспеваем ти, яко Богоприимцу и пророку, пения таковая:

Радуйся, всему миру, иудеем же и еллином, спасение во Христе уготованное проповедавый.

Радуйся, людем во тьме и сени смертней седящим, свету возсияти им предвозвестивый.

Радуйся, высокомерие иудеев, мнивших, яко тех точию есть Царствие Божие, уничиживый.

Радуйся, и языком спасение во Христе Иисусе благовестивый.

Радуйся, неверие ожесточенных иудеев предуведевый.

Радуйся, спасение верою во Христа избранных от иудеев же и язык предуказавый.

Радуйся, Симеоне, старче праведный, Богоприимче преблаженный.

 

Кондак 6

Проповедник богоносный пришествия Христова всем чающим избавления во Израили был еси, Богоносе Симеоне. Оттоле бо начаша людие Божии веровати, яко приблизися к ним Царствие Божие, веровавше же, пояху Богу: Аллилуиа.

 

Икос 6

Возсия Иерусалиму и всей земли Иудейстей просвещение истины светом благовестия твоего, праведный старче; се бо и праведная Анна пророчица, видящи на руку твоею Младенца Боголепна и та разумев Духом, яко Сей есть пришедый избавити Израиля, приступи в той час и исповедашеся Господеви и глаголаше о Нем всем чающим избавления во Иерусалиме. Приступим убо и мы очищенным сердцем и умныма очима, Богомладенца на руку старчу держима зряще, воспоим сему таковая:

Радуйся, яко первый сретил еси обетованного Царя Израилева, исперва пришедша во град Свой и в дом Отца Своего.

Радуйся, яко славу новаго Храма больши паче славы древняго первый узрел еси.

Радуйся, яко всем чаявшим избавления, чаянную ими утеху Израилеву яве указал еси.

Радуйся, яко возсияти звезде от Иакова и востати человеку от Израиля, якоже прорече Валаам, людем твоим благовестил еси.

Радуйся, яко благовестием твоим сердца уповавших возвеселил еси, малодушныя же и унывающия укрепил и утешил еси.

Радуйся, яко свидетельством твоим о Христе и нас ныне в вере и уповании утверждаеши.

Радуйся, Симеоне, старче праведный, Богоприимче преблаженный.

 

Кондак 7

Хотящу Симеону от нынешняго века преставитися прелестнаго, вдался еси яко Младенец тому, Владыко Господи, но познался еси ему и Бог совершенный; темже удивися старец неизреченному Твоему снисхождению, и радуяся, возопи: Аллилуиа.

 

Икос 7

«Дивны дела Твоя, Господи», - вопияше ветхий денми старец, ко Иже от него держимому Спасу мира, - «Аще бо и мнюся держати Тя яко Младенца, обаче не аз держу Тебе, но Ты держиши мя, яко Бог и Создатель всяческих, и, яко Владыка живота и смерти, держиши мя и в животе сем, ветха суща старца. Отпусти убо мя ныне, по глаголу Твоему с миром, яко видесте очи мои спасение Твое». Темже мирное от земных отшествие святаго старца славяще, воззовем к нему таковая:

Радуйся, яко клас зрелый пшеничный на землю, тако тихо старческую главу твою на ложе смерти склонивый.

Радуйся, яко путник дальним странствием утомленный, мирно сном смерти почивый.

Радуйся, многолетнее течение твое добре в вере и благочестии скончавый.

Радуйся, от временнаго сего жития в мире глубоце к вечному покою преставивыйся.

Радуйся, с надеждою скораго избавления от державы смертныя ко отцем твоим преселивыйся.

Радуйся, во уповании жизни вечныя дух твой радостно Господеви предавый.

Радуйся, Симеоне, старче праведный, Богоприимче преблаженный.

 

Кондак 8

Странно Бога Превечна, яко Младенца четыредесятодневна, на руку старчу держима зряще, удивимся неизреченному Того нас ради истощанию и ум на небеса вознесше, благодарне воззовем к Нему: Аллилуиа.

 

Икос 8

«Весь еси желание и желаний краю, Сладчайший Иисусе», - взываше праведный Симеон ко Иже во объятиях его носиму Избавителю мира, - «Обаче, узрев Тя ныне Бога Превечна, что восхощу прочее видети на земли? Отпусти убо мя ныне, раба Твоего, Владыко, да шед возвещу пришествие Твое во аде держимым узником, с верою Тебе ожидающим, яко да и аз купно с ними изведен буду во обители Царствия Твоего, идеже вижду славу Твою». Темже, блаженное преставление святаго старца поминаюше, прославим его сердцем и усты возносимыми пении сими:

Радуйся, благий вестниче Христов и во аде от века содержимым узником пришествие Его благовестивый.

Радуйся, надеждею скораго избавления души прародителей и праотцев возвеселивый.

Радуйся, купно с ними Христом Воскресшим, Победителем смерти и ада, из обителей мрака изведенный.

Радуйся, с сонмом избранных Божиих, в рай сладости, во обителех небесных водворенный.

Радуйся, к сонму святых царей, пророков и первосвященников ветхозаветных сопричтенный.

Радуйся, к блаженству святых Небесных Сил безплотных приобщенный.

Радуйся, Симеоне, старче праведный, Богоприимче преблаженный.

 

Кондак 9

Всякое колено небесных, и земных, и преисподних поклонится о имени Иисусове, и всяк язык исповесть, яко Господь Иисус Христос в славу Бога Отца. Веселися убо и радуйся, старче праведный, яко Сей есть, Егоже яко Младенца умаленна на руку твоею приял еси, и Емуже ныне, яко Богу, с лики безплотных Сил на небеси зовеши: Аллилуиа.

 

Икос 9

Ветия многовещанныя недоумеют изрещи велию славу твою, святый Богоприимче Симеоне, еюже прослави тя Христос Бог во Царствии славы Его. Предстоя бо близ Престола Святыя Троицы купно с Пречистою Богородицею и Предтечею Иоанном, со дерзновением молишися о всех с верою к тебе притекающих и просящих твоего заступления и помощи. Сего ради, славяще дивное прославление твое на небеси и на земли, вопием тебе таковая:

Радуйся, яко купно со святым Предтечею в неизреченней славе близ предстоиши Престолу Святыя Троицы.

Радуйся, яко Егоже на земли Младенца видел еси, Сего на небеси ныне со всеми святыми зря, радуешися.

Радуйся, яко со Христом, Егоже во объятиих твоих носил еси, ныне на небеси в вечней славе Его царствуеши.

Радуйся, яко с лики Ангелов на небеси, трисвятою песнию Его воспеваеши.

Радуйся, яко велие дерзновение имаши ко Господу, Егоже Младенца на руку твоея приемь, Бога исповедал еси.

Радуйся, яко весь мир христианский великаго предстателя и ходатая тя стяжа.

Радуйся, Симеоне, старче праведный, Богоприимче преблаженный.

 

Кондак 10

Спасти хотяй от заточения и уз преподобнаго Петра Афонскаго, яве предста ему Богоприимец в темнице со святителем Христовым Николаем, дивен видением, честен образом, в ветхозаветнаго священства ефод облечен, в руце же жезл златый имеяй. Темже удивися преподобный чудному видению сему, изведен же быв из темницы, радуяся, возопи Богу: Аллилуиа.

 

Икос 10

Царь Превечный, дивнаго отсюду ходатая и крепкаго заступника показа нам тебе, великий угодниче Божий Симеоне. Сам бо святитель Христов Николай, хотяй спасти преподобнаго, настави его прилежно вопити к тебе о заступлении и помощи, многомощен бо еси, глаголаше, у Бога и велие дерзновение имаши к Нему. Якоже убо преподобнаго Петра Афонскаго, представ, спасл еси, свободу и избавление от уз ему даровав, тако и нас, в бедах и обстояниих сущих, не укосни спасати предстательством твоим, да зовем ти:

Радуйся, теплый молитвенниче о всех с верою тебе призывающих.

Радуйся, скорый помощниче всех к твоему заступлению прибегающих.

Радуйся, яко великий во иерарсех святитель Христов Николай многомощнейша ко Христу Богу предстателя тя указа.

Радуйся, яко явлься со святителем Николаем преподобному Петру Афонскому, чудесне того от уз и темницы свободил еси.

Радуйся, яко сим его на стезю иноческаго жития наставил еси.

Радуйся, яко сим и нас в нуждах наших прибегати к твоему заступлению научил еси.

Радуйся, Симеоне, старче праведный, Богоприимче преблаженный.

 

Кондак 11

Пение умиленное приносит ти весь мир христианский, святый угодниче Божий Симеоне, великий же Новград славит тя, яко милостиваго избавителя своего от болезни и губительства смертнаго. Егда бо праведный гнев Божий постиже отцы наша и болезнь смертная нападе на ня, благоволи Бог явити люем Своим цельбоносную икону твою, благодать подающую исцелений всем с верою к тебе прибегающим, Богу же зовущим: Аллилуиа.

 

Икос 11

Светозарная свеща бывшим во тьме искушений и бед отцем нашим явися чудотворная икона святаго Богоприимца Симеона, паче чаяния надеждею спасения веселящи сердца их. Хотя бо спасти град от губительства смертнаго, предивно явися святый архиепископу Новгородскому Ионе, и повеле храм обыденный создати во имя его и ту святую икону его поставити, да источает исцеления людем, в покаянии с верою к ней прибегающим. Сего ради праведно слышит от нас святый чудотворец благодарственная пения таковая:

Радуйся, града нашего стено и утверждение.

Радуйся, от смертоносныя язвы и губительных болезней благонадежное ограждение.

Радуйся, от напастей и бед скорое избавление.

Радуйся, от враг видимых и невидимых мощное защищение.

Радуйся, во всех благих крепкое вспоможение.

Радуйся, о гресех наших теплое умилостивление.

Радуйся, Симеоне, старче праведный, Богоприимче преблаженный.

 

Кондак 12

Благодать неоскудных исцелений и источник неизсякаемых духовных даров и во грядущая людем оставити восхотев, Человеколюбец Господь дарова нам пречестную икону твою, святый Богоприимче Симеоне, от неяже, аки от Богоносных твоих рук, держащих Подателя всех благ Бога, мы ныне различная дарования приемлем, благодарне зовуще Ему: Аллилуиа.

 

Икос 12

Поюще, славим многомощное предстательство твое и крепкое заступление о нас, грешных, святый Богоприимче Симеоне. Воистину бо стена нерушима и покров державен еси граду и обители, в нейже от лет древних, яко звезда светозарная, возсия нам чудотворная икона твоя, к нейже припадающе и тепле молящеся, тебе со слезами взываем сице:

Радуйся, яко обитель тобою хранима утешается и радуется.

Радуйся, яко хотящия благочестно жити от искушений мира, плоти и диавола покровом твоим ограждаеши.

Радуйся, яко добре труждающимся помощник крепок являешися.

Радуйся, яко скорбящим утешение, болящим исцеление, малодушествующим успокоение молитвами твоими подаеши.

Радуйся, яко всяк в нужде ко святей иконе твоей прибегаяй, скорое утешение и благовременную помощь приемлет.

Радуйся, Богодарованное нам прибежище, надеждо, покров и заступление наше.

Радуйся, Симеоне, старче праведный, Богоприимче преблаженный.

 

Кондак 13

О великий угодниче Божий и Богоприимче Симеоне! Приими ныне малое сие, обаче от чистаго сердца приносимое тебе моление наше, и, яко многомощный предстатель ко Христу Богу, испроси нам оставление грехов и мирную кончину живота нашего, и вечныя молитвами твоими избави нас муки, о тебе вопиющих Богу: Аллилуиа.

 

(Этот кондак читается трижды, затем икос 1 и кондак 1)

 

 

Молитва

О великий угодниче Божий и Богоприимче Симеоне! При́зри на мя, грешнаго, ко святей иконе твоей припа́дающа и прося́ща твоего заступления и помощи. Скорбь бо обдержи́т мя от обстоя́щих мя ныне бед и зол, и утешения не и́мам многоболе́зненней души́ моей. Иска́х бо помощи от человек, и не обре́теся. Возопия́х ко Господу, и не услыша мя, зане́ прогневах пречистую благость Его беззаконьми моими и множеством многих грехов моих преогорчи́х человеколю́бную утробу Его. И кто ми ныне помощь яви́т, кто ми скорбь утоли́т, кто даст отраду и успокоение многомяте́жней душе́ моей? К тебе, великий угодниче Божий, прибегаю, грешный и недостойный аз, ве́дый, яко ве́лие дерзновение и́маши ко Христу Богу и многомо́щен предстатель еси о всех с верою к тебе прибегающих и твоего заступления и помощи требующих. Моли убо Человеколюбца Господа, яко да простив ми безчисленная моя прегрешения, не отвратит милость Свою от мене, но яко благ и сострада́телен, явит и мне безконечное Свое милосердие, и в лю́тем напа́стей и бед моих озлобле́нии подаст ми всесильную помощь Свою и преогорче́нней душе́ моей осла́бу, мир, укрепление, утешение и успокоение да́рует. Ей, великий угодниче Божий, вознеси Богоносныя ру́це твоя ко Иже во объя́тиих твоих носитися изво́лившему Христу Богу нашему, и моли благость Его, да не отринет моления сердца моего, недостоинства ради моего, но яви́т мне благовре́менне милость Свою, во славу безконечных щедрот Своих и многомо́щнаго предстательства твоего, о немже подобает Ему всякая слава и благодарение купно со Отцем и Пресвятым Его Духом, ныне и присно и во веки веков. Аминь.

 

  ЖИТИЕ

К какому колену принадлежит святой Симеон, где было его отечество и кто были его родители, - все это остается нам неизвестным. Знаем только, что он был праведен, благочестив и как один из семидесяти переводчиков Священного Писания, послан тогда вместе с другими в Александрию по просьбе Птолемея Филадельфа. Занимаясь там переводом Библии с еврейского языка на греческий, более всего был заинтересован следующим изречением пророка Исаии: "Се Дева во чреве примет и родит Сына, и нарекут имя Ему Еммануил». Изречением этим весьма смутилась мысль благочестивого Симеона и многими сомнениями была поколеблена вера его. Согласно древнейшему преданию св. Симеон, беседуя на обратном пути со своими спутниками, высказал по этому предмету свое сомнение и неверие. Когда же он дорогою переходил через какую-то реку, то, сняв перстень со своей руки, бросил его в реку, сказав: «Если найду его, то смогу поверить изречению пророка по букве». Основавшись на ночлег в одном селении, отстоящем недалеко от реки, он на другой день купил там рыбу, и когда по приготовлении ел ее вместе с товарищами, то чудным образом нашел во чреве рыбы брошенный им в реку свой перстень. Увидевши это, праведный Симеон был изумлен и очистил душу свою от всяких сомнений: тогда же было ему откровение от Ангела «не видети смерти, прежде даже не узрит Христа Господня».

Достигнув пределов Иерусалима, он поселился там и ежедневно по утрам посещал храм и с нетерпением ожидал исполнения бывшего ему откровения и той блаженной минуты, когда увидит Божественного Младенца. «А когда исполнились дни очищения их по закону Моисееву, принесли Его в Иерусалим, чтобы представить пред Господа, как предписано в законе Господнем, чтобы всякий младенец мужеского пола, разверзающий ложесна, был посвящен Господу, и чтобы принести в жертву, по реченному в законе Господнем, две горлицы или двух птенцов голубиных». Тогда, руководимый Духом Святым, праведный Симеон, увидавши родителей, принесших в храм Младенца Иисуса, принял в свои объятия Божественного Младенца, и воспевая и благословляя Бога, сказал: «Ныне отпущаеши раба Твоего, Владыко, по глаголу Твоему с миром: яко видеста очи мои спасение Твое, еже еси уготовал пред лицем всех людей, свет во откровение языков и славу людей Твоих Израиля».

 Благословляя же Иосифа и Марию, которые с удивлением слушали относившиеся к их Младенцу благословения, Симеон сказал им: «Се, лежит Сей на падение и на восстание многих в Израиле и в предмет пререканий. И Тебе Самой оружие пройдет душу, да откроются помышления многих сердец». После того, как увидел спасение Божие "еже, уготова пред лицем всех людей" и как благословил родителей Младенца,  праведный Симеон тотчас почил о Господе на 360-ом году своей жизни и был погребен в приготовленной им же могиле. Святые мощи его ныне почивают в храме его имени в Венеции. Память святого Симеона Православная Церковь празднует на следующий день после праздника Сретения Господня.

Святой Симеон Богоприимец - покровитель младенцев, ему молятся о сохранении их здоровья и благополучном разрешении трудных родов, а также о даровании чад безчадным родителям. .

 

По благословению

 митрополита Херсонского и Таврического Иоанна
Опубликована: 06.03.2016