День памяти:

19 ноября / 2 декабря

Тропарь, глас 1

Мира кра́сная и славу его оста́вль, прите́кл еси в пещеру, иде́же от силы преуспева́я в силу, был еси вождь Христова ста́да, всеславне Варлааме, еже яко упас до́бре, упаси́ и нас, молим тя, сохраняя от всех зол, да тя ублажаем.

Кондак, глас 2

Оте́ческаго преще́ния не устраши́лся еси, ласка́ниям того не повину́лся еси, ниже́ ле́стию низложи́лся еси́ же́нскою, всече́стне Варлааме, но непобедим от тех пребы́л еси, наде́яся на Господа своего, Емуже моли́ся о душа́х наших.

Кондак 1

Восхвалим, христолюби́вии лю́дие, ди́внаго угодника Божия, иже по́двигом добрым подвиза́вся и жития путь че́стне соверши́вше, игу́менства честны́й крест достойне поне́сл еси и Чашу спасения восприя́л еси, за еже умиленно воспеваем ти: Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Икос 1

От бесе́ды преподобнаго Антония теплою к Богу любовию, а́ки пла́менем, сердцу твоему распали́вшуся, блаже́нне, ра́достен, а́ки не́кое обре́т сокро́вище, в дом свой возврати́лся еси, предложе́ние же во́ли твоея́ при ногу́ достоблаже́ннаго отца оставил еси, и по времени паки к нему прите́к, вы́ну воспевал еси Богу славу житием твоим, суеты́ мирски́я отве́ргше прило́ги. Темже поем ти, отче, похвалы́ сицевы́я:

Радуйся, целому́дрие сохрани́вый.

Радуйся, любовь к Богу яви́вый.

Радуйся, упование на Христа всеце́ло возложи́вый.

Радуйся, преподо́бно на земли́ пожи́вый.

Радуйся, Господу житием своим угоди́вый.

Радуйся, достойным Царствия Его себе показа́вый.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 2

Свя́те отче Варлааме, разуме́в, яко сокро́вище у́мное сокрове́нно есть в пеще́ре святе́й, все принесе́нное тобою бога́тство и себе́ сама́го вдал еси Антонию и, яко доброразу́мный купе́ц, купи́л еси село́ то, на не́мже обогати́лся еси сим; те́мже тя и по смерти прославляем, ча́юще вечно пети с тобою Христу Богу: Аллилуия.

Икос 2

Ве́ка сего богатство, славу и суету́ всяку, се́ни скоропреходя́щей подо́бна быти, проразсуди́л еси, преподобне Варлааме; темже, вся во уме́ты вменя́я, да Христа Единаго приобря́щеши, возлюбил еси ше́ствовати к Нему и́ночествующих стезе́ю. Сего ради восхваля́ем тя, свя́те, зва́нии си́ми:

Радуйся, на Небеси со святыми пребыва́яй.

Радуйся, во бде́нии пребыва́ти нас наставля́яй.

Радуйся, молитвенно нас покрыва́яй.

Радуйся, в тяжких обстоя́ниих наш помощниче.

Радуйся, чтущих тя благодатный наставниче.

Радуйся, си́рых и немощны́х заступниче.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 3

Яря́шеся на тя во́инствующии супоста́ты, егда обле́клся еси в ри́зу спасения, и воздвиго́ша на тя отца твоего, Варлааме; ты же положи́л еси сердце твое в силе Господни, во еже пети Вседержителю Богу: Аллилуия.

Икос 3

Тепле́йшею любовию к Богу привя́зан быв, отче Варлааме, ангельскому житию неукло́нно поревнова́л еси; ну́ждею неразу́мнаго отца оде́ян быв в пресве́тлую оде́жду, попра́л еси ту́ в кал, вку́пе с нею попира́я го́рдаго врага, льстя́щаго различными су́етствы. Свет убо Божий незаходи́мый облиста́ сердце твое, тем не воззре́л еси на свет ле́стный, но, Бога Единаго предзря́ одесну́ю себе, Того славословил еси яко Человеколю́бца, преподобне. Молим тя, отче добропобе́дне, приими́ от нас песни хвале́бныя:

Радуйся, шле́м спасения прия́вый.

Радуйся, сердце свое пала́тою Духа Святаго сотвори́вый.

Радуйся, славословию Господа поревнова́вый.

Радуйся, наследником радости нетле́нныя ста́вый. 

Радуйся, спасению душ наших помога́яй.

Радуйся, на путь праведный нас направля́яй.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 4

Египта мы́сленнаго и се́ти ловя́щих избавитися хотя́ще, Варлааме, Христо́м на служение святое избра́нный, пребы́л еси три дни а́лчен, молитвою то́кмо душу пита́я и глаголя с проро́ком: от тли сея́ возведи́ мя, Боже, и аз про́чая ле́та истинным духом поживу́ Тебе, поя́ неле́ностно: Аллилуия.

Икос 4

Мира скоропреходя́щую суету́ и славу тле́нную в уме́ты вменя́я, да Христа Единаго приобря́щеши, возлюбил еси ше́ствовати к Нему и́ночествующих стезе́ю. Оте́ческия трапе́зы не вкуси́л еси, но, очи́ма до́лу зря́, ум возводи́л еси к высоте, размышля́я трапе́зу Небеснаго Царя, ю́же сне́дию и́маши во Царствии Небеснем, иде́же слы́шиши, Варлааме, песни похвальныя, от земноро́дных ти приноси́мыя:

Радуйся, яко на земли́ имя твое прославляется.

Радуйся, яко сла́достию Небесною наслажда́ешися.

Радуйся, благочестием себе украси́вый.

Радуйся, в сосу́д благоуха́нный душу твою обрати́вый.

Радуйся, яко со Ангелы Господа воспеваеши.

Радуйся, яко в ли́це преподобных пребываеши.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 5

Варлааме целому́дренне, равноа́нгельнаго жития возжела́в, не возше́л еси на ло́же обру́чницы твоея́, и се́рдца не уклони́л еси в словеса́ лука́вая, внима́я рече́нным: во славе преподобнии возрадуются на ло́жах своих, ихже ныне ты причастник и наследник еси, бла́же, и поеши Христу чистым гласом: Аллилуия.

Икос 5

Антония преподобнаго со святыми, су́щими в пещере, молитва о тебе, Варлааме че́стне, бе приле́жна, и сия преклони́ сердце отца твоего на милость, иже сожале́ о терпении твоем и, любе́зно тя целова́в, отпусти́ с миром во святую пещеру подвиза́тися. Сие же бысть, ибо воззва́ша праведнии, и Господь услы́ша их, и тя изба́ви от печали. Мы же, благодатных утешений ча́юще, поем ти песни сицевы́я:

Радуйся, Божественнаго избрания сосу́де благословенный.

Радуйся, силою Вышняго осене́нный.

Радуйся, Господа от юности возлюби́вый.

Радуйся, веру и любовь в сердце своем возрасти́вый.

Радуйся, целому́дрие души́ своея́ сохрани́вый.

Радуйся, смирение великое стяжа́вый.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 6

Разумом, просвеще́нным от Господа, испо́лнен быв, преподобне Варлааме, не попусти́л еси страсте́м в души́ твоей воцари́тися, силою Божиею вся хи́трости тле́ннаго и вре́меннаго жития отража́я, Царю Христу воспевая вы́ну: Аллилуия.

Икос 6

Ласка́ниям оте́ческим не повину́лся еси, ниже́ преще́ния того́ устраши́лся еси, ниже́ ле́стию низложи́лся еси женскою, всече́стне Варлааме, но непобедим от тех пребыл еси, наде́яся на Христа, Господа своего, Ему́же мо́лишися с любовию о душа́х наших. Темже, усе́рдие твое похваля́юще, вопие́м ти́:

Радуйся, тле́нная и вре́менная мира сего презре́вый.

Радуйся, от Господа дар чудотворения получи́вый.

Радуйся, поста и воздержания хранителю.

Радуйся, молитвы и благочестия рачи́телю.

Радуйся, врага злоко́зненнаго низложи́вый.

Радуйся, на земли́, яко на Небеси пожи́вый.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 7

Антоний, мона́шескаго жития в земли́ нашей начальник, терпению твоему удиви́ся, яко с лю́тым велиа́ром боря́ся, блаженне Варлааме, не устрашился еси многоплете́нных его ко́зней, и́миже аще и запя́т  был еси, но терпением и смирением победил еси миродержи́теля зла́го, победно воспевая Богу: Аллилуия.

Икос 7

Ангельскую чистоту, простоту и величие души́ твоея ве́дуще, Варлааме досточу́дне, егда братии двунадеся́тице собра́вшейся в пещере святей, преподобный Антоний поста́ви тя им игу́меном по себе. Темже жезл с че́стию  восприя́л еси, отче, и, кроме́ нача́льствования, еще бо́лее пре́жняго труды на ра́мена своя подъя́л еси, Пастыренача́льнику Христу Богу угожда́я. Сего ради приими́ от нас зва́ния сицева́я: 

 Радуйся, от па́губных ересе́й отвраща́яй.

 Радуйся, о́чи наша душевныя просвеща́яй.

 Радуйся, от ко́зней вра́жиих защитниче.

 Радуйся, на Страшнем Суде заступниче.

Радуйся, милостей от Бога хода́таю.

Радуйся, у Престола Господня предста́телю.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 8

Моего живота́ дре́во, грехами гнию́щее, окропи́ благодати росо́ю, блаженне Варлааме, яко да поне́ ма́лыя возрасту́т ве́тви, и принесу Богу кра́сен  смирения и молитвы плод, зовы́й Ему́: Аллилуия.

Икос 8

Еже видев дарования твоя, отче Варлааме, Антоний вождя́ тя  вместо себе поста́ви братии, и был еси ты добр пастырь отце́м. Якоже бо сам никогда́же не изменил еси правила твоего, тако и братию нака́зовал и молил еси имети тща́ние о спасении и прилежа́ти о души́ безсмертней, да насле́дие радости вечныя и́мут; темже людие православнии со умилением зовут ти сицева́я:

Радуйся, яко Ангелы труды твоими возвеселил еси.

Радуйся, яко диавола подвигами твоими посрамил еси.

Радуйся, добрый учителю и́ночествующих.

Радуйся, крепосте в подвизех бо́дрствующих.

Радуйся, вражиих стрел прогонителю.

Радуйся, диавольских наве́тов разорителю.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 9

Душу твою, преподобне, любве́ Христовы сладким желанием уязви́в, целому́дрием сию украси́л еси светло, мы́сленнаго же Иерусалима ища́, стра́нствовал еси к чу́вственному, всякия труды в пути́ Христа ради терпя́, Егоже Жизнопода́тельный Гроб благоговейно целова́в, возвратился еси в обитель Киево-Печерскую, пою́щи: Аллилуия.

Икос 9

Иерусалима Небеснаго граждани́ном быти жела́я и Го́рняго оте́чествия взыску́я, отче Варлааме, девство и монашество богатству временному и сла́достям тле́ннаго жития предпоче́л еси. Темже молим тя усердно: от земных нас отврати и даждь Го́рняя искати, тебе праведно поюще похвалы́, яко угоднику Божию и благодати стяжа́телю, си́це:

 Радуйся, в любви к Богу пламене́вый.

 Радуйся, Небесных благ возжеле́вый.

 Ра́дуйся, праведности нас науча́яй.

 Радуйся, любити Бога и ближняго своего на́с наставля́яй.

Радуйся, арома́ты райскими благоуха́яй.

Радуйся, в славословии Троицы Святыя ныне пребыва́яй.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 10

Варлааме, отче наш честны́й, Невече́рнему Свету со Ангельскими чи́ны убо ныне предстои́ши, и нас во свете заповедей Господних ходити молитвами твоими упра́ви, во еже ку́пно с тобою, преподобне, пети Христу Богу: Аллилуия.

Икос 10

Еже заповедал еси пред последним своим издыха́нием, отче  Варлааме, вскоре испо́лнено бысть: повеление твое, иконы, яже в Царьгра́де для обители Киево-Печерския приобре́тенныя, в ру́це преподобнаго Феодосия вда́ти, соверши́ся до́бре. Ты же с миром почил еси в  Бозе, ну́жды монастырския отечески па́мятствуя. Сего ради приими́, отче блаженне, от христиан боголюби́вых песни таковы́я:     

Радуйся, отеческаго попече́ния о братии не прекрати́вый.

Радуйся, самоизво́льным твоим страданием Ангелов удиви́вый.

Радуйся, много от напа́сти лукаваго с терпением пострада́вый.

Радуйся, демонския ко́зни подвигом обличи́вый.

Радуйся, чисту душу твою Богови предста́вивый.

Радуйся, и по смерти телесней молитвы не оста́вивый.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 11

Направлением твоим, отче Варлааме, обурева́емое прило́гами сопроти́вных, многоско́рбное житие наше невре́дно сохрани, и райскаго селе́ния даждь доспе́ти, иде́же праведницы сияют, яко свети́ла, поюще Богу: Аллилуия.

Икос 11

Блаженное отшествие твое на Небеса радости верных исполняет, пречудне отче Варлааме, яко хода́тая и заступника обретаем тя пред Богом. Поем славное житие твое и ублажаем тя, яко угодника Божия и дивнаго чудотворца. Ты же, свя́те, присно поминай нас, совершающих любовию память твою и со умилением зовущих ти такова́я:

Радуйся, усердный о нас молитвенниче.

Радуйся, обидимых крепкий заступниче.

Радуйся, доброде́тельнаго жития учителю.

Радуйся, немощны́х иску́сный целителю.

Радуйся, в любви к Богу пламене́вый.

Радуйся, Небесных благ возжеле́вый.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 12

От Истиннаго Света озаря́емый, светоза́рный светильник сущим на земли́ являешися, преподобне отче Варлааме, сердца́ бо верных просвещаеши и к ра́зуму Божественному вся наставляеши, да со умилением зовут Христу Спа́су: Аллилуия.

Икос 12

Град Константи́нов посетил еси, преподобне, и отше́л еси душею во всесветя́щийся град Царя Небеснаго, мощи же своя оставил еси во обители Зи́мненския Святыя горы́, ихже заповедал еси пренести́ в пещеру, иде́же и лежат ныне нетле́нны, точа́щия источник чудес приснотеку́щий. Услыши смиренный глас верных, отче Варлааме, и, Богу предстоя́, присно поминай нас, совершающих любовию память твою и зовущих ти та́ко:

Радуйся, в Ближних пещерах моща́ми своими почива́яй.

Радуйся, Невече́рнему Свету душею предстоя́й.

 Радуйся, венец безсмертия от Бога прия́вый.

Радуйся, истинному служению Богу на́с науча́яй.

Радуйся, сердца́ наша радости исполня́яй.

Радуйся, жажду духовную благодатию утоля́яй.

Радуйся, святый отче Варлааме, с преподобными отцы Печерскими в радость Господа Иисуса Христа вше́дый.

Кондак 13

О предивный и всехвальный угодниче Христов, игу́мене обители Киево-Печерския, преподобне отче Варлааме! Приими́ сие малое моление, от усердия нашего в похвалу тебе приноси́мое, и покрый молитвами твоими всех притекающих к тебе с верою и любовию, да покаяние наше прия́вше, Господь и Бог наш прости́т нам вся грехи наша и соприча́стники Царствия Своего соделает, да вы́ну с тобою и со всеми святыми воспеваем Ему: Аллилуия.

(Этот кондак читается трижды, затем икос 1 и кондак 1)

МОЛИТВА

О священная главо, преподобне отче Варлааме! Ты еси обители Киево-Печерския похвало и верных во Святем Православии утверждение! Подвигом добрым подвиза́вся на земли́, игу́менский жезл че́стне проне́сл еси и на Небесех восприя́л еси венец правды от Христа Бога нашего. Темже, на твой святый образ взира́юще, о преславнем жи́тельстве твоем умиляемся и чтим святую память твою. Почитающе же твое целому́дрие, ревность в по́двизех, многия добродетели, во славу Божию сотворе́нныя, и ве́лие дерзнове́ние пред Господем, со смирением молим тя, преподобне: воззри́ убо благосе́рдым о́ком любве́ твоея на нас, недостойных, и потщи́ся богоприятным твоим хода́тайством испросити у Царя ца́рствующих и Господа госпо́дствующих, да проба́вит великия и богатыя милости Своя на нас, грешных, да подаст нам дух пра́выя веры, дух любве́, мира и радости о Ду́се Свя́те, да избавит нас от всяких бед и напа́стей, да низпо́слет вся полезная ко спасению душ наших. Е́й, свя́тче Божий, не посрами́ упования нашего, еже на тя по Бо́зе и Богородице возлагаем, но буди нам помощник и покровитель во спасение, да сподобимся скончати житие наше в покаянии и восприи́мем вечная блага́я во Царствии Христа Бога нашего, и прославим человеколю́бие Отца и Сына и Святаго Духа, и твое святое заступление, ныне и присно и во веки веков. Аминь.

ЖИТИЕ

Преподобный Варлаам - первый игумен Киево-Печерского монастыря. С молодых лет часто посещая преподобного Антония Печерского и с любовью слушая его наставления, он так увлекся монашеской жизнью, что решил сам стать иноком. Преподобный Антоний принял благочестивого юношу, твердо решившего стать монахом, и велел преподобному Никону совершить над ним иноческий постриг.

Этим возбудил Варлаам против себя гнев отца, но твердость духа, проявленная молодым юношей, заставила отца уступить желанию сына.

Когда число иноков в пещерах стало возрастать, преподобный Антоний поставил преподобного Варлаама игуменом, а сам переселился в другую пещеру и опять стал жить в уединении. Испросив благословение преподобного Антония, игумен Варлаам построил над пещерой деревянную церковь в честь Успения Пресвятой Богородицы. Впоследствии преподобный Варлаам по желанию великого князя Изяслава стал игуменом нового созданного монастыря в честь великомученика Димитрия.

Дважды преподобный Варлаам совершал паломничество к святым местам Иерусалима и Константинополя, как по личному влечению, так и для блага Церкви. На обратном пути из второго путешествия он скончался во Владимирском Святогорском монастыре на Волыни в 1065 г. и был погребен, согласно завещанию, в Печерской обители, в Ближних пещерах.

По благословению 

митрополита Херсонского и Таврического Иоанна