Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на НОЯБРЬ

Молитва о мире в Украине

Томос о даровании Украинской Православной Церкви самостоятельности в управлении

Обращение Патриарха к министру юстиции по вопросу независимости УПЦ

Официальные документы Украинской Православной Церкви относительно ситуации в нашей стране

V ВСЕУКРАИНСКАЯ КОНФЕРЕНЦИЯ РУКОВОДИТЕЛЕЙ ЕПАРХИАЛЬНЫХ ОТДЕЛОВ УКРАИНСКОЙ ПРАВОСЛАВНОЙ ЦЕРКВИ ПО ДЕЛАМ СЕМЬИ

30 ноября 2017 года в конференц-зале Херсонской епархии (ул. Преображенская, 36) состоится семинар по основам социального служения для священнослужителей, волонтеров и социальных работников храмов

Благотворительная акция «ПОДАРИ ПОДАРОК СИРОТЕ»

В рубрике "Акафисты" размещен Акафист святителю ДИМИТРИЮ РОСТОВСКОМУ, изданный в ноябре в Херсонской епархии

Акафист мученику архидиакону ЛАВРЕНТИЮ

 

День памяти:
 
 
23 августа (н. ст.)
 
 
 
Тропарь, глас 8

Серафим во плоти явился еси, Лаврентие, огнем бо Божественныя любве распаляем, ярящийся огнь мучителя ни во чтоже вменил еси и угасил еси того ревность безбожную, темже и венец победоносен о имени и страдании твоем от Христа приял еси мужественно, сего ради победительно взываем тебе: радуйся, мучениче непобедимый Лаврентие.

 

Кондак, глас 2

Огнем Божественным распалив сердце твое, огнь страстей до конца испепелил еси, страдальцев утверждение, богоносе мучениче Лаврентие, и в страданиих вопиял еси верно: ничтоже мя разлучит любве Христовы.

 

Кондак 1

Избранный страстотерпче и угодниче Христов Лаврентие, архидиаконе и непобедимый во страданиих мучениче, песньми похвальными величаем тя, нашего в бедах заступника, выну предстоящаго златозарному Престолу Царя Славы. Ты же, яко огнем мучений вшедый в покой небесный, от огня страстей и скорби всякия свобождаяй нас, во уповании тебе взывающих: Радуйся, непобедимый мучениче архидиаконе Лаврентие.

 

Икос 1

Архангелов и Ангелов чины, Серафимов и Херувимов собори и всех горних безплотных Сил сонмы вельми удивишася толикому мужеству твоему, мучениче Лаврентие, яко в немощнем телеси человечестем безплотных Сил явил еси образ, огнем бо на железнем одре жегомый и испекаемый, всесожжение живыя жертвы Христу был еси. Сие пачеестественное и страшное для единаго помысла человеческаго терпение точию воспоминающе, содрогаемся и от всего сердца воспеваем тако:

Радуйся, великий мучениче, огнем и железом к небесному покою пришедый.

Радуйся, во архидиаконстем чине служащий совершению Безкровныя Жертвы и сам всего себе в жертву Христови принесший.

Радуйся, адаманте, ничимже одолеемый и непобежденный.

Радуйся, каменю веры, на недвижимем основании заповедей Господних утвержденный.

Радуйся, егоже подвигом дивяшеся горния Силы.

Радуйся, егоже дивному терпению содрогаются человеческая множества.

Радуйся, непобедимый мучениче архидиаконе Лаврентие.

 

Кондак 2

Видя святейший первосвятитель Римския церкви богомудрый Сикст твое велие дерзновение о Господе, святый мучениче Лаврентие, возлюби тя, архидиакона своего, и, прославляя Господа, возложи на тя попечение о дому Божием, о нищих и убогих чадах Божиих, о всех скорбящих и озлобленных, милости Божия и помощи требующих, и имея тя добраго делателя во храме святыни Господней, радовашеся духом, научая и нас воспевати о тебе Благодателю нашему Богу: Аллилуиа.

 

Икос 2

Разум богопросвещен имея, о доблий исповедниче Христов Лаврентие, и мира сего сладости презрев, устремился еси во след страждущаго учителя твоего, святаго Сикста, и к нему от всея любящия души твоея взывал еси: «Камо, отче, без сына грядеши? Камо, о архиерею святый, спешиши без архидиакона твоего? Ты никогдаже без мене приносил еси Жертву, что во мне неугодно явися отеческой твоей милости? Еда ли не искусил мя еси угодна быти тебе служителя? И аще общник бых тебе в действии Божественных Таин Христовых, почто и во излиянии за Христа крове не общаюся тебе? Поими мя, отче, с тобою, сына твоего, поими, учителю, ученика твоего и даждь мя пред тобою в жертву Богу, якоже Авраам сына Исаака и яко верховный апостол Петр перваго архидиакона Стефана, и узрев мя совершившася мученичеством, сам послежде к венцу потщишися». Таковой любви твоей, мучениче Христов, дивящеся, умиленно вопием ти похвальная:

Радуйся, любовь к миру любовию Божиею в себе победивый.

Радуйся, крепчайшую паче огня оную любовь явивый.

Радуйся, возлюбивый всем сердцем, всею душею, всею мыслию, всем разумом Христа - Небеснаго Учителя и Пастыреначальника.

Радуйся, такожде возлюбивый и земнаго пастыря - отца, первосвятителя твоего и наставника.

Радуйся, яко святая душа твоя, серафимскою любовию пламенеющая, по апостолу, вся любит, всему веру емлет, вся уповает, вся терпит.

Радуйся, таяжде апостольския глаголы в себе вместивый, яко любы николиже отпадает.

Радуйся, непобедимый мучениче архидиаконе Лаврентие.

 

Кондак 3

Силою Всевышняго укрепляеми, святии мученицы дерзновенно проповедаху Света истиннаго Христа, Имже просвещаеми, ко славе небесней устремишася: глаголаше бо Сикст святый диаконом и соузником своим Феликиссиму и Агапиту: «Братия и своенственники мои, не убойтеся мук временных; весте, кая мучения претерпеша прежде нас святии, да получат венец вечныя жизни; Сам Христос Бог наш остави нам образ. Не убойтеся убо пострадати за Христа, да с Ним воцаритеся». Сему убо исповеданию внемля и ты, великий страдальче Лаврентие, к достижению небесных чертогов устремился еси, воспевая сам и нас воздвизая пети вся промышляющему о нас Богу: Аллилуиа.

 

Икос 3

Имеет весь мир христианский молитвенницы о себе святии мученицы, радостию просвещается о сем, и тебе, великий страдальче Христов Лаврентие, прославляя, воздвизает храмы имени твоему, покланяется иконам лика твоего, ведуще тя, яко усерднаго печальника и заступника, и в похвалу сицевая тебе вопиет:

Радуйся, земный ангеле и небесный человече.

Радуйся, мужу деланий святых.

Радуйся, великий во страданиих, крепкий в терпении, мужественный в скорбех.

Радуйся, мощный силою десницы Господней, дивный в подвизех, славный в родех родов.

Радуйся, имже красуется доблественный мученический полк.

Радуйся, егоже непобедимому терпению дивятся Ангельския горния Силы.

Радуйся, непобедимый мучениче архидиаконе Лаврентие.

 

Кондак 4

Бурею ярости на имя Христово дышуще, невернии людие устремишася на христианы, во еже предавати их мукам лютейшим, растерзанию зверьми, усечению мечному и огню. Ты же, мучениче, паче оных лютейшую смерть приял еси, испечен быв огнем, аки брашно печеное, на снедь кровожадным людем, зверское существо имущим; обаче сила вражия ничтоже успе, любовию бо ко Христу пламенея, взывал еси со апостолом: «Кто ны разлучит от любве Божия? Скорбь ли, или теснота, или гонение, или глад, или нагота, или беда, или меч? Якоже есть писано: яко Тебе ради умерщвляеми есмы весь день, вменихомся, якоже овцы заколения. Но о сих всех препобеждаем за Возлюбльшаго ны». Сию убо велию любовь имети испроси и нам, угодниче Божий, научая воспевати Подвигоположнику: Аллилуиа.

 

Икос 4

Слышавши Сикст святый твоя любовию понуждаемыя глаголы и духом провидя будущая, сице отвещаше тебе: «Не оставляю тя, о чадо, но на множайшия муки блюду тя, предлежат бо тебе большия подвиги за веру Христову. Аз, яко стар, на легчайшее исхожду борение, тебе же подобает славнейшее показати над мучителем одоление и торжество; не плачи убо, но веждь, яко по триех днех скончания нашего, пойдеши, левите, за своим священником; не потребно есть тебе присутствия моего, аки бы каковыя помощи: Илия остави Елисея, но не отъя ему чудодейственныя силы. Иди тем временем и церковная сокровища раздаждь нищим и требующим - по твоему разсмотрению». Сие обетование и волю архиерея своего слышавше, ты, яко послушлив архидиакон того, велиим тщанием устремися, да сотвориши сия, поучая нас взывати тебе:

Радуйся, любве и веры ради в Господа и послушания архипастырю, к мучениям устремивыйся.

Радуйся, в путь узкий шедый и прискорбный, и крест, яко ярем, вземший, Христу последовавый.

Радуйся, надеждою вечнаго покоя водимый, к борению мужественно притекший.

Радуйся, славы вечныя осияния паче земных сластей вожделевший.

Радуйся, обещание лютейших мук, яко райския утехи сладость, из уст учителя твоего услышавый.

Радуйся, яко обетованием тем утешивыйся и возвеселивыйся.

Радуйся, непобедимый мучениче архидиаконе Лаврентие.

 

Кондак 5

Чудо велие помощию силы Божия, действующия в тебе по крепцей любви твоей ко Христу, сотворил еси, славный страстотерпче Христов, егда по скончании словес архипастыря твоего и учителя ты, святый Лаврентие, якоже повествует житие твое, «вся церковная утвари и сокровища взем, искаше по всему граду крыющихся клириков и убогих христиан и, еликих обреташе, даяше им на нужныя потребы», и тако, исцеляя вся недужныя очима и главою, чудотворец явился еси дивный во славнем житии твоем; темже и по кончине святыми мощами своими и дивными чудотворящими иконами целиши всякия недуги ко твоему заступлению вседушно притекающих, Богу же, Подателю всякия милости, поющих: Аллилуиа.

 

Икос 5

Узре свет слепый Крискентион, емуже ты, помолившеся, рекл еси: «Господь наш Иисус Христос, отверзый очи слепорожденному, Той да просветит тя!», и сотворив, якоже глаголет житие твое, «крестное знамение на очесех слепаго, и абие той прозре, и виде лице Лаврентиево, и возрадовася». Сие бяше в дому Наркисса христианина; пред сим же, абие по речении Сикста святаго, пришедый в дом вдовы Кириакии, к горе Хелион нарицаемой, идеже мнози христианы собрашася, исцелил еси тую от болезни главы чрез возложение рук твоих и речение: «Во имя Господа нашего Иисуса Христа буди здрава!»; учредив убо довольны христианы тамо, такожде и в дому Наркисса сущия, пришел еси в пещеры Непотиановы, несый крыющимся тамо христианом «яже на пищу и иныя потребы», идеже бо собрани быша душ яко седмьдесят и три, с нимиже обрет и пресвитера Иустина. Мыслию убо и любовию сретая тя на сем пути твоем, возглашаем тако:

Радуйся, страннолюбче, нищим и убогим богатства церковная истощивый.

Радуйся, церковная имения спасая от неверных хищения, Церкви живой - убогим вручивый.

Радуйся, сокровищами земными небесное сокровище - славу святых приобретый.

Радуйся, нищих и убогих, в беде сущих, теми сокровищами препитавый.

Радуйся, руками убогих богатство тленное в приобретение нетленных сокровищ предпославый.

Радуйся, за страннолюбие и страдания венец нетления стяжавый.

Радуйся, непобедимый мучениче архидиаконе Лаврентие.

 

Кондак 6

Проповедницы истины богоноснии мученицы святии сквозе огнь и воду внидоша к небесному покою, о нихже глаголати подобает словесы апостольскими, яко сии страстотерпцы велиими и неисчислимыми муками умучени, «камением побиени быша, претрени быша, искушени быша, убийством меча умроша, ихже не бе достоин весь мир». Темже убо и мы, по сему глаголу апостолову, «толик имуще облежащ нас облак свидетелей, бремя всякое отложше и удобь обстоятельный грех, терпением да течем на предлежащий нам подвиг, взирающе на начальника веры и совершителя Иисуса», Емуже с веселием, от всего сердца нашего возопием: Аллилуиа.

 

Икос 6

С светлым лицем представ судилищу Декиеву, святе Лаврентие, радовался еси грядущему венцу мученическому паче венца мирския славы, и вопрошаем от него быв: «Где суть сокровища церковная?», - ничтоже отвещал еси безумному, подобяся Подвигоположнику Христу Богу, Иже не даде ответа вопрошавшему Его Ироду. Разгневася убо Декий, вдаде тя Валериану епарху, тойже в темницу заключи тя, идеже ты слепыя многия исцелив, подвизаеши всех верных взывати тако:

Радуйся, врачу телесных немощей.

Радуйся, ходатаю горних чертогов.

Радуйся, слепоту телесную именем Христовым исцеляяй.

Радуйся,  слепоту душевную познанием истиннаго Бога отгоняяй.

Радуйся, истины Христова учения среди мглы неверия и безбожия прекрасный проповедателю.

Радуйся, света Евангельскаго во тьме и сени смертней безбожия седящим великий показателю.

Радуйся, непобедимый мучениче архидиаконе Лаврентие.

 

Кондак 7

Мира дольняго красоту, богатство и славу земную оставил еси, непобедимый воине Христов, мучениче архидиаконе Лаврентие, и к небесным горним селениям лютою стезею мучений мужественне востекл еси, идеже предстоя Престолу Господа Славы с лики Ангельскими, поеши Ему победную песнь: Аллилуиа.

 

Икос 7

Егда узре Ипполит, начальник темницы, исцеленнаго тобою слепаго узника Лукиллия, егоже и крещением просветил еси, и иныя многия слепцы приходившия к тебе, яко ты, по словеси жития твоего, «призывая имя Иисус Христово и руку с знамением крестным на очеса их возлагая, творяше их прозрети», сим убо дивяся, обаче не оставляя и заблуждения неверных, испытоваше тя: «Покажи мне сокровища церковная»; к немуже ты, мучениче, рекл еси: «О Ипполите, аще веровати будеши в Бога Отца всесильнаго и в Сына Его Господа Иисуса Христа - показано тебе будет сокровище и жизнь вечная дастся ти». Посем убо, изведен быв из темницы в дом Ипполитов и, огласив его, крести; просвещен же быв Ипполит крещением, рече: «Видех души неповинныя в велицей радости», якоже повествует житие, - «то бяху сокровища, о нихже Лаврентий ему извествоваше, яко будут откровенна, в час бо крещения показа ему Господь дивным видением небесная радования». Сим обрадован Ипполит быв, приведе ко Христу весь дом свой; от негоже похваляемый, мучениче, такожде и от нас приими сия:

Радуйся, великий мучениче, апостоле и проповедниче.

Радуйся, скорый врачу, крестителю и исповедниче.

Радуйся, в мучениих сущий, проповеди Христовы не оставивый.

Радуйся, с венцем мученика звание апостола вместивый.

Радуйся, устремляяйся к мукам, дела проповедания не оставивый.

Радуйся, и самыя мучения в живую проповедь славы Христовы обративый.

Радуйся, непобедимый мучениче архидиаконе Лаврентие.  

 

Кондак 8

Сокровищем земным прилежа, Валериан мучитель истязаше тя, святый Лаврентие, емуже ты и обещал еси показати сокровища: «Даждь ми время на два, или три дни и аз покажу ти сокровища». Отпущенну же бывшу ти из темницы и извещенну бывшу о сем Декию Царю, ты, мучениче, собрал еси множество нищих, и вдовиц, и сирот, и слепых, и хромых, и немощных в дом Ипполитов. По триех же днех, приведши оных пред лице Декия и Валериана, воззва к ним: «Се имате сокровища вечная в тех, ихже зрите сосудех вложенная, и кто имения своя в тыя сосуды влагает - приемлет оныя с лихвою в Небеснем Царствии». Даждь убо и нам молитвами твоими, святый мучениче, сокровища наша земная, тленная без сожаления влагати в таяжде честныя сосуды, чающе небеснаго воздаяния и поя Богу песнь хвалы: Аллилуиа.

 

Икос 8

Видяще царь Декий и Валериан епарх себе постыжденных, разгневашася зело и уже не о сокровищах тебе, святый мучениче, истязоваху, но к поклонению идолом привлекаху; биему убо нещадно и устрашаему разновидными орудии мучений тебе бывшу, взывал еси Декию: «О окаянне, всех сих аз давно желах, аки пиршества: то бо вам видятся быти мучения, нам же - слава»; повелевающу же мучителю, да приведеши на пиршество сие вся христианы, глаголаше: «Недостойна суть скверная очеса ваша видети тех, ихже имена написана суть на небесех». Биему же паки, и опаляему, и молящуся ти уже о исходе души твоея, слышашеся глас с небесе: «Еще множае страдати имаши!», егоже аще слышаху невернии, но не можаху уразумети откуду есть, паки лютейшия муки приложиша, ихже мы воспоминая, благоговейно тебе вопием:

Радуйся, биение за Христа, нас ради биеннаго и страдавшаго, приемый.

Радуйся, душу твою положивый за Господа и вечную жизнь обретый.

Радуйся, узким путем страданий вшедый в покой небесный.

Радуйся, опаляемый огнем, угасивый вечный огнь геенский.

Радуйся, яко непрестанно в муках моливыйся, тем подражая в Гефсимании и на Кресте молившемуся Господу.

Радуйся, непрестанно в молитве и любви пламеневый, даждь и нам сей дар молитвы ко Творцу всея твари.

Радуйся, непобедимый мучениче архидиаконе Лаврентие.

 

Кондак 9

Всею душею твоею возлюбив Господа, Егоже и посреде лютых мучений, яко среди веселия, великий в мученицех Лаврентие, непрестанно прославлял еси; темже и Христос знамение силы Своея являше на тебе, посылая Ангела Своего, егоже виде един от воин, именем Роман, возопи: «Святый Лаврентие, вижду юношу пресветла при тебе стояща и лентием отирающа язвы и все тело твое. Заклинаю убо тя Христом Господем, пославшим тебе Ангела Своего, не остави мене». Сему дивному знамению мучители не восхотеша внимати, волшебством оное разумея, и заключиша тя паки в темницу, идеже ты, крестив Романа, уготова его на подвиг мучения; он же, приклонив выю свою под меч острый, взываше, якоже и ты, радостно Господу песнь хвалы: Аллилуиа.

 

Икос 9

Вития многовещаннии не возмогут изобразити и уразумети лютейшия муки, егда, якоже глаголет житие твое, великий Лаврентие, «принесен бысть одр железный, и на том положиша мученика нага пред Декием и Валерианом, и углие огненное подложиша, железными же вилами слуги сверху пригнетаху на одре том тело мучениково и поджигаху, пекуще, аки снедное мясо». Сие страдание твое точию воспоминая, содрогаемся, и прилежно приносим ти похвальная песни сия:

Радуйся, на огни испекаемый и жегомый, огнь страстей палящий ны утоли молитвами твоими.

Радуйся, на одре железном возлегий, от одра лености предстательством твоим возстави нас.

Радуйся, лютыя страсти терпевый великодушно, от страстей облежащих ны исхити.

Радуйся, страданиями небрегий да вечную славу приобрящеши, тоя же славы улучити и нам умоли.

Радуйся, телесными скорбями вшедый в горняя обители, и нам помози оных достигнути.

Радуйся, высоту терпения показавый, узкий и прискорбный путь терпения в житии сем нам облегчи.

Радуйся, непобедимый мучениче архидиаконе Лаврентие.

 

Кондак 10

Спасти хотя душу твою, о телеси твоем небрегл еси, принося себе в жертву Господу, якоже и глаголал еси мучителем твоим: «Аз принесох мене самаго жертву Богу моему в воню благоухания в дусе сокрушенном», и егда мучителие разжигаху вельми одр, паки рекл еси царю: «Виждь, окаянне, яко углие то огненное мне прохладу готовит, тебе же - вечныя муки: весть бо Господь мой, яко о святем имени Его оклеветанный - не отвергохся, вопрошенный - исповедах Его, ныне жегомый - благодарю Ему». Сицевому благодушию в лютых страданиих научи и нас, доблестный мучениче, да достигше обетованных благих, воспоем с тобою песнь победную Христу Богу: Аллилуиа.

 

Икос 10

Стены безчувственныя твердее показася безбожный мучитель, повествует бо житие твое, Лаврентие славне, яко «вси тамо предстоявшии удивляхуся цареву мучительству таковому, яко жива человека испещи повеле». Ты же, мучениче, глаголал еси молитвенно: «Благодарю тя, Господи Иисусе Христе, яко укрепил мя еси», и обращся к мучителем, рекл еси: «Се, о окаяннии, испекосте едину тела моего страну, обратите на другую и ядите испеченное мясо мое»; и паки возопи ко Господу: «Благодарю тя, Господи Иисусе Христе, яко сподобил мя еси внити во врата Твоя», и сия рек, испусти дух. Поклоняяся таковей славней кончине твоей, умиленно вопием ти:

Радуйся, кончиною своею посрамивый зело мучителей твоих.

Радуйся, устыдивый вельми беззаконнующих.

Радуйся, кротким терпением твоим удививый все естество человеческое.

Радуйся, в терпении сем явивый себе яко безтелесна, подобна горним Силам.

Радуйся, благодарственно вся терпевый, живота вечнаго явился еси славный наследник.

Радуйся, подвигом добрым подвизавыйся, показался еси вечныя славы сопричастник.

Радуйся, непобедимый мучениче архидиаконе Лаврентие.

 

Кондак 11

Песнь исходную первее принесе тебе, страдальче Лаврентие, Ипполит темничник, крещенный тобою, иже похити в ту нощь тело твое, и плащаницею со ароматы обви е, и со Иустином пресвитером принесе в дом Кириакии вдовицы, пребыв в той день в пощении со слезами. В вечер же глубок, якоже повествует житие твое, «мощи твоя несоша в пещеру, яже на селе вдовы тоя. Собравшимся же многим христианом, и плачущим много, сотворивше тамо всенощная моления, погребоша честно мученика, а святый Иустин пресвитер и вси прочии быша причастницы Пречистых Таин Тела и Крови Христовых». Воспоминающе сие и мы, вместо мира - слезы молитвы принесем тебе и, песнем исходным воздыханьми подражая, воспоем о тебе Богу: Аллилуиа.

 

Икос 11

Свет Христов, просвещаяй и освящаяй всяческая, озари душу твою, богомудрый мучениче, темже и по кончине твоей честныя мощи и иконныя подобия лика твоего неоскудно источают исцеления, утешение и радость всем болящим, скорбящим и унывающим, подвизая оных подражати тебе во исповедании, терпении, мужестве и крепцей любви ко Христу, еюже пламенея, дивный образ терпения в злостраданиих явил еси и нас научаеши воспевати тебе тако:

Радуйся, велию любовь и веру ко Христу до последняго издыхания сохранивый.

Радуйся, в любви сохранивый веру, верою стяжавый мужество и теми козни вражия победивый.

Радуйся, путем тесным в горняя возшедый.

Радуйся, праведным житием обители вечныя достигший.

Радуйся, в мире живый, надмирную красоту очами духовными созерцавый.

Радуйся, Рима великаго и мира всего славо и украшение.

Радуйся, непобедимый мучениче архидиаконе Лаврентие.

 

Кондак 12

Благодать, данную ти от Господа в земнем житии твоем, святый мучениче, во еже исцеляти недужныя, почитая, веруем, яко и по смерти ты целиши с верою приходящих ко всечестным мощем твоим и прославленным Божественною благодатию иконам; уповаем же, угодниче Божий, яко исцеляя телесныя очи прибегающих к тебе недужных, вкупе просвещаеши и душевныя очеса, и ныне, якоже и древле, научаеши просвещенныя тобою воспевати Творцу всяческих: Аллилуиа.

 

Икос 12

Поюще твоя великая страдания, Лаврентие, великий Христов угодниче, хвалим твое непостижимое нам, немощным, долготерпение, ублажаем твердое исповедание Христово и, почитая священную и славную память твою, заступниче наш и целителю, ведаем, яко, по слову псалмопевца, «в память вечную будет праведник». Темже любовию прославляя тя, от чистаго сердца и благоговейныя души, устнами, аще и грешными, но усердными, вопием со умилением сице:

Радуйся, великих даров Божиих присный нам ходатаю.

Радуйся, преизящный угодниче и непобедимый в мучениих страстотерпче.

Радуйся, крепким терпением стяжавый душу твою, оным терпением и нам явивый образ спасения вечнаго.

Радуйся, темже терпением мучителеву дерзость победивый, научая оным и нас побеждати дерзость исконнаго врага нашего.

Радуйся, в томже терпении себе равнаго Серафимам безплотным явивый.

Радуйся, сим величайшим терпением звание непобедимаго от всех родов христианских получивый.

Радуйся, непобедимый мучениче архидиаконе Лаврентие.

 

Кондак 13

О великий, всехвальный, непобедимый во страданиих мучениче и архидиаконе Лаврентие, приими от всея души нашея сия похвалы, тебе возносимыя, и нас, чающих милости Божия, помощи и спасения, от всяких бед, болезней и зол соблюди, воздыханий наших в болезнех и скорбех не презри, слезы наша собери и ко Престолу Утешителя Господа принеси, в час же кончины нашея предстани нам и Престолу Господа Славы нас представи воспети Ему в горних селениях песнь Ангельскую: Аллилуиа.

 

(Этот кондак читается трижды, затем икос 1 и кондак 1)
 
 
Молитва

О пресвятый и предивный стратотерпче Христов, архидиаконе Лаврентие! Восхваляюще веру и страдания твоя, почитаем победу и венценосное прохождение твое чрез горящее углие от тьмы века сего ко свету невечернему Престола величествия Божия. Темже убо молим тя: якоже древле притекавшия с верою к покрову твоему чудесы твоими утвердил еси, тако да приимеши и нас под покров твой и в болезнех и печалех наших заступник нам да будеши; и якоже от слепоты телесных очес Крискентиана приложением рук исцелил еси, тако да исцелиши предстательством твоим у Престола Божия и нашу душевную слепоту. Призри на разслабление наше телесное и душевное и укрепи нас бодростию противу враг наших видимых и невидимых, удручающих нас напастьми, да твоею помощию путь маловременныя жизни сея прешедше, непобеждени от бед и скорбей и всякаго лютаго обстояния, достигнем неприступныя славы величествия Божия, идеже ты ныне предстоя, молишися со дерзновением за люди, прибегающия с верою к тебе и воспевающия дивнаго во святых Бога Израилева во веки веков. Аминь.

 

Ж И Т И Е

Мученики Римские архидиакон Лаврентий, Папа Сикст, диаконы Феликиссим и Агапит, воин Роман пострадали в 258 году при императоре Валериане (253-259). Святой Папа Сикст, родом из Афин, получил хорошее образование, проповедовал в Испании и был поставлен епископом в Рим после мученической кончины святого Папы Стефана (253-257, память 2 августа). Это было время, когда Папа, занимавший Римский престол, избирался на верную смерть. В скором времени святой Сикст был также схвачен и посажен в темницу вместе с двумя своими диаконами Феликиссимом и Агапитом. Когда святой архидиакон Лаврентий встретил Папу Сикста, которого вели в темницу, он со слезами воскликнул: "Куда ты, отче, грядешь? Зачем оставляешь своего архидиакона, с которым всегда приносил Бескровную Жертву? Возьми своего сына с собой, чтобы и я был общник тебе в пролитии крови за Христа!" Святой Сикст отвечал ему: "Не оставляю тебя, сын мой. Я старец и иду на легкую смерть, а тебе предстоят более тяжкие страдания. Знай, что через три дня после нашей смерти и ты пойдешь за мной. А теперь пойди, продай церковные сокровища и раздай гонимым и нуждающимся христианам". Святой Лаврентий с усердием исполнил завет святителя.


Услышав, что святой Папа Сикст поведен с диаконами на суд, святой Лаврентий пошел туда же, чтобы видеть их подвиг, и сказал святителю: "Отче, я уже выполнил твое поручение, раздал врученное тобою сокровище, не оставь меня!" Услышав о каком-то сокровище, воины взяли его под стражу, а мучеников усекли мечом († 6 августа 258 г.). Император заключил святого Лаврентия в темницу и поручил надзирать за ним начальнику тюрьмы Ипполиту. В темнице святой Лаврентий молитвой исцелял собиравшихся к нему больных и многих крестил. Пораженный этим, Ипполит сам уверовал и принял Крещение от святого Лаврентия со всем своим домом. Вскоре архидиакон Лаврентий был вновь приведен к императору с приказанием показать спрятанные сокровища. Святой Лаврентий ответил: "Дай мне срок три дня, и я покажу тебе эти сокровища". За это время святой собрал множество нищих и больных, питавшихся лишь милостыней Церкви, и, приведя их, объявил: "Вот те сосуды, в которых вложены сокровища. И все, кто влагает свои сокровища в эти сосуды, с избытком получают их в Царствии Небесном".

После этого святого Лаврентия предали жесточайшим мукам, принуждая его поклониться идолам. Мученика били скорпионами (тонкая железная цепь с острыми иглами), опаляли раны огнем, били оловянными прутьями. Во время страданий мученика воин Роман внезапно воскликнул: "Святой Лаврентий, я вижу светлого юношу, который стоит около тебя и отирает твои раны! Заклинаю тебя Господом Христом, не покидай меня!" После этого святого Лаврентия сняли с дыбы и отдали в тюрьму к Ипполиту. Роман принес туда водонос с водой и умолял мученика крестить его. Сразу же после Крещения воины отсекли ему голову († 9 августа). Когда мученика Лаврентия повели на последнее испытание, святой Ипполит хотел объявить себя христианином и умереть вместе с ним, но исповедник сказал: "Затаи ныне свое исповедание в сердце. Спустя немного времени я позову тебя, и ты услышишь и придешь ко мне. А обо мне не плачь, лучше радуйся, я иду получить славный мученический венец". Его положили на железную решетку, под которую подложили горячие угли, а слуги рогатинами прижимали к ней тело мученика. Святой Лаврентий, взглянув на правителей, сказал: "Вот, вы испекли одну сторону моего тела, поверните на другую и ешьте мое тело!" Умирая, он произнес: "Благодарю Тебя, Господи Иисусе Христе, что Ты сподобил меня войти во врата Твои", - и с этими словами испустил дух.

Святой Ипполит ночью взял тело мученика, обвил пеленами с ароматами и дал знать пресвитеру Иустину. Над мощами мученика в доме вдовы Кириакии совершили всенощное бдение и Божественную Литургию. Все присутствовавшие христиане причастились Святых Таин и с честью похоронили в пещере тело святого мученика архидиакона Лаврентия 10 августа 258 года. Святой Ипполит и другие христиане пострадали через три дня по кончине святого Лаврентия (13 августа), как он предсказал им об этом.

Ныне мощи святого архидиакона Лаврентия почивают в Риме, в базилике его имени, на Тибуртинской дороге.

Архидиакону Лаврентию, по обычаю, молятся при болезнях головы и глаз.

 

По благословению

митрополита Херсонского и Таврического Иоанна
Опубликована: 23.08.2016