Празднование:
Неделя Всех Святых
Тропарь, глас 4
Яко нерушимую сте́ну и всемо́щный покров стяжа́хом Тя раби Твои, Владычице Богородице, мрак грехов и скорбе́й отгоня́ющую, темже вопием Ти: мир мирови да́руй и душа́м нашим свет и спасение.
Кондак, глас 8
Взбранной Воеводе победительная, яко изба́вльшеся от злых, благодарственная воспису́ем Ти раби Твои, Богородице; но яко иму́щая державу непобедимую, от всяких нас бед свободи́, да зовем Ти: радуйся, Неве́сто Неневе́стная.
Кондак 1
Избра́нней от всех родо́в Божией Матери и Царице, избавляющей нас от всякия ну́жды и печали, хвалебное пение приносим мы, недостойнии. Ты же, яко иму́щая державу непобедимую, от всяких нас бед свободи́, да зовем Ти: Радуйся, Богородице, Стено Нерушимая, Заступнице наша и утешение.
Икос 1
Арха́нгельский глас приносим Ти, Чистая, яко благоизво́лила еси даровати нам во утешение образ Твой святый, да всем моля́щимся пред ним бу́деши Стеною Нерушимою и огражде́нием от всех бед и напа́стей, от врагов видимых и невидимых и от всякаго зла. Сего ради ублажаем Тя, Владычице, и радостно вопием:
Радуйся, Благодатная.
Радуйся, яко Господь с Тобою.
Радуйся, Благословенная в жена́х.
Радуйся, обре́тшая благодать у Бога.
Радуйся, ро́ждшая Спаса душ наших.
Радуйся, яко по глаголу Твоему ныне и присно ублажа́ешися.
Радуйся, Богородице, Стено Нерушимая, Заступнице наша и утешение.
Кондак 2
Видящи, Пресвятая Владычице, скорби и ну́жды людей Твоих, благоизво́лила еси даровати богоспаса́емому граду Киеву пречу́дный образ Твой, Нерушимою Стеною имену́емый, да вси, благоговейно взира́юще на него, взывают к Богу, Тобою нас спасающему: Аллилуия.
Икос 2
Разум богопросвеще́н да́руеши верным, Пресвятая Дево, пред чудотворным ли́ком Твоим моля́щимся и Тя в помощь призывающим, и не тщи отходят они от сего источника милости Твоея, благодарно взывающи:
Радуйся, воздыхания наша милостивно прие́млющая.
Радуйся, омофо́ром Своим всех покрывающая.
Радуйся, яко ле́нтием Твоим слезы страждущих отира́еши.
Радуйся, яко ру́це Твои в молитве к Богу воздева́еши.
Радуйся, всех в скорби су́щих взывати к Богу научающая.
Радуйся, верою имя Твое призывающих от бед спасающая.
Радуйся, Богородице, Стено Нерушимая, Заступнице наша и утешение.
Кондак 3
Сила благодатная Тебе, Владычице, от Господа дарова́ся хранити и защищати от нашествия вражия, губи́тельства, ко́зней и нестроений; сего ради притекают ко образу Твоему от лет древних на поклонение вернии людие, прося́ще Твоего заступления, Богородице, и вопиюще Богу: Аллилуия.
Икос 3
Имея любовь ве́лию к людем, Богомати Пречистая, прия́ла еси попечение от Сына Твоего и Бога устроя́ти и покрывати род христианский: Ты бо еси бе́дствующим пристанище, погибающим спасение, градом и ве́сем покров, и всем молящимся Тебе Помощница скорая. Сего ради вопием:
Радуйся, Царице наша Преблага́я.
Радуйся, усыновившая нас при Кресте Сына Твоего.
Радуйся, ма́тернюю любовь к нам являющая.
Радуйся, во благи́х желания наша исполняющая.
Радуйся, скорби и печали наша в радость претворя́ющая.
Радуйся, надежду на Тя иму́щих присно заступающая.
Радуйся, Богородице, Стено Нерушимая, Заступнице наша и утешение.
Кондак 4
Бурею нашествия вражия егда страна наша бысть испыту́ема, тогда отцы наши взыва́ху о помощи ко Пресвятей Деве Богородице: Та бо, яко Стена Нерушимая и крепкое забра́ло, предста́тельством Своим у Престола Божия силу и крепость на враги людем верным дарова́, и сии вся по́лчища вражеския от пределов наших изгна́ша. Сего ради, восхваляюще Богоматерь, радостно воспеваем Господеви: Аллилуия.
Икос 4
Слы́шавше православнии людие, яко икона Твоя, Мати Божия, да́ром чудес преизбы́точествует, с верою и упованием на милосердие Твое к ней притекают во дни бра́ни, лихоле́тий и нестрое́ний и, помощь и заступление от Тебе прие́мше, воспевают Ти похвалу сию :
Радуйся, рода христианскаго крепосте несокрушимая.
Радуйся, страны нашея защищение необори́мое.
Радуйся, народу нашему на враги поможе́ние.
Радуйся, земли нашея благодатное охранение.
Радуйся, находящих на нас лютых врагов скоро прогоняющая.
Радуйся, верою имя Твое призывающих от нечаянныя смерти спасающая.
Радуйся, Богородице, Стено Нерушимая, Заступнице наша и утешение.
Кондак 5
Боготе́чную звезду, честну́ю икону Твою, указу́еши нам, Владычице мира, к нейже мы взирающе и верою сердечною моля́щеся, Тебе, о Богомати, глаголем: Ты еси нам щит непобедимый и предгра́дие необори́мое, вопиющим Богу: Аллилуия.
Икос 5
Видящи приле́жная моления наша, возноси́мая Тебе вы́ну, наипа́че же во дни лютых скорбе́й и злых обстоя́ний, яви нам, Владычице, скорую Твою помощь и заступление, да, изба́вльшеся от бед и напа́стей, радующеся дивному Твоему милосердию, воспоем вси си́це:
Радуйся, безчисленныя щедроты всем подающая.
Радуйся, во всяких беда́х и ну́ждах нам помогающая.
Радуйся, сердца́ злых человек, востаю́щих на нас, умягчающая.
Радуйся, миром и любовию нас ограждающая.
Радуйся, гордых смиряющая.
Радуйся, смиренныя возвышающая.
Радуйся, Богородице, Стено Нерушимая, Заступнице наша и утешение.
Кондак 6
Проповедницы бы́ша чудес, от Твоея иконы явле́нных, благочестивии отцы наша, Тобою, Богородице, спасе́ннии и от бед и напастей изба́вленнии. Темже благодаряще Бога, такову́ю Благу́ю Заступницу роду человеческому даровавшаго, немо́лчными усты́ воспеваем Ему: Аллилуия.
Икос 6
Возсия́ свет неизрече́нный Твоея благости, Владычице, всем скорбящим, плачущим и во обстоя́нии сущим: наша бо сле́зныя молитвы прие́млющи, подаеши нам скорое от бед избавление. Сего ради, благодарни суще, вопием Ти:
Радуйся, скорби и слезы наша в радость претворяющая.
Радуйся, ризою Твоею честно́ю благонаде́жно нас защищающая.
Радуйся, до́мы наша от огня и разрушений спасающая.
Радуйся, удары молнии и грома от главы нашея отводящая.
Радуйся, от та́тей и злых людей верныя ограждающая.
Радуйся, клеветы́ и ко́зни врагов наших разрушающая.
Радуйся, Богородице, Стено Нерушимая, Заступнице наша и утешение.
Кондак 7
Хотя́щи явити страждущим Твоея ма́терния любве и щедрот бе́здну, даровала еси нам, Богомати, Свою икону, да видяще чудеса, от нея быва́емая, вси людие с верою и надеждою умиленно взывают Богу: Аллилуия.
Икос 7
Новое зна́мение благодати, присущия Тебе, Богородительнице, и чудесныя силы показа нам Создатель, егда дивный образ Твой, изображе́нный на стене́ древняго храма Святыя Софии, Премудрости Божия, во граде Киеве, вя́щше девятисо́т лет неврежде́н сохранися, по́лчища бо врагов веры православныя не дерзну́ша поругатися ему, силою Твоею храни́му. Воистину и нам, грешным, Стеною Нерушимою явися святая икона сия, подвиза́ющи возглашати Тебе, Пречистая:
Радуйся, в хито́н, сияющий светом Небесным, облече́нная.
Радуйся, воздея́нием пречистых рук Твоих непрестанную молитву о всем мире являющая.
Радуйся, яко честны́й образ Твой и долгота́ веков не повреди́.
Радуйся, яко образ сей и доны́не во всей своей ле́поте пребывает.
Радуйся, яко образом сим сердца́ молящихся благоговейно умиляются.
Радуйся, яко сила благодатная, сему образу Твоему прису́щая, враги устрашает.
Радуйся, Богородице, Стено Нерушимая, Заступнице наша и утешение.
Кондак 8
Стра́нно и сумни́тельно неверующим слышати, како от святыя иконы Твоея, Пресвятая Дево, чудеса источа́ются. Мы же усердно почитающе образ Твой, Владычице, уми́льно лобыза́ем его, вопиюще Богу: Аллилуия.
Икос 8
Всем верным уте́шительно есть взирати на икону Твою, Преблагословенная Мати, на нейже зрим Тя, о всем мире моля́щуюся, ру́це Свои к Богу воздева́ющую и о роде христианстем хода́тайствующую. Темже радуемся мы, недостойнии, яко и́мамы такову́ю Помощницу и Предстательницу о нас, грешных, вопиюще Тебе таковая:
Радуйся, Мати милосердия и щедрот.
Радуйся, священное прибежище верных.
Радуйся, ко благочестию наша Наставнице.
Радуйся, уповающих на Тя Заступнице.
Радуйся, за всех христиан теплая Хода́таице.
Радуйся, о людех Твоих присная Молитвеннице.
Радуйся, Богородице, Стено Нерушимая, Заступнице наша и утешение.
Кондак 9
Всяк возраст и всяк чин притекает к Тебе, Богоневесто, всем бо простира́еши богоно́снии ру́це Твои, всех утешаеши и спасаеши. Темже, благодаряще о Тебе Бога, вопием Ему : Аллилуия.
Икос 9
Вити́йство наше не довле́ет ко прославлению множества чудес Твоих, Богородице, оба́че Ты, яко воистину Блага́я Мати, веру и усердие наше приими́, воспевающих Тебе таковая:
Радуйся, с Сыном Твоим на Небесех вечно царствующая.
Радуйся, ма́тернее дерзновение к Нему иму́щая.
Радуйся, Го́рняго мира украшение.
Радуйся, до́льняго мира защищение.
Радуйся, молитвам верных милостиво вне́млющая.
Радуйся, любящим Тя любовию Твоею воздающая.
Радуйся, Богородице, Стено Нерушимая, Заступнице наша и утешение.
Кондак 10
Спасительное прибежище от бурь житейских Ты еси, Богородице Дево, темже испроси у Сына Твоего и Бога мир мирови даровати, вражду и не́нависть искорени́ти, братолюбие и благочестие умно́жити, веру же истинную в сердца́х утвердити, да вси едиными усты́ и единым сердцем вопием Создателю нашему: Аллилуия.
Икос 10
Стена тверда и от бед ограждение проти́ву ко́зней вра́жиих Ты еси, Пресвятая Владычице, темже сохрани страну нашу и всех нас от врагов видимых и невидимых, Церковь Святую утверди, верных чад ея от всякаго зла соблюди, да, спаса́еми Тобою, взываем си́це:
Радуйся, злая начинания разрушающая.
Радуйся, вра́жия ко́зни расторгающая.
Радуйся, страны нашея несокрушимая крепосте и оградо.
Радуйся, Святыя Церкви покров и утверждение.
Радуйся, святителей и священников благодатное удобрение.
Радуйся, и́ноком и в мире благоче́стно живущим Хода́таице вечнаго ра́дования.
Радуйся, Богородице, Стено Нерушимая, Заступнице наша и утешение.
Кондак 11
Пение всеумиле́нное и хвалебное приносим Ти, Владычице, под всесильным бо покровом Твоея бла́гости вы́ну пребываем, и, все упование на Тя возложи́вше, радостно поем Богу: Аллилуия.
Икос 11
Светлыми лучами чудес икона Твоя сия́ет, Богомати Пречистая, и прогоняет всякое действо вра́жие силою Божиею, от нея́ исходя́щею. Темже и мы, недостойнии, иму́ще таковое зна́мение Твоего к нам благоволения, вопием:
Радуйся, братолюбия Наставнице.
Радуйся, враждующих примирение.
Радуйся, обидимых Уте́шительнице.
Радуйся, гонимых защищение.
Радуйся, бе́дствующим вспоможение.
Радуйся, неду́гующих исцеление.
Радуйся, Богородице, Стено Нерушимая, Заступнице наша и утешение.
Кондак 12
Благодатию, да́нною Ти от Сына Твоего, чудоде́йствуеши и во времена́ сия чрез образ Твой святый, Нерушимою Стеною имену́емый, не оставляеши бо, Владычице, рабы Твоя, но якоже во дни дре́вния, си́це и ныне подаеши присно недужным здравие, скорбящим утешение, обидимым заступление, от запале́ния о́гненнаго сохранение, от та́тей, убийц и разбойников защищение, от смертоно́сныя я́звы избавление, и от всякаго обстоя́ния покрываеши моля́щихся Тебе, Богу же благодарно вопиющих: Аллилуия.
Икос 12
Поюще Твое всесильное предстательство и ве́лию милость к роду христианскому, молим Тя, Владычице: настави нас на стезю́ правую и не остави нас, покрова Твоего ищущих и зовущих:
Радуйся, Божие к нам благоволение.
Радуйся, наше к Богу дерзновение.
Радуйся, ненадежных надеждо.
Радуйся, печальных отра́до.
Радуйся, руку по́мощи нам подающая.
Радуйся, ко пристанищу спасительному нас наставляющая.
Радуйся, Богородице, Стено Нерушимая, Заступнице наша и утешение.
Кондак 13
О Всепетая Мати, приими ныне сие малое моление наше и избави нас от бед и напастей, от врагов видимых и невидимых и от всякаго зла, да в мире и благочестии пожи́вше на земли́, сподобимся во Царствии Небеснем выну воспевати Богу: Аллилуия.
(Этот кондак читается трижды, затем икос 1 и кондак 1)
Молитва
О Пресвятая Владычице наша Богородице, приими́ от нас сие хвалебное пение и вознеси ко Творцу и Зижди́телю нашему теплыя молитвы Твоя о нас, недостойных. Умилосердися на ны, Госпоже́ Всемилостивая, и низпосли дар коему́ждо потре́бен: болящия исцели, скорбящия уте́ши, заблуждшия вразуми, младенцы воспитай, юныя уцелому́дри, старость поддержи и всех нас, к Тебе припа́дающих, от всякаго обстоя́ния свободи́. Огради, Заступнице наша, Святую Церковь и страну нашу от всех ко́зней и наве́тов вра́жиих, от вражды и нестроений, утверждая люди Твоя в братолю́бии и единомы́слии. Буди нам, Мати Преблага́я, Стена Нерушимая, избавляющи нас от всяких бед и напа́стей, да всегда воспевающе Твое к нам милосердие, восхваляем в Троице славимаго Бога, Отца и Сына и Святаго Духа, ныне и присно и во веки веков. Аминь.
Икона Пресвятой Богородицы «Нерушимая Стена»
В главном алтаре Киево-Софийского собора под сводом над горним местом находится мозаический образ Пресвятой Богородицы, именуемый «Нерушимая Стена». Этот особый эпитет, присваиваемый, как правило, изображениям Богоматери иконографического типа «Оранта», заимствован из акафиста Пресвятой Богородице: «Радуйся, царствия нерушимая стено» (Икос 12). Оранта (от лат. orans) — значит «молящаяся», «взывающая».
Божия Матерь изображена на золотом фоне, стоящей во весь рост на четырехугольном золотом камне с воздетыми руками — жест заступнической молитвы. На большой дуге полусвода, во всю ее длину и почти во всю ширину, изображена греческая надпись черной мозаикой. Надпись эта переводится так: «Бог посреди ея и не подвижется: поможет ей Бог утро заутра» (Пс. 45, 6).
Икона получила свое наименование «Нерушимая Стена» ввиду того, что на протяжении уже более девяти веков оставалась неповрежденной, несмотря на то, что и собор, и город неоднократно подвергались разрушению. Сохранилось старинное описание этой иконы: «Рост Богородицы исполинский, Она стоит на золотом камне, в незыблемое основание всех притекающих к Ее защите. Небесного цвета Ее хитон, червленый пояс и на нем висит лентион, которым Она отирает столько слез. Лазуревые поручи на воздетых к небу руках. Золотое покрывало опускается с Ее головы и перевешено в виде омофора на левое плечо, на знамение Ее покрова, ширшего облака, по гласу церковных песней. Светлая звезда горит на челе Богоматери и две звезды на раменах: ибо Она Сама, Матерь Незаходимого Света, была для нас зарею Незаходимого Солнца».
Первые изображения Богородицы Оранты (без Младенца) встречаются уже в римских катакомбах. Наиболее широкое распространение данная иконографическая схема получает в послеиконоборческий период. От прочих иконографических типов изображения Богородицы Оранту отличает величественность и монументальность. Самостоятельные изображения Богородицы Оранты без Младенца используются крайне редко. Этот образ входит в состав сложных композиций, например, в иконографии праздников Вознесения или Покрова.
По киевскому преданию, стольный град не погибнет, пока простирает над ним руки Божия Матерь «Нерушимая Стена».
По благословению
митрополита Херсонского и Таврического Иоанна