НА ВЕЛИЦЕЙ ВЕЧЕРНИ
На Господи, воззвах: стихиры, глас 8:
В болезнех постнических терпящи,/ прияла еси благодать/ душевныя и телесныя болезни врачевати,/ мати преподобная Евтропие,/ и нечистыя духи прогоняти,/ и всем скорбящим предстательствовати,/ темже твоими молитвами / проси исцеления всем и велия милости.
Рака мощей твоих/ душевное прозрение источает/ и всем болящим исцеление,/ приходящим верою/ и просящим посещения твоего,/ мати преподобная и досточудная,/ темже твоими молитвами/ испроси нам велия милости.
Милование стяжала еси ко искреннему,/ веру же православную и любовь, яже к Богу,/ богоблаженная Евтропие,/ сего ради Божия благодать духовная/ в тебе, мати преподобная, препочила есть,/ темже твоими молитвами/ сохрани верою блажащия тя.
Монашеским житием украсила еси, мати Евтропие,/ постническая множества,/ возсиявше яко солнце всем,/ темже с ними прославляешися, преподобная,/ наслаждающися славы Божественныя/ и молящися спастися нам.
Что тя возименуем, / преподобная мати Евтропие,/ девства добротами просиявшую,/ дщерь избранну, вышняго Иерусалима жительницу,/ Ангелов собеседницу,/ чертога мысленнаго наслаждающуюся;/ моли спасти и просветити души наша.
Слава, глас 6:
Ангельскому житию подражающи,/ постом и молитвами/ Христу, яко безплотна, послужила еси,/ ныне же со Ангельскими чинми водворяющися / в чертозе Безсмертнаго Жениха твоего,/ моли, Егоже возлюбила еси,/ о чтущих радостно всечестную память твою.
И ныне, Богородичен, глас тойже:
Кто Тебе не ублажит, Пресвятая Дево?/ Кто ли не воспоет Твоего Пречистаго Рождества?/ Безлетно бо от Отца возсиявый Сын Единородный,/ Тойже от Тебе, Чистыя, пройде,/ неизреченно воплощся:/ естеством Бог Сый,/ и естеством быв Человек нас ради;/ не во двою лицу разделяемый, / но во двою естеству / неслитно познаваемый./ Того моли, Чистая Всеблаженная, / помиловатися душам нашим.
Вход. Прокимен дня. Чтения 3.
Премудрости Соломоновы чтение (глава 3):
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие - сокрушение; они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение (главы 5 и 6):
Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие - рвение Свое и вооружит тварь в месть врагом. Облечется в броня правды и возложит шлем - суд нелицемерен. Приимет щит непобедимый - преподобие, поострит же напрасный гнев во оружие, споборет же с Ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И, от каменометныя ярости исполнь, падут грады; вознегодует на них вода морская, реки же потопят я нагло; сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех языков, яко дана есть от Господа держава вам и сила от Вышняго.
Премудрости Соломоновы чтение (глава 4):
Праведник аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком и возраст старости - житие нескверное. Благоугоден Богови быв, возлюблен бысть и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга, угодна бо бе Господеви душа его, сего ради потщася от среды лукавствия. Людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.
На литии стихиры, глас 4:
Приидите, верных соборы,/ псаломски восплещите руками,/ преподобную Евтропию воспевающе,/ похвалу земли Херсонския,/ церковное украшение,/ Божественнаго Христова смирения ревнительницу,/ молящуюся о душах наших.
Богомудрая мати Евтропие,/ мощи твоя, радующеся, целуем/ и почерпаем благодать исцелений,/ любезно хваляще тя/ и верою взывающе:/ Христу молися/ даровати душам нашим мир и велию милость.
Слава, глас 8:
Светло украсивши светильник твой елеем чистоты и милости,/ в Небесный чертог с мудрыми девами ко Христу востекла еси,/ к Жениху твоему Безсмертному,/ Емуже прилежно молися, мати Евтропие,/ о совершающих любовию память твою.
И ныне, Богородичен, глас тойже:
Безневестная Дево,/ Яже Бога неизреченно заченши плотию,/ Мати Бога Вышняго,/ Твоих рабов мольбы приими, Всенепорочная,/ всем подающи очищение прегрешений,/ ныне наша моления приемлющи,/ моли спастися всем нам.
На стиховне стихиры, глас 4:
Желанием сердечным/ ангельскаго образа достигла еси/ и ко Всесильному Богу/ труды твоя и велию веру принесла еси,/ темже, мати преподобная Евтропие,/ противу богоподвижных трудов твоих/ благодать от Бога восприяла еси.
Стих: Дивен Бог во святых Своих,/ Бог Израилев.
Бдении всенощными/ и молитвами непрестанными/ плоть свою распенши со страстьми и похотьми,/ истинно Христова раба явилася еси/ и нам путь показала еси,/ имже шествующе во след Христа,/ Царствия Небеснаго сподобляемся.
Стих: Честна пред Господем / смерть преподобных Его.
Дивными подвиги,/ вниманием к себе и трезвением,/ непрестанною молитвою и хождением пред Богом/ сердце свое очистивши,/ храм Святаго Духа была еси, богоблаженная,/ темже Того дивных даров в житии твоем сподобилася еси,/ и сими многия ко Христу приведши,/ многия утешивши и наставивши,/ и ныне не престаеши о нас ходатайствовати,/ прося нам велия милости.
Слава, глас 6:
Возсия днесь священное твое торжество,/ сущия во тьме души озаряющее/ и мрак бесовский всегда отгоняющее,/ досточудная Евтропие,/ Христу Богу молися/ спастися душам нашим.
И ныне, Богородичен, глас тойже:
Богородице, Ты еси Лоза истинная,/ возрастившая нам Плод живота,/ Тебе молимся: молися, Владычице,/ со святыми апостолы,/ помиловати души наша.
Тропарь, глас 4:
Добродетельми богатая,/ кротостию и благочестием украшенная,/ возсияла еси чистотою жития твоего,/ и ныне в Небеснем чертозе/ с мудрыми девами предстоящи Христу,/ моли о нас, мати Евтропие,/ почитающих память твою.
НА УТРЕНИ
По 1-м стихословии седален, глас 2:
Житие на земли благочестно скончавши, чисто селение Святаго Духа явилася еси, просвещая верою приходящих к честным мощем твоим, мати; темже моли Владыку Христа просветити души наша, празднующих всечестную память твою.
Слава, и ныне, Богородичен:
Всех Творца и Владыку, Бога же и Содетеля, Всенепорочная Чистая, Духом Божественным в ложеснах Твоих заченши, нетленно родила еси, Егоже славяще, Тя величаем, Дево, яко палату всех Царя и мира защищение.
По 2-м стихословии седален, глас 4.
Евтропию преподобную песньми почтим, умертвившую вся прилоги страстей воздержанием твердым и крепким терпением воистину, и посрамившую зело противнаго всю гордыню, и ныне молящуюся Господу помиловатися душам нашим.
Слава, и ныне, Богородичен:
Ужасно чудо зачатия и несказанен образ Рождества в Тебе познася, Чистая Приснодево, ужасает мой ум и удивляет помысл; слава Твоя, Богородице, всем простреся, во спасение душам нашим.
Величание:
Ублажаем тя,/ преподобная мати, Евтропие,/ и чтим святую память твою,/ ты бо молиши о нас/ Христа Бога нашего.
Псалом избранный:
Терпя, потерпех Господа, и внят ми, и услыша молитву мою.
Постави на камени нозе мои и исправи стопы моя.
Се удалихся, бегая, и водворихся в пустыни.
Уподобихся неясыти пустынней.
Бдех и бых, яко птица, особящаяся на зде.
По полиелеи седален, глас 8:
Земных и тленных наслаждение презревши, Христу последовала еси и монашеское житие возлюбила еси паче мира красоты и сладости привременныя, сего ради ныне на Небеси торжествующи, мати Евтропие, молися о всех нас, любовию празднующих святую память твою.
Слава, и ныне, Богородичен:
Тя пристанище, и стену, и прибежище, и надежду, и покров, и Предстательницу теплую обретше, вернии, к Тебе притекаем, и вопием прилежно, и взываем верно: помилуй, Богородице, на Тя уповающия и от прегрешений избави.
Прокимен, глас 4: Дивен Бог во святых Своих,/ Бог Израилев.
Стих: В церквах благословите Бога, Господа от источник Израилевых.
Евангелие от Матфея, зачало 104.
По 50-м псалме стихира, глас 6:
Днесь светоносное торжество,/ возсия бо нам память преподобныя матери нашея Евтропии,/ усердныя помощницы и ходатаицы,/ иже припадает ко Престолу Вседержителя/ и к стопам Пречистыя Богородицы,/ усердно о нас моляся.
КАНОН, глас 8
Песнь 1
Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.
Припев: Преподобная мати Евтропие, моли Бога о нас.
Страстными мя бурями всюду погружаема и помышлений молвою душу мою колеблему, ко пристанищу тихому Христовы воли молитвами твоими, преподобная Евтропие, направи, яко да достойно тя воспою.
Девственными добротами просвещенна, богоблаженная Евтропие, Чистому Слову уневестилася еси, поживши пощением божественне, и Того живоносным стопам последовала еси, умерщвление страстей претерпевши.
Божественных отец наказанию последовала еси, славная Евтропие, и сих нраву чисте поревновала еси, воздержанием, яко безплотна, и чистотою и девством поживши, преподобная, и истинным смирением.
Богородичен: От Отроковицы плотию Неискусобрачныя Творец твари раждаем, по Рождестве, яко прежде Рождества, Деву хранит Ю, якоже благоволи.
Песнь 3
Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.
В Небесныя чертоги светозарныя вселилася еси, невеста избранна бывши Вседержителю, исцеления реки источаеши, Евтропие, страстная нам течения изсушающи.
Украсилася еси желанием крайним, желающи Христа, премножеством благосердия плотию обнищавшаго, и последовала еси животным Его словесем, житейская вся красная возненавидевши.
Позлащенне криле добродетели стяжавши, на высоту Небесную возлетела еси, блаженная Евтропие, яко голубица нетленная.
Богородичен: Род человеческий спасеся, Дево, благодатию Обнищавшаго плотию из чрева Твоего неизреченно; темже чтим Тя и благочестно ублажаем, Пречистая Дево Богорадованная.
Седален, глас 4:
Красотою явилася еси девственно преукрашаема, постнических священных подвиг, яко невеста непорочная дева Христова, и к Нему в нетленный востекла еси чертог и красот Его наслаждаешися, но моли спастися нам от всякия беды, любовию поющим тя.
Слава, и ныне, Богородичен:
Чистая, Всенепорочная и Неискусобрачная, Едина Безлетнаго Сына и Слово Божие в лете рождшая, Того со святыми и честными апостолы, мученики, и пророки, и преподобными моли даровати нам очищение и велию милость.
Песнь 4
Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.
Светлое твое торжество, светом сияющее Божия Духа, озаряет души наша, верою поющих тя, Евтропие преподобная.
Чудесы Божественными уверила еси неведущих Владыку, и к познанию Его возвратила еси прелести тьму оставльших.
Дары Христу принесла еси, чистое умерщвление удов и труды воздержания, и противу прияла еси Небесное Царство, Евтропие, и вечнующее наслаждение.
Богородичен: Смиривши, спаси мя, высокомудрием живущаго, рождшая Вознесшаго смирившееся естество наше, Пречистая.
Песнь 5
Ирмос: Утренююще, вопием Ти:/ Господи, спаси ны,/ Ты бо еси Бог наш,/ разве Тебе, иного не вемы.
Руце твои преподобно воздвизаеми к Зиждителю, мати Евтропие, низложиша вражия шатания.
Удержав руку твою десную Вышний, наставил тя есть, мати, к Небесному Своему наслаждению.
Стезю тесную прошедши в пощении, к широте приспела еси райстей, Евтропие всечестная.
Богородичен: Иже Богородицу Тя неведущии, Богомати, Света не имут видети Рождшагося из Тебе, Пречистая.
Песнь 6
Ирмос: Ризу мне подаждь светлу,/ одеяйся светом, яко ризою,/ Многомилостиве Христе Боже наш.
Умертвивши двизания плотская, над страстьми вельми воцарилася еси, и ныне, всечестная Евтропие, в безстрастных живеши светлостех.
Образу Спасову навыкла еси покланятися, славная, делы и словесы твоими спасительная Его соблюдающи учения.
Облак тя Христос показа, мати Евтропие, дождь источающий животный, верою просящим у тебе, преславная.
Богородичен: Красен паче всех человек Сын Твой, Пречистая, добротою Божества, аще и плоть бысть нас ради.
Кондак, глас 3
Монашеское житие от юности возлюбивши/ и во след Христа усердно потекши,/ постническими подвиги, бдением и молитвами/ страсти греховныя укротила еси/ и наставница многим к житию благочестному в земли Херсонстей явилася еси;/ темже всечестную твою память совершающе,/ благодарными гласы, веселящеся, вопием ти:/ Радуйся, мати наша, Евтропие преподобная.
Икос:
От юности твоея, и даже до престарения, телом и душею работала еси Господу Иисусу Христу и Пречистей Его Матери, и се ныне душа твоя ликовствует в Его Небесных обителех, мощи же твоя, зде почивающия, сияют чудесы. Сего ради вопием ти радостно: радуйся, во славу Христа Бога подвизавшаяся; радуйся, Пречистую Христа Матерь немолчно славившая; радуйся, от Христа и от Матере Его прославленная; радуйся, велие дерзновение ко Господу стяжавшая; радуйся, защитница края Херсонскаго; радуйся, мати наша, Евтропие преподобная.
Песнь 7
Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен еси, Господи Боже, во веки.
Евангельским словесем внемлющи, крест свой на рамена своя восприяла еси и Христу последовала еси, мати Евтропие, Тому непрестанно взывающи: благословен еси, Господи Боже, во веки.
Ублажаем тя, и чтим память твою, и молим тя присно: помяни нас, мати Евтропие, у Престола всех Царя, Емуже в житии твоем послужила еси, взывающи: благословен еси, Господи Боже, во веки.
Разум боголюбив стяжала еси, Евтропие, с плотию Ангелом уподобилася еси, бдящи тепле любовию и поющи: благословен еси, Господи Боже, во веки.
Богородичен: Виждь скорбь мою, Дево, юже ми наведе множество зол моих, и родства огненнаго исхити мя, вопиющаго: благословен еси, Господи Боже, во веки.
Песнь 8
Ирмос: Царя Небеснаго,/ Егоже поют вои Ангельстии,/ хвалите и превозносите во вся веки.
Украшена сиянием чистоты и чистым житием просвещена, мати, предстоиши Жениху твоему, Христу Богу нашему.
Болезни различныя врачует человеков и прогонит бесовския пакости тело твое святое, преподобная, во гробе преславно сокрываемое.
Священна жертва принеслася еси и приношение светлое, преподобная мати Евтропие, яко кадило благоуханное, всех Владыце Христу Богу нашему.
Богородичен: Без истления Слово паче словесе родила еси, тления всякаго нас избавляющаго, сего ради Тя, Дево, верою величаем.
Песнь 9
Ирмос: Воистину Богородицу/ Тя исповедуем,/ спасеннии Тобою, Дево Чистая,/ с Безплотными лики Тя величающе.
Постом и молитвою, мати Евтропие, себе очистивши, вся света исполнилася еси и дом Духа Святаго показалася еси.
Разум имела еси в твоей души, и смирение, и Божественную кротость, веру несумненну, и надежду, и любовь, яже к Богу, всенощными молитвами приближающися Ему, и тамо сущими светлостьми, блаженная Евтропие, озаряема и просвещаема.
Собрашася днесь людие хвалами возвеличити Господа, возвеличившаго твое святое торжество сие, в немже поминай нас, поминающих тя, предстоящи Христу, Жениху твоему, преподобная Евтропие и всечестная.
Богородичен: Пощади мя, Боже, рождейся от Девы и сохранив Рождшую Тя нетленну по рождестве, егда сядеши судити дела моя, беззакония и грехи моя презри, яко Безгрешен и Милостив Бог и Человеколюбец.
Светилен:
Избегла еси козней врага исконнаго, мати Евтропие, возгнушавшися его и мира сего прелести, и востекла еси в Небесныя чертоги,идеже ныне ликуеши со всеми преподобными .
Слава, и ныне, Богородичен:
День мне возсияй разумнаго веселия, Ты бо еси, Чистая, свет и живот сущих во тьме: хотению бо мощна еси, и еже творити имаши яко сущи всех Владычица, избави всех от бед и всех скорбящих от соблазн лукаваго.
На хвалитех стихиры, глас 2:
Приидите, вернии,/ с верою к преподобней,/ хвалебныя ей песни вознесем, веселящеся,/ да молитвами ея/ от страстей и бед избавление приемлем.
Похвальными песньми,/ священную раку твою обстояще,/ воспеваем тя и Божественнаго благоухания исполняемся, преподобная,/ смрада страстей избавляющеся;/ молися, молимся, Христу Богу/ даровати душам нашим мир и велию милость.
Тесным путем шествовавши,/ широты райския достигла еси,/ Евтропие досточудная,/ идеже ныне с лики святых дев ликующи,/ моли Человеколюбца Бога/ деснаго сподобитися стояния и нам/ в день Страшнаго Суда Христова.
Слезы постническая и лишения/ многою верою и любовию Христу принесла еси,/ мати Евтропие,/ и ныне дерзновение имаши/ молити о прощении грехов наших,/ просящи Церкви Правословней утверждения,/ земли Херсонстей благословения/ и всем людем велия милости.
Слава, глас 8:
Сошедшеся, вернии,/ память преподобныя Евтропии духовно празднуем,/ восхваляюще Христа Бога нашего;/ притецем верно к раце мощей ея/ и почерпнем телесем здравие,/ купно и душам спасение,/ и торжествуем светло/ во святую память ея.
И ныне, Богородичен, глас тойже:
Владычице, приими молитвы раб Твоих,/ и избави нас/ от всякия нужды и печали.
НА ЛИТУРГИИ
Прокимен, глас 4: Дивен Бог сво святых Своих,/ Бог Израилев.
Стих: В церквах благословите Бога, Господа от источник Израилевых.
Апостолк Галатом, зачало 208.
Аллилуиа, глас 1: Терпя, потерпех Господа, и внят ми.
Стих: И услыша молитву мою.
Евангелие от Луки, зачало 33.
Причастен: В память вечную будет праведник,/ от слуха зла не убоится.
Молитва
О преподобная мати Евтропие, великая подвижнице и всехвальная угоднице Христова! Приими моление нас, недостойных, с верою и любовию к тебе припадающих, и испроси у Великодаровитаго Христа Бога нашего земли Херсонстей и людем ея мир и благоустроение; на ниве Божией подвизающимся исходатайствуй у Господа нашего, да выну пребывают тщанием не лениви, духом горяще, Ему неленостно работающе и в молитвах усердствующе; православным христианом испроси в вере твердость и во благочестии постоянство; и всем с верою прибегающим к тебе и твоея помощи и заступления просящим подавай присно недугов исцеление, в скорбех утешение, во всем житии благопоспешение; наипаче же Господа умоли в мире и покаянии земное житие нам преити, мытарств горьких и мук вечных избавитися и Царство Небесное наследовати, идеже ты со всеми святыми Господу предстоиши, да выну славим Отца и Сына и Святаго Духа, ныне и в безконечныя веки. Аминь.
По благословению
митрополита Херсонского и Таврического Иоанна