Акафист великомученику ГЕОРГИЮ ПОБЕДОНОСЦУ

 

Дни памяти (н. ст.):

 

6 мая

16 ноября

23 ноября

9 декабря

 

 

Тропарь, глас 4

Яко пленных свободитель и нищих защититель, немощствующих врач, православных поборниче, Победоносче великомучениче Георгие, моли Христа Бога спастися душам нашим.

 

Кондак, глас 4

Возделан от Бога, показался еси благочестия делатель честнейший, добродетелей рукояти собрав себе: сеяв бо в слезах, веселием жнеши, страдальчествовав же кровию, Христа приял еси и молитвами, святе, твоими всем подаеши прегрешений прощение.

 

Кондак 1

Возбранному воеводе и победоносцу Георгию составим похвалу, яко ходатаю нашему и скорому помощнику; ты же, святый великомучениче, яко имеяй дерзновение ко Господу, от всяких нас бед свободи, да зовем ти: Радуйся Георгие, великий Победоносче.

 

Икос 1

Ангелов Творец и всея твари Содетель, явивый тя Церкви Своей веры поборника и за веру непобедимаго страстотерпца, внушает нам за подвиги страданий твоих восхваляти тя, святе Георгие, сице:

Радуйся, до конца Иисуса, Сына Божия, возлюбивый.

Радуйся, за имя Его с любовию душу свою положивый.

Радуйся, исповедниче, от Бога призванный.

Радуйся, подвижниче, Божиею благодатию прославленный.

Радуйся, Ангелов сожителю.

Радуйся, пророков равностоятелю.

Радуйся, Георгие, великий Победоносче.

 

Кондак 2

Видя гонение нечестивых на христианы, не убоялся еси козни их и мучительства, богомудре, но яко добрый воин Христов, вся своя нищим раздав, волею потекл еси на совет их неправедный, Христу, Вождю и Богу своему, поя: Аллилуиа.

 

Икос 2

Разумно уразумев Единаго Бога, в Триех Ипостасех боголепно покланяемаго, твердым умом исповедал еси Его на соборищи нечестивых, и тако обличил еси безумнаго царя безумное поклонение твари. Сего ради за твое высокое любомудрие приими от нас, Георгие, усердныя похвалы:

Радуйся, Единаго Истиннаго Бога проповедниче.

Радуйся, Пресвятая Троицы верный защитниче.

Радуйся, велию православнаго исповедания тайну неверным показавый.

Радуйся, идольскаго служения прелесть обличивый.

Радуйся, риторе божественный.

Радуйся, витие, премудрости исполненный.

Радуйся, Георгие, великий Победоносче.

 

Кондак 3

Сила Божия, просвещающая всякаго человека, грядущаго в мир, и в темнице тя страждущаго посетила есть, смиренномудре Георгие: понеже ты вся жития сего тленная яко уметы презрев, Единому Христу прилепился еси, да за имя Его добре воинствовав, сподобишися Тому со Ангелы вечно воспевати: Аллилуиа.

 

Икос 3

Имея ум и сердце Духом Святым озаренныя, ты по внушению Его поревновал еси подвизатися за имя Христово, до крове стоя бо мужественно в вере, обличил еси вознесенную нечестиваго соборища гордыню. Сего ради хвалим тя, всемудре Георгие, сице:

Радуйся, щите, воздвигнутый на охранение благочестия.

Радуйся, мечу, подъятый на посечение нечестия.

Радуйся, столпе веры.

Радуйся, стено и утверждение Христовы Церкви.

Радуйся, верных удобрение.

Радуйся, неверных страх и посрамление.

Радуйся, Георгие, великий Победоносче.

 

Кондак 4

Безумный мучитель, дышущий на тя убийством, страстотерпче Георгие, жаждал бо крове твоея, яко пес алчный, повелевая распяти на колесе тело твое и злейшим мукам предати; ты же, возмогая о Господе, с твердым упованием к Богу взывал еси: Аллилуиа.

 

Икос 4

Слышавше от тебе Диоклетиан и жрецы идольстии словеса премудрости, распыхахуся на тя злобою, паче же егда рекл еси: «О царю мучителю! Почто мя всуе истязуеши? Мне бо еже жити - Христос, и еже умрети - приобретение. Трудно ти есть против рожна прати». Сего ради мы взываем ти, великоимените Георгие, сице:

Радуйся, за мужественное исповедание веры на колесе кровь свою пролиявый.

Радуйся, кровию своею торжество веры возвеличивый.

Радуйся, апостолов соревнителю.

Радуйся, вольным Христовым страстем подражателю.

Радуйся, поборниче веры непоколебимый.

Радуйся, страстотерпче, адаманта твердейший.

Радуйся, Георгие, великий Победоносче.

 

Кондак 5

Боготечной звезде подобен был еси Георгие, чудесным бо от Ангела исцелением и видимым от колеса отрешением научил еси неверных веровати в Троицу Единосущную и Той купно с тобою воспевати: Аллилуиа.

 

Икос 5

Видеша народи чудеса силы Божия, яве на тебе бываемыя, с кротостию учение Христово от тебе прияша и возопиша, глаголюще: «Воистину велик Бог христианский!» Сего ради и мы, восхваляя тя, достославне Георгие, взываем сице:

Радуйся, светоносным спасения словом, тьму неверия разгнавый.

Радуйся, мученическим веры исповеданием неверныя ко Христу обративый.

Радуйся, легионы воинов земных в Небесное воинство предводяй.

Радуйся, яко воин Христов, с Небесными вои пребываяй.

Радуйся, ратоборцев славо.

Радуйся, пресветлаго мученическаго лика красото.

Радуйся, Георгие, великий Победоносче.

 

Кондак 6

Проповедником истины, духоносным Апостолом поревновав, крестом миру распялся еси, страстотерпче: се бо яко Иона во чрево китово, в пещь нерастворенныя извести стремглав ввержен был еси, да прославится тебе ради дивный во святых Господь, Емуже ты и в рове известнем, яко во храме славы, умно взывал еси: Аллилуиа.

 

Икос 6

Возсиявый в тридневном Своем от гроба востании всесильный ада и смерти Победитель Иисус, спасе тя от адова истления, страстотерпче Георгие: по триех бо днех обретоша тя в извести жива и в воздеянии рук поюща Бога; сего ради вельми пристрашни быша и ужасошася. Мы же, радующеся, восписуем ти победную песнь:

Радуйся, позорным в известный ров низвержением вознесенную диавола гордыню низложивый.

Радуйся, дивным от Бога спасением зверство мучителя победивый.

Радуйся, яко незлобив сый, за творивших ти напасть молился еси, яко за благотворцев.

Радуйся, яко о обращении их, якоже Павел о евреех, болезновал еси.

Радуйся, мужу желаний.

Радуйся, сосуде избранный.

Радуйся, Георгие, великий Победоносче.

 

Кондак 7

Хотяй всячески уловити сердце твое к прелести идол, нечестивый мучитель умышляет прельстити тя волшебными чаровании; ты же, богоизбранне, с Давидом восклицая: «О Бозе спасение мое и слава моя», - верно Тому пел еси: Аллилуиа.

 

Икос 7

Новое показа зло лукавый оный сатаны служитель Диоклетиан, егда в безумной своей ко идолом ревности повеле напоити тя, Георгие, ядом; ты же, исполнен сый веры и упования, аще и смертное испил, обаче без вреда пребыл еси, богохвальне. Темже и мы вопием ти:

Радуйся, яко в уповании на Бога жива не посрамился еси.

Радуйся, яко мучителя ни во чтоже вменил еси.

Радуйся, бесов отгнателю.

Радуйся, волшебныя козни разрушителю.

Радуйся, яко тобою дивен Бог во святых Своих является.

Радуйся, яко тобою благочестно имя Христово прославляется.

Радуйся Георгие, великий Победоносче.

 

Кондак 8

Странный и страшный совет бысть от некоего волхва нечестивому царю, да повелит ти, в доказательство правости веры Христовой, словом воскресити мертваго; ты же, Георгие, ничтоже сумняся, воспевал еси Тому, Иже несть Бог мертвых, но Бог живых: Аллилуиа.

 

Икос 8

Всежеланный и Сладчайший Иисус, Егоже ты всею душею и всем сердцем возлюбил еси, всеблаженне Георгие, слыша теплое веры твоея моление, вскоре повеле по слову твоему воскреснути мертвому, прославления ради имени Своего и верных утверждения, неверным же и ослепленным на удивление и богопознание. Сего ради по долгу вопием ти:

Радуйся, яко Господь сил дивная на тебе явил есть.

Радуйся, яко тобою мертваго от гроба воскресил есть.

Радуйся, ослепленному волхву умное веры прозрение даровавый.

Радуйся, многим, Христа ради пострадавшим, во святая святых путь показавый.

Радуйся, Рима удивление.

Радуйся, христианскаго рода возвышение.

Радуйся, Георгие, великий Победоносче.

 

Кондак 9

Вси Ангели восхвалиша Бога, даровавшаго ти таковое мужество, Георгие, яко и в темничном заточении не преставал еси молитвенно бодрствовати. Сего ради, яко великий таинник Божия благодати, удостоился еси видети в видении Господа, венцем нетления главу твою венчающа, да и мы с тобою вопием: Аллилуиа.

 

Икос 9

Ветии многовещаннии риторскими своими языки не возмогут изрещи тебе достойныя хвалы, Георгие, многих ради твоих подвигов и болезней, ихже за Христа и Церковь подъял еси волею. Сего ради и мы, недоумея восхваляти тя по достоянию, воспеваем сице:

Радуйся, вольным за Христа и Церковь страданием ветхаго в себе Адама распявый.

Радуйся, за доблестное страдание венец правды от руки Господни приявый.

Радуйся, правило ревности благочестивыя.

Радуйся, образе нищеты духовныя.

Радуйся, яко не себе, но Единому Христу добре угодил еси.

Радуйся, яко за Христа на многообразныя смерти готов был еси.

Радуйся, Георгие, великий победоносче.

 

Кондак 10

Спасти хотя души во тьме идолослуждения погибающих, боголюбче Георгие, ты, ревнуя, поревновал еси, яко Илия по Бозе: вшед бо во храм идольский, силою Божиею разгнал еси бесы, сокрушил идолы, посрамил жрецы, и, яко победитель, не с человеки, но со Ангелы пел еси Богу: Аллилуиа.

 

Икос 10

Стены безчувственнее, окамененный сердцем мучитель твой, Георгие, не уразуме Бога, яве тобою чудодействующа, но до конца пребыл есть, яко аспид, затыкая уши свои. Сего ради повеле усещи тя на позорищи во главу, яко злодея; ты же, болезнуя о погибели души его, радостно приял еси кончину, за нюже мы тя ублажаем любовию сице:

Радуйся, веру, надежду и любы до конца сохранивый.

Радуйся, во успении твоем многия и великия чудеса сотворивый.

Радуйся, оружием благоволения Божия венчанный на земли.

Радуйся, славою и велелепием украшенный на Небеси.

Радуйся, человече Божий.

Радуйся, добрый воине Христов.

Радуйся, Георгие, великий Победоносче.

 

Кондак 11

Пение Пресвятей Троице паче иных воздал еси, святый великомучениче Георгие, не словом точию и умом, но живым всего себе в жертву принесением: подражая бо распятому за ны непорочному Агнцу Христу, положил еси душу свою за други своя волею. Темже убо аще и недовольни есмы к похвалению таковыя твоея доблести, больше бо сея любве никтоже имать, обаче благодарни суще, поем Дивному во святых: Аллилуиа.

 

Икос 11

Светоприемный светильник истиннаго Света сущим на земли являешися, богоизбранне Георгие, просвещаеши бо сердца верных и к разуму Божественному вся наставляеши, поучая и нас весело взывати:

Радуйся, яко в пресветлых ангельских чертозех вселяешися.

Радуйся, яко не в гадании, но лицем к лицу невечерняго Троическаго Света причащаешися.

Радуйся, нищих питателю и обидимых защитниче.

Радуйся, немощных врачу и царей поборниче.

Радуйся, православным воином во бранех споборниче.

Радуйся, о спасении грешников теплый ходатаю.

Радуйся, Георгие, великий Победоносче.

 

Кондак 12

Благодать, данную ти от Бога, ведуще, память твою празднуем, великомучениче Георгие, и с усердным молением к чудотворному образу твоему притекающе, твоею всесильною о Господе помощию, яко необоримою стеною, ограждаемся. Сего ради, восхваляя тя, усердно зовем Богу: Аллилуиа.

 

Икос 12

Славную кончину твою поюще, еюже возвеличился еси, яко добрый воин Христов, молим тя, страстотерпче Георгие: буди нам во всем ко благу помощник и услыши ны, усердно взывающих ти:

Радуйся, яко тобою Церковь верных просвещается.

Радуйся, яко имя твое и между неверными прославляется.

Радуйся, дивная исповедников славо.

Радуйся, высокая мучеников похвало.

Радуйся, телес наших целебниче.

Радуйся, о душах наших молитвенниче.

Радуйся, Георгие, великий Победоносче.

 

Кондак 13

О всеблаженный и святый великомучениче Георгие, приими сие наше хвалебное пение и избави нас от всякаго зла твоим теплым к Богу ходатайством, да с тобою воспеваем: Аллилуиа.

 

(Этот кондак читается трижды, затем икос 1 и кондак 1)

 

Молитва

О всехвальный, святый великомучениче и чудотворче Георгие! Призри на ны скорою твоею помощию и умоли Человеколюбца Бога, да не осудит нас, грешных, по беззакониям нашим, но да сотворит с нами по велицей Своей милости. Не презри моления нашего, но испроси нам у Христа Бога нашего тихое и богоугодное житие, здравие же душевное и телесное, земли плодородие и во всем изобилие, и да не во зло обратим благая, даруемая нам тобою от Всещедраго Бога, но во славу святаго имени Его и в прославление крепкаго твоего заступления; да подаст Он стране нашей и всему боголюбивому воинству на супостаты одоление, изряднее же да оградит нас святых Ангел Своих ополчением, во еже избавитися нам по исходе нашем из жития сего от козней лукаваго и тяжких воздушных мытарств его и неосужденным предстати Престолу Господа славы. Услыши ны, страстотерпче Христов Георгие, и моли за ны непрестанно Триипостаснаго Владыку всех Бога, да благодатию Его и человеколюбием, твоею же помощию и заступлением обрящем милость со Ангелы и Архангелы и всеми святыми одесную Правосуднаго Судии стати и Того выну славити со Отцем и Святым Духом, ныне и присно, и во веки веков. Аминь.

 

ЖИТИЕ

Святой великомученик Георгий жил во времена правления римского императора Диоклетиана. Он был сыном богатых и благородных родителей, исповедовавших христианскую веру. Когда Георгий был еще ребенком, его отца замучили за исповедание Христа. Получивший блестящее образование и отличавшийся крепким телосложением, красотой и мужеством юноша уже в 20 лет стал одним из самых близких к императору людей. Но, почтив Георгия за выдающуюся храбрость званием воеводы, Диоклетиан не знал еще, какой он веры.

Но как же повел себя этот блистательный юноша, когда император задумал истребить всех христиан и при этом заменил практиковавшиеся виды пыток на более лютые, более жестокие муки?

Узнав, что это бесчеловечное решение не может быть отменено, святой Георгий понял, что наступило время, которое послужит для спасения его души. Раздав все имущество бедным и отпустив рабов на волю, Георгий предстал перед судом императора. Разъяренный царь приказал своим оруженосцам заключить святого Георгия в темницу, забить его ноги в колоды, а на грудь положить тяжелый камень. Через некоторое время  Диоклетиан приказал принести новоизобретенное орудие пытки - колесо c железными остриями. После колесования, когда все признали праведника мертвым, вдруг раздался удар грома и послышались слова: «Не бойся, Георгий! Я с тобою». Георгий, исцеленный Ангелом, сам сошел с колеса, прославляя Бога.

Наблюдавшие за страданиями великомученика царские сановники Анатолий и Протолеон, а также царица Александра, увидели чудесное спасение и также объявили себя христианами. Обоих вельмож за исповедание Христа царь приказал казнить, царицу Александру - запереть во дворце, а святого Георгия засыпать негашеной известью. На третий день император велел выкопать кости мученика, думая, что он сгорел во рве. Но слуги, разгребавшие известь, нашли святого Георгия невредимым и привели к царю.

Тогда Диоклетиан приказал надеть на ноги святого Георгия сапоги с раскаленными гвоздями внутри. В этой обуви мученика гнали до самой темницы с побоями и руганью. Святого Георгия вновь заключили в темницу. Сюда к нему стали приходить люди, видевшие его чудеса и обратившиеся к христианству. Золото открывало им тюремные двери, и для приходящих мрачная темница стала светочем Истины, источником Слова Божия. Многие за исповедание Христа приняли мученическую смерть. Среди них святые мученики Валерий, Донат и Ферин.

После этого советники царя просили осудить святого Георгия, говоря, что он привлекает к себе в темницу множество народа и своим колдовством отвращает от языческих богов к Распятому.

Тогда Диоклетиан приказал привести святого Георгия в храм Аполлона и в последний раз стал убеждать его принести жертвы идолам. Святой еще раз доказал бессилие языческих богов, и тогда толпа разъяренных язычников набросилась на него, требуя от императора смерти осужденного.

Святой Георгий, придя на место казни, помолился и с радостью склонил свою голову под меч 23 апреля (6 мая) 305 года.

Великомученик Георгий совершил множество подвигов . Из них, как самый славный, отмечается следующий.

На родине святого, у города Бейрута, находилось озеро, в котором жил огромный и страшный змей. Выходя из озера, он пожирал людей и опустошал окрестности. Чтобы умилостивить грозное чудовище, жители по совету жрецов стали, бросая жребий, отдавать своих детей в жертву змею.

Дошла, наконец, очередь и до единственной дочери царя. Девушку, отличавшуюся невиданной красотой, привели к озеру и оставили на обычном месте. В то время, как народ издали смотрел на царевну, ожидая ее гибели, - вдруг явился святой Георгий на белом коне и с копьем в руке. Увидев змея, он устремился на чудовище и ударил его копьем в гортань. После чего велел девушке связать змея поясом и вести в город.

3а победу над змеем и за мужество в страдании святой Георгий стал называться Победоносцем. Святой великомученик Георгий считается покровителем и защитником воинов. На иконах обычно изображается сидящим на белом коне и поражающим змея копьем.

Части мощей великомученика Георгия хранятся сейчас во многих храмах мира. В городе Лидда (ныне Лод), где прошло детство святого Георгия, над местом его погребения был воздвигнут храм, сохранившийся до наших дней. Глава великомученика Георгия хранится в  Риме, в храме его имени (Сан-Джорджио-ин-Велабро).

 

По благословению

митрополита Херсонского и Таврического Иоанна