День памяти: 12 / 25 июня
Тропарь, глас 4
Мир оста́вил еси, Пе́тре, Господа ради своего и, крест восприи́м на ра́мо свое, на го́ру дости́гл еси Афонскую, якоже дре́вле фесви́тянин Илия́, и в ней пребы́в поще́нием, и молитвами, и бде́нием, Бога ми́лостива творя́, и Пречистую Богородицу Моле́бницу предлага́я; сего́ ради вопием ти: моли́ Христа Бога, да спасет ду́ши наша.
Кондак, глас 2
Удали́в себе челове́ческаго сожи́тельства, в пещерах ка́менных и разсе́линах пожи́л еси, жела́нием Божественным и любовию, Пе́тре, Господа твоего, от Него́же вене́ц прия́л еси; моли непрестанно спастися нам.
Кондак 1
Избра́нный угодниче Христов и великий подвижниче Афонский, преподобне отче Пе́тре, крепкий в вере, ди́вен в терпении, и благодати Божией испо́лненный, восхваляем тя любовию, молитвенника о нас усерднаго. Ты же, яко имея дерзновение ко Господу, моли избавитися нам от бед и зол, да зовем ти: Радуйся, Пе́тре, Горы́ Афонския пустынножи́телю.
Икос 1
Ангельское житие на земли́ показал еси, преподобне, слезами покаяния грехи своя омы́в, молитвенным подвигом добродетели стяжал еси. Сего ради взываем ти со умилением:
Радуйся, подви́жническое житие возлюби́вый.
Радуйся, постом и молитвою себе укрепи́вый.
Радуйся, слезами покаяния душу свою очи́стивый.
Радуйся, темни́чное заточе́ние безро́потно претерпе́вый.
Радуйся, святителем Николаем ко спасению наста́вленный.
Радуйся, Богоприимцем Симеоном от уз и темницы изба́вленный.
Радуйся, Пе́тре, Горы́ Афонския пустынножи́телю.
Кондак 2
Видя Господь желание твое к подвигу и́ноческому, низпосла́ ти помощь с Небесе: святителем бо Николаем и Богоприи́мцем Симеоном изба́влен был еси, Петре, от уз темни́чных, да, ше́дше путем покаяния, смиренно вопиеши Богу: Аллилуия.
Икос 2
Разум Божественный просвети сердце твое, Пе́тре, егда ше́ствовал еси в Рим, да при гробе первоверхо́внаго апостола и́ноческий образ восприе́млеши. Сего ради вопием ти си́це:
Радуйся, апостолу Петру духовно сро́дный.
Радуйся, вере его и ревности подража́вый.
Радуйся, святителем Римским во и́ночество облече́нный.
Радуйся, смирению, кротости и воздержанию им науче́нный.
Радуйся, житие по́стническое избра́вый.
Радуйся, от мира всеце́ло удали́выйся.
Радуйся, Пе́тре, Горы́ Афонския пустынножи́телю.
Кондак 3
Силою Вы́шняго наставляемый, приста́л еси, Пе́тре, ко Святей Горе Афонстей, яко к месту и́ноческаго жи́тельства твоего, повеление Царицы Небесныя исполняя, Богу же вопия: Аллилуия.
Икос 3
Имея Матерь Божию Наставницею и Путеводи́тельницею, обре́л еси, Пе́тре, место спасения в пусты́ни Афонстей, идеже пятьдеся́т и три ле́та в уедине́нии пожи́л еси, с Единым Богом в молитве пребывая. Темже вопием ти:
Радуйся, Богородицею наставляемый.
Радуйся, в пусты́ни от мира сокрове́нный.
Радуйся, постом и молчанием укрепи́выйся.
Радуйся, Небесною ма́нною пита́выйся.
Радуйся, во бра́ни духовней неосла́бный.
Радуйся, Афона молитвенниче неусы́пный.
Радуйся, Пе́тре, Горы́ Афонския пустынножителю.
Кондак 4
Бурю бесовских искушений воздви́же на тя враг рода человеческаго, ты же, преподобне, молитвою и постом вся ко́зни его отража́л еси, Победителю ада, Христу, вопия: Аллилуия.
Икос 4
Слышаще о святем и богоугоднем житии твоем, отче преподобне, умиляемся сердцем и душею, ты бо, оста́вль вся мирска́я и привре́менная, Единому Богу работати вожделе́л еси, и нас науча́еши пра́вою стезе́ю ше́ствовати ко спасению. Сего ради взываем ти:
Радуйся, яко суеты́ мирския избе́гл еси.
Радуйся, яко к житию с миром Ангельским восте́кл еси.
Радуйся, Богородицу выну Заступницею име́вый.
Радуйся, молитвою вся ко́зни диавольския разруши́вый.
Радуйся, терпением врага победи́вый.
Радуйся, смирением землю кротких насле́дивый.
Радуйся, Пе́тре, Горы́ Афонския пустынножи́телю.
Кондак 5
Боготе́чная звезда явился еси в тече́нии твоем, отче Пе́тре, еже ты совершал еси в пусты́нях Афона, свое спасение устроя́я; примером же подвигов твоих и́ночествующих назида́я, науча́еши благоприятно пети Богу: Аллилуия.
Икос 5
Ви́дяще веру твою и труды подви́жническия, отче преподобне, Мати Божия дарова́ ти утешение - ма́нну Небесную, да укрепляется дух твой и утружде́нное в по́двизе тело твое. Мы же, ве́дуще сия, взываем ти:
Радуйся, от земны́х отреши́выйся.
Радуйся, Небесными дарова́нии обогати́выйся.
Радуйся, смирению Христову подража́вый.
Радуйся, воли своея отсече́нием духа гордыни низложи́вый.
Радуйся, нищету духовную возлюби́вый.
Радуйся, Богу совершенно угоди́вый.
Радуйся, Пе́тре, Горы́ Афонския пустынножи́телю.
Кондак 6
Проповедником многотру́днаго жития твоего, преподобне Пе́тре, бысть человек не́кий, иже обре́т тя в пусты́ни Горы́ Афонския, яко сокровище многоце́нное, и много назида́ния ко спасению от тебе слышав, возопи Богу, дивному во святых Своих: Аллилуия.
Икос 6
Возсиял еси, яко звезда пресветлая, отче преподобне, наставляя светом подвигов твоих всех хотящих спастися; наипа́че же подвиза́ющиися в вертогра́де Богородицы, Святей Горе Афонстей, подражати житию твоему тща́тся, вопиюще тебе таковая:
Радуйся, сосуде Божия благодати.
Радуйся, мона́шествующих славо и похвало.
Радуйся, кла́дезю глубокий смирения.
Радуйся, Ангелов собеседниче достойный.
Радуйся, и́ночествующим помощниче богодарова́нный.
Радуйся, Пе́тре, Горы́ Афонския пустынножи́телю.
Кондак 7
Хотя́й Всеви́дец Господь прославити тя, блаженне Пе́тре, показа́ миру подви́жническое житие твое, да не сокрыт будет под спу́дом свет добродетелей твоих, но, на све́щнице поста́влен, да све́тит всем верным, вопиющим: Аллилуия.
Икос 7
Новое зна́мение милости Своея яви Господь, егда по преставлении твоем, отче преславне, от земных трудов в покой Небесный, дарова́ нам благоухания испо́лненныя святыя мощи твоя, да вси притекающии к тебе и богоугодным житием твоим назида́ющиися вопиют ти си́це:
Радуйся, угодниче Божий предивный.
Радуйся, явлением мощей твоих просла́вленный.
Радуйся, смерть вкуси́вый, тления же не позна́вый.
Радуйся, венец безсмертныя жизни получи́вый.
Радуйся, житием твоим верных ко спасению наставля́яй.
Радуйся, пред Престолом Божиим о нас хода́тайствуяй.
Радуйся, Пе́тре, Горы́ Афонския пустынножи́телю.
Кондак 8
Странствие земное богоуго́дне совершив, преподобне Пе́тре, свято и праведно почил еси о Господе сном смерти, еже бысть тебе прехожде́ние от трудов на покой вечный, водвори́лся бо еси со святыми в Небесных обителех воспевати Богу вечно хвалебную песнь: Аллилуия.
Икос 8
Весь распали́лся еси любовию ко Христу и Пречистей Его Матери и, вся земна́я во уме́ты вмени́в, душею и сердцем вожделе́л еси наслаждатися лицезре́нием Божиим. Темже, пребывая ныне во славе Небесней, не забуди и нас, те́пле молящихся тебе и взывающих таковая:
Радуйся, дивный таи́нниче Божиих откровений.
Радуйся, и́ноческаго жития правило.
Радуйся, веры и благочестия наставниче.
Радуйся, во бра́ни духовней спобо́рниче.
Радуйся, отчаянных заступниче.
Радуйся, печальных уте́шителю.
Радуйся, Пе́тре, Горы́ Афонския пустынножи́телю.
Кондак 9
Вся чи́ны Ангельския удивишася терпению твоему, преподобне, и любви ко Господу неугаси́мей; ты же, многими труды́ твоими от силы в силу восходя́, чистым сердцем воспевал еси: Аллилуия.
Икос 9
Вити́йство человеческое не возможет достойно восхвалити труды твоя, отче Пе́тре, ты бо путе́м те́сным и приско́рбным ко Господу твоему до конца дней твоих ше́ствовал еси, многия скорби и лишения безро́потно претерпева́я. Но мы, благогове́ния исполня́еми, дерзаем воспети тебе:
Радуйся, Небеснаго чертога наследниче.
Радуйся, веры истинныя светильниче.
Радуйся, Афона украшение.
Радуйся, мона́шествующих утверждение.
Радуйся, молитвенниче о нас пред Богом неусы́пный.
Радуйся, предста́телю о всех чтущих тя дерзнове́нный.
Радуйся, Пе́тре, Горы́ Афонския пустынножи́телю.
Кондак 10
Спасти хотя ду́шу, о теле твоем нераде́л еси, отче преподобне, но постом, бдением, непрестанною молитвою и трудами плоть твою удруча́л еси, воспевая Богу, в по́двизе тя укрепляющему: Аллилуия.
Икос 10
Стена и покров еси всем с верою к тебе притекающим и в помощь во бра́ни со страстьми́ тя призывающим, преподобне Пе́тре; темже услыши нас, грехми́ и скорбя́ми многими обремене́нных и тако ти взывающих:
Радуйся, в беда́х скорый помощниче.
Радуйся, заблуждших путеводи́телю.
Радуйся, о кающихся молитвенниче.
Радуйся, о подвиза́ющихся предста́телю.
Радуйся, душевных и телесных недугов целителю.
Радуйся, скорбящих и во обстоя́нии сущих уте́шителю.
Радуйся, Пе́тре, Горы́ Афонския пустынножи́телю.
Кондак 11
Пение молитвенное приносим ти, отче всехвальне Пе́тре, твоею бо стезе́ю многия ходити позна́ша, и сего ради, по глаголу Богоматере, Гора Афонская воистину место спасения явися, в ней бо многия преподобнии отцы в подвизе просия́ша, вопиюще Богу: Аллилуия.
Икос 11
Светоно́сныя подвиги твоя воспевающе, преподобне отче, ублажаем тя, яко славнаго наставника монахов и чу́днаго собеседника Ангелов, ныне на Небеси Престолу Божию предстоя́щаго и о подвиза́ющихся на Горе Афонстей и о всех нас моля́щагося, с любовию зовущих ти:
Радуйся, пустынножи́тельства на Афоне первонача́льниче.
Радуйся, и́ноческаго равноа́нгельнаго жития светильниче.
Радуйся, слез твоих тече́ньми всего себе омы́вый.
Радуйся, блажентсво пла́ча о гресе́х позна́вый.
Радуйся, ра́бе Божий, благи́й и верный.
Радуйся, скорбьми́ многими в радость Господа твоего вше́дый.
Радуйся, Пе́тре, Горы́ Афонския пустынножи́телю.
Кондак 12
Благодатныя да́ры испроси нам у Бога, преподобне отче Пе́тре, вонми́ воздыханием нашим, умоли Господа утоли́ти лю́тыя страсти наша, да чистою душею ку́пно с тобою сподобимся воспевати во Царствии Небеснем: Аллилуия.
Икос 12
Поюще Великодарови́таго Бога нашего, прославляющаго святыя Своя, веруем, яко много может молитва праведнаго ко Господу, и сего ради просим тя, преподобне: буди о нас хода́таем у Престола Живонача́льныя Троицы, вопиющих ти си́це:
Радуйся, чистоты сердечныя хранителю.
Радуйся, заповедей Божиих усердный де́лателю.
Радуйся, послушания прехвальный рачи́телю.
Радуйся, житию безплотных поревнова́телю.
Радуйся, тело твое постом умертви́вый.
Радуйся, душу твою бде́нными молитвами оживи́вый.
Радуйся, Пе́тре, Горы́ Афонския пустынножи́телю.
Кондак 13
О преславный и досточу́дный угодниче Божий, преподобне отче Пе́тре! Приими́ усердное сие моление наше и умоли Всемилостиваго Господа избавити нас от всяких зол и напа́стей в жизни сей, и от мучений в будущем ве́це, да сподобимся в обителех Небесных со Ангелы и всеми святыми воспевати Ему: Аллилуия.
(Этот кондак читается трижды, затем икос 1 и кондак 1)
Молитва
О священная главо, преподобне отче Пе́тре! Не забуди убогих твоих до конца, но поминай нас во святых своих и благоприятных молитвах к Богу. Моли за ны, отче священный, за дети твоя духовныя, яко име́яй дерзновение к Небесному Царю, не премолчи́ за ны ко Господу и не пре́зри нас, верою и любовию чтущих тя; поминай нас у Престола Вседержи́телева, и не преста́й моля́ся о нас ко Христу Богу, ибо дана́ тебе бысть благодать за ны молитися. Не отступай от нас духом, сохраняя нас от стрел вражиих, и всякия пре́лести бесовския, и ко́зней диавольских, пастырю наш добрый. Ве́дуще бо тя воистину и по смерти жи́ва суща, тебе припа́даем и тебе молимся: молися о нас Всесильному Богу о пользе душ наших и испроси нам время на покаяние, да невозбра́нно пре́йдем от земли́ на Небо, от мыта́рств же горьких, бесо́в, воздушных князе́й и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.
ЖИТИЕ
Преподобный Петр Афонский, родом грек, служил воеводой в императорских войсках и жил в Константинополе. В 667 году во время войны с сирийцами Петр был взят в плен и заключен в крепости города Самары на реке Евфрате.
Долгое время он томился в темнице и размышлял о том, за какие грехи подвергся наказанию Божию. Петр вспомнил, что однажды имел намерение оставить мир и уйти в монастырь, но так и не исполнил его. Он стал соблюдать в темнице строгий пост, усердно молиться и просил у святителя Николая Чудотворца заступничества перед Богом. Святитель Николай явился святому Петру во сне и дал совет призывать на помощь святого Симеона Богоприимца. Укрепляя узника в терпении и надежде, святитель еще раз являлся ему во сне. В третий раз он явился вместе со святым Симеоном Богоприимцем наяву. Святой Симеон коснулся жезлом цепей Петра, и железо при этом растаяло, словно воск. Двери темницы раскрылись, и Петр вышел на свободу. Святой Симеон Богоприимец стал невидим, а святитель Николай проводил Петра до границы греческой земли. Напомнив об обете, Святитель Николай также стал невидим. Для принятия иноческого образа Петр ушел в Рим. Святитель Николай не оставил его без своей помощи: он явился во сне Римскому папе и рассказал об обстоятельствах освобождения Петра из плена, наказав папе постричь бывшего узника в монашество.
На следующий день, при многолюдном стечении народа во время богослужения, папа громко сказал: "Петр, пришедший из греческой земли, которого святитель Николай освободил в Самаре из темницы, приди ко мне". Петр предстал перед папой, который постриг его в монашество при гробнице апостола Петра. Папа учил Петра правилам иноческой жизни и держал инока при себе. Потом он с благословением отпустил Петра туда, куда Бог благоволит его направить.
Святой Петр сел на корабль, плывший на восток. Во сне Петру явилась Пресвятая Богородица и указала место, где он должен был жить до конца своих дней – Святую Гору Афон. Когда корабль проплывал мимо Афона, то остановился сам по себе. Святой Петр понял, что в этом месте ему надлежит сойти, и сошел на берег. Это было в 681 году. Преподобный Петр провел в пустынных местах Святой Горы, не видя никого из людей, 53 года. Одежда его истлела, а волосы и борода отросли и покрыли тело вместо одежды.
В первое время преподобный Петр многократно подвергался бесовским нападениям. Но горячей молитвой к Богу и Матери Божией он побеждал бесовские козни.
Однажды Матерь Божия явилась преподобному Петру во сне вместе со святителем Николаем и сказала мужественному отшельнику, что каждые 40 дней Ангел будет приносить ему небесную манну. С того времени преподобный Петр 40 дней постился, а на сороковой день подкреплялся небесной манной, получая крепость на дальнейшее сорокадневное воздержание.
Однажды охотник, гнавшийся за оленем, увидел нагого человека, обросшего волосами и препоясанного по чреслам листвой. Он испугался и бросился бежать. Преподобный Петр остановил его и рассказал о своей жизни. Охотник просил позволения остаться с ним, но святой отослал его домой. Преподобный Петр дал охотнику год для самоиспытания и запретил рассказывать о встрече с ним.
Через год охотник возвратился с братом, одержимым бесом, и другими спутниками. Когда они вошли в пещеру преподобного Петра, то увидели, что он уже преставился к Богу. Охотник с горьким плачем рассказал своим спутникам о жизни преподобного Петра, а его брат, как только прикоснулся к телу святого, получил исцеление. Преподобный Петр скончался в 734 году.
Святые мощи преподобного Петра Афонского находились на Афоне в обители святого Климента. Во время иконоборчества они были сокрыты, а в 969 году перенесены во Фракийское селение Фотоками. В настоящее время части мощей преподобного находятся в монастыре Дохиар на Афоне, в монастыре св. Игнатия на о. Лесбос, в монастыре апостола Иоанна Богослова на о. Патмос и в некоторых других храмах христианского мира.
С именем преподобного Петра Афонского связан священный завет Матери Божией о Своем земном уделе – Святой Горе Афон, который и поныне остается в силе: "Во Афонстей Горе будет покой его, то бо есть жребий Мой от Сына Моего и Бога, данный Мне, да отлучающийся мирских молв и емлющийся духовных по силе своей подвигов, верою же и любовию от души призывающий имя Мое, тамо временное свое житие проводят без печали, и богоугодных ради дел своих жизнь вечную получат: зело бо люблю то место и хощу на том умножити чин иноческий, и милость Моего Сына и Бога имущим тамо иночествовати не разорится во веки, аще и они соблюдут спасительныя заповеди; и распространю их в Горе на юг и север, и возобладают ею от мира до мира, и имя их во всей подсолнечной хвально сотворю и защищу тех, иже тамо терпеливно в постничестве подвизатися будут".
По благословению
митрополита Херсонского и Таврического Иоанна