Празднование:
6 / 19 марта
Понедельник Светлой седмицы
Тропарь, глас 6
Что Тя нарече́м, о Благодатная? Небо, яко возсияла еси Солнце Правды; Рай, яко прозябла́ еси Цвет нетления; Деву, яко пребыла́ еси нетленна; Чистую Матерь, яко имела еси на святых Твоих объятиях Сына, всех Бога, Того моли спастися душа́м нашим.
Кондак, глас 6
Не и́мамы ины́я помощи, не и́мамы ины́я надежды, разве Тебе, Владычице, Ты нам помози́, на Тебе надеемся и Тобою хвалимся, Твои бо есмы́ раби, да не постыдимся.
Кондак 1
Избра́нней от всех родов Божией Матери и Царице, Благодатным Небом нами именуемой, телесе́м нашим и душа́м спасение подающей, благодарственное пение приносим Ти, Богородице; Ты же, яко иму́щая милосердие неизреченное, от всяких нас бед и грехов свободи, да зовем Ти: Радуйся, Владычице, Благодатное Небо, радость и спасение нам да́рующая.
Икос 1
Ангели и праведных ду́ши удивишася, егда предстала еси пред Сыном Твоим и Богом и многим молением хода́тайствовала о людех, во гресех пребывающих. Мы же очи́ма веры толи́кое Твое благоутробие зряще, со умилением взываем Ти си́це:
Радуйся, молитвы всех христиан приемлющая.
Радуйся, и самых отчаянных грешников моления не отвергающая.
Радуйся, к Сыну Твоему о них предста́тельствующая.
Радуйся, нечаянную радость спасения им подающая.
Радуйся, предста́тельством Твоим весь мир спасающая.
Радуйся, вся наша печали утоляющая.
Радуйся, житие наше добре устрояющая.
Радуйся, избавление от грехов всем человеком принесшая.
Радуйся, Владычице, Благодатное Небо, радость и спасение нам да́рующая.
Кондак 2
Видящи Пречистая люди грешныя, с верою и упованием пред честно́ю Ея иконою до́лу поверга́ющияся и слезно молящихся о гресех своих, внят молению их, да вси, зряще Ея ма́тернее милосердие, на Небеси и на земли́ вопиют Богу: Аллилуия.
Икос 2
Разум человеческий воистину превосходит любовь Твоя к роду христианскому, о немже мо́лишися Сыну Твоему и Богу. Мы же, зряще Тя неотступную Предстательницу за нас, грешных, со слезами вопием:
Радуйся, Заступнице усердная рода христианскаго, от Бога нам дарова́нная. Радуйся, Путеводительнице наша, к Небесному отечеству нас возводя́щая.
Радуйся, верных ограждение и прибежище.
Радуйся, помоще всех призывающих имя Твое святое.
Радуйся, презре́нных и отве́рженных от ро́ва погибели исхищающая. Радуйся, тех на путь правый обращающая.
Радуйся, непрестанное уныние и мрак душевный отгоняющая.
Радуйся, оставленных врачами на Свои всемощныя ру́це приемлющая.
Радуйся, Владычице, Благодатное Небо, радость и спасение нам да́рующая.
Кондак 3
Сила благодати предстательством Твоим, Пречистая, преизоби́лует та́мо, иде́же умножися грех, да радуются на Небеси Ангели о грешницех кающихся, поюще пред Престолом Божиим: Аллилуия.
Икос 3
Имущи к роду христианскому ма́тернее милосердие, всем с верою и упованием прибегающим к Тебе подаеши руку помощи, Владычице, да вси единым сердцем и едиными усты́ славословие приносят Ти сицево́е:
Радуйся, яко Тобою к нам низходит Божие благоволение.
Радуйся, яко во всех беда́х и обстоя́ниих наших прино́сиши Сыну Твоему усердныя о нас молитвы.
Радуйся, яко и наша молитвы приятными Богу соде́ловаеши.
Радуйся, яко невидимых врагов от нас отгоняеши.
Радуйся, яко сердца́ злых человек умягчаеши.
Радуйся, яко от клеветы, досаждения и укорения нас изъимаеши.
Радуйся, яко Тобою вся блага́я желания наша исполняются.
Радуйся, яко много может молитва Твоя пред Сыном Твоим и Богом.
Радуйся, Владычице, Благодатное Небо, радость и спасение нам да́рующая.
Кондак 4
Бурю внутрь имея греховных помышлений, пред честно́ю иконою Твоею, Царице Небесная, преклоняем колена душ и телес наших и со умилением дерзновенно молимся Ти: спаси нас, о Мати милосердия, да не погибнем до конца во гресех наших, Ты бо еси всем грешником едина надежда и прибежище; преклонися убо на милость, Блага́я Мати, и умоли о нас Сына Твоего и Творца нашего, да непрестанно зовем Ему: Аллилуия.
Икос 4
Слышавше небожи́тели, яко молитвами Твоими пред Сыном Твоим прощение грехов и спасение на земли́ сущим грешником да́руется, прославляют Тя, благосердную Царицу Небесе и земли́. И мы, грешнии, уве́девше таковое Твое заступление о нас, недоуме́ем, како благохвали́ти Тя возможем по достоянию, из глубины́ се́рдца нашего умиленно воспеваем Ти си́це:
Радуйся, Споручнице спасения грешных.
Радуйся, падших востание.
Радуйся, Предстательнице к Богу, мир от бед спасающая.
Радуйся, яко гласа молитв Твоих бе́си трепещут.
Радуйся, яко Ангели сему радуются.
Радуйся, яко и нас, земноро́дных, сила молитв Твоих веселия исполняет.
Радуйся, яко те́ми от ти́ны грехов нас изымаеши.
Радуйся, яко пламень страстей наших угашаеши.
Радуйся, Владычице, Благодатное Небо, радость и спасение нам да́рующая.
Кондак 5
Боготечную звезду, чудотворную икону Матере Твоея показал еси нам, Господи, ибо, взирающе на образ Ея телесныма очи́ма, умом и сердцем к Первообра́зней возвышаемся и Ею к Тебе востека́ем, поюще: Аллилуия.
Икос 5
Видевше Ангели Хранители христиан, яко Божия Матерь споспешеству́ет им в наставлении тех, заступлении и спасении, потща́шася си́це возопити Честнейшей Херувим и Сла́внейшей без сравнения Серафим:
Радуйся, с Сыном Твоим и Богом вечно царствующая.
Радуйся, Ему всегда о роде христианстем моления принося́щая.
Радуйся, в христианстей вере и благочестии Наставнице.
Радуйся, ересе́й и тлетворных расколов Искоренительнице.
Радуйся, от растлевающих душу и тело соблазнов сохраняющая.
Радуйся, от опасных обстояний и внезапныя смерти избавляющая.
Радуйся, уповающим на Тя непостыдный конец жития да́рующая.
Радуйся, ма́терним Твоим предстательством от вечнаго мучения избавляющая.
Радуйся, Владычице, Благодатное Небо, радость и спасение нам да́рующая.
Кондак 6
Дивная дела милосердия Твоего, Пресвятая Дево, людем явле́нная, предаде́ пи́сьмени святый Димитрий Ростовский в научение и утешение всем верным, да и тии, во гресе́х, беда́х, ско́рбех и озлобле́ниих суще, на всяк день пред честны́м Твоим образом, «Благодатное Небо» именуемым, колена преклонят и, избы́вше бед, печалей и напа́стей, вопиют Богу: Аллилуия.
Икос 6
Возсия нам, яко пресветлая заря, чудотворная икона Твоя, Богомати, прогоняя тьму бед и скорбей от всех с любовию вопиющих Ти си́це:
Радуйся, Целительнице наша в болезнех телесных.
Радуйся, Блага́я Уте́шительнице, печали в радость претворяющая.
Радуйся, ненадеющихся несумне́нною надеждою возвеселяющая.
Радуйся, алчущих Питательнице.
Радуйся, нагих одеяние.
Радуйся, вдов Уте́шительнице.
Радуйся, безма́терних сиро́т незримая Воспитательнице.
Радуйся, неправедно гонимых и обидимых Заступнице.
Радуйся, Владычице, Благодатное Небо, радость и спасение нам да́рующая.
Кондак 7
Хотя Законодавец Правосудный Господь Сам быти закона Исполнитель и явити милосердия Своего бездну, преклонися на усердное моление Твое, Преблагословенная Мати Дево, о людех, во гресех пребывающих и милостей Божиих чающих, глаголя: «Закон повелевает, да сын чтит матерь. Аз Сын Твой, Ты же Мати Моя: Аз Тя должен чтити, послушая Твоего моления; проси́ убо, еже хо́щеши, о нихже мо́лишися: прощаются им греси́ Тебе ради». Мы же, видяще таковую силу молитвы Хода́таицы нашей о прощении согрешений наших, прославим милосердие и неизреченное благоутробие Ея, зовуще: Аллилуия.
Икос 7
Новое дивное и славное зна́мение всем верным явися, яко не токмо Матери Твоей, но и пречистому ли́ку Ея, на дске изображе́нному, силу чудотворения даровал еси, Господи; сему таинству дивящеся, во умилении се́рдца вопием к Ней таковая:
Радуйся, премудрости и благости Божия откровение.
Радуйся, веры утверждение.
Радуйся, благодати явление;
Радуйся, душеполезных знаний дарование.
Радуйся, душевредных учений низложение.
Радуйся, беззаконных навыков нетрудное преодоление.
Радуйся, слово премудрости прося́щим да́рующая.
Радуйся, несмысленных разумными соде́ловающая.
Радуйся, Владычице, Благодатное Небо, радость и спасение нам да́рующая.
Кондак 8
Видяще славная дела́ и многразли́чную премудрость Божию, в мире и житии нашем являемыя, предстательством Твоим пред Богом, о Небо Благодатное, Пречистая Владычице, устранимся земныя суеты́ и излишних житейских попечений и ум и сердце наше на Небеса возведем, поюще Богу: Аллилуия.
Икос 8
Вся в вышних пребывающи, и нижних никакоже отступила еси, Премилосердная Царице Небесе и земли́; аще бо по Успении Твоем и взошла еси на Небеса с пречистою Твоею плотию, обаче и грешныя земли́ не оставила еси, являющися Причастница Промышления Сына Твоего о роде христианстем. Сего ради Тя по долгу ублажаем:
Радуйся, сиянием пречистыя души́ Твоея всю землю просветившая. Радуйся, чистотою телесе Твоего вся Небеса возвеселившая.
Радуйся, о всем мире усердная Предстательнице.
Радуйся, всех нас при Кресте Сына Твоего усыновившая.
Радуйся, всегда ма́тернюю любовь к нам являющая.
Радуйся, всех даров духовных и телесных независтная Подательнице.
Радуйся, двери Царствия Христова верным отверзающая.
Радуйся, и на земли́ чистаго веселия сердца́ наша исполняющая.
Радуйся, Владычице, Благодатное Небо, радость и спасение нам да́рующая.
Кондак 9
Всякое естество Ангельское удивися делу Твоего милосердия, Господи, яко даровал еси толи́ко твердую и теплую Заступницу и Помощницу роду христианскому, нам невидимо спребыва́ющу, слы́шащу же о Тебе поющих: Аллилуия.
Икос 9
Вити́йство человеческое не возможет по достоянию благохвалити Тя, Пресвятая Богородице, и воспети неисче́тная чудеса Твоя, от иконы Твоея являемая, имиже православныя люди от бед, напа́стей и всякаго зла сохраняеши. Мы же, добре ве́дуще о многих чудотворениях, от честна́го ли́ка Твоего бывших, и потребная нам ко временней и вечней жизни приемлюще, с веселием Богородице взываем:
Радуйся, яко от священнаго ли́ка Твоего чудеса де́ются.
Радуйся, яко утаи́ся премудрость и благодать сия от мудрых и разумных века сего.
Радуйся, яко открыся та младенцем в вере.
Радуйся, яко прославляющих Тя прославляеши.
Радуйся, яко отвергающих Тя пред всеми посрамляеши.
Радуйся, яко от всякаго зла прибегающих к Тебе избавляеши.
Радуйся, яко вся болезни человеческия душевныя и телесныя милостивно врачуеши.
Радуйся, яко праведный гнев Божий на нас Твоим молением скоро утоляеши.
Радуйся, Владычице, Благодатное Небо, радость и спасение нам да́рующая.
Кондак 10
Спасти хотя ду́ши своя от вечныя смерти, мы, недостойнии чада Твоя, преклоньше колена своя пред пречистым Твоим образом, молим Тя, Небесная Царице и Милосердная Мати: сотвори нас причастными вечнаго блаженства в Небесном Царствии Сына Твоего, да поем Ему со всеми святыми: Аллилуия.
Икос 10
Стена необоримая и пристанище небурное Ты еси, Богородице Дево, всем к Тебе притекающим: темже и нас огради и покрый от всех враг видимых и невидимых, да, с верою и умилением поклоняющеся пречестне́й и цельбоно́сней иконе Твоей, вопием Ти:
Радуйся, сто́лпе и ограждение девства.
Радуйся, чистоты и целомудрия незримая Охранительнице.
Радуйся, сохраняющая и спасающая всех призывающих Тя.
Радуйся, к Сыну Твоему и Богу молитвы верных принося́щая.
Радуйся, и Сама непрестанно у Престола Его моля́щаяся о нас.
Радуйся, благодать Твоим иконам даровавшая.
Радуйся, всю вселенную лучами тех озаряющая.
Радуйся, рода христианскаго похвало и непостыдное упование.
Радуйся, Владычице, Благодатное Небо, радость и спасение нам да́рующая.
Кондак 11
Пение всеумиленное принося́ще Ти, недостойнии, просим Тебе, Дево Богородице: не презри гласа рабов Твоих, к Тебе бо в напа́стех и ско́рбех прибегаем и пред Тобою в беда́х наших слезы проливаем, поюще: Аллилуия.
Икос 11
Светозарная свеща́ сущим во тьме греха и юдо́ли плача явися предивная икона Твоя, Пречистая Владычице, всем бо притекающим к ней струи́ исцелений изливаеши и чудес заря́ми сердца́ верных веселиши, подвизающи взывати Тебе си́це:
Радуйся, Божественный Свет неизреченно родившая.
Радуйся, тьму смертную Рождеством Твоим просветившая.
Радуйся, страны нашея неусыпная Покровительнице.
Радуйся, верных пастырей Церкве ободряющая и вразумляющая.
Радуйся, людей православных Хранительнице.
Радуйся, богобоязненных и́ноков и и́нокинь присное утешение.
Радуйся, кающихся пред Богом грешников непостыдная Заступнице. Радуйся, радости Небесныя всем нам Подательнице.
Радуйся, Владычице, Благодатное Небо, радость и спасение нам да́рующая.
Кондак 12
Благодать Божественную испроси нам у Сына Твоего и Бога, простри́ нам руку помощи, отжени от нас всякаго врага и супостата, умири нашу жизнь, да не погибнем люте, без покаяния, но приими́ нас в вечныя кровы, Богородице, да, радующеся, поем Богу, Тобою нас спасающему: Аллилуия.
Икос 12
Поюще дивная Твоя чудеса, умильно припа́даем пред пречистым образом Твоим и, благоговейно лобызающе его, немо́лчными пе́сньми воспеваем Тя, Предивная Царице Небесе и земли́, и просим Тя, Владычице: услыши наше моление в час сей и благодать Твою нам низпосли́, с любовию вопиющим Тебе:
Радуйся, милостей Сына Твоего и Бога нас сподобляющая.
Радуйся, десную часть на Суде Сына Твоего молитвами Твоими нам уготовляющая.
Радуйся, грешников кающихся к покаянию ободряющая.
Радуйся, скорбным вдовицам и си́рым помогающая.
Радуйся, алчущих и жаждущих правды к Богу приводя́щая.
Радуйся, изнемогающих от уныния и печали скорая Утешительнице.
Радуйся, Церкве Православныя Нерушимая Стено и Небо Благодатное. Радуйся, страны́ нашея покрове и защищение.
Радуйся, Владычице, Благодатное Небо, радость и спасение нам да́рующая.
Кондак 13
О Всепетая Мати, Невместимаго Бога во чреве вместившая и Радость всему миру родившая! Нынешнее приими пение, вся наша печали на радость преложи, и от всякия избави напа́сти всех, и будущия изми́ муки о Тебе вопиющих: Аллилуия.
(Этот кондак читается трижды, затем икос 1 и кондак 1)
МОЛИТВА
О Пресвятая и Преблагословенная Мати Сладчайшаго Господа нашего Иисуса Христа! Припа́даем и покланя́емся пред святою иконою Твоею и смиренно молим Тя, всесильная рода нашего Заступнице: помози нам, немощным и грешным, и сподоби нас Твоего ма́терняго заступления и благопопечения. Спаси и сохрани, Владычице, под кровом милости Твоея Церковь Святую, град сей, страну нашу и всех нас, припа́дающих к Тебе с верою и любовию и умиленно прося́щих со слезами Твоего заступления. О Милостивая Мати, умилосердися на ны, обуреваемыя грехми́ многими, простри́ ко Христу Господу богоприи́мныя ру́це Твои и предстательствуй за нас пред благостию Его, прося́щи прегрешений наших прощения, благочестнаго мирнаго жития, благи́я христианския кончины и добраго ответа на Страшнем Суде Его, да, спасаеми всесильными Твоимы к Нему молитвами, блаженство райское унаследуем и со всеми святыми воспоем пречестно́е и великоле́пое имя Достопоклоня́емыя Троицы, Отца и Сына и Святаго Духа, и Твое ве́лие к нам милосердие во веки веков. Аминь.
ХЕРСОНСКАЯ ИКОНА ПРЕСВЯТОЙ БОГОРОДИЦЫ
«БЛАГОДАТНОЕ НЕБО»
Икона Божией Матери «Благодатное Небо» является главной святыней Успенского собора города Херсона.
До революции Успенский собор был богато украшен внутри: грандиозный иконостас, длиной 30 м. охватывал все три придела и в центральной части уходил вверх на 17 м. Он заключал в себе 50 икон, и только одна из них – Божией Матери «Благодатное Небо», на которой изображена Пресвятая Богородица с Богомладенцем Иисусом, стоящая на полумесяце, чудом сохранилась до наших дней.
После революции эта икона находилась в одном из музеев Херсона и на 200-летие освящения Успенского собора, которое праздновалось в 1998 году, она была возвращена Украинской Православной Церкви.
Через некоторое время после возвращения иконы произошло чудо – она обновилась. Обновление иконы Божией Матери верующие связывают с возвращением Успенского собора Украинской Православной Церкви и с началом реставрационных работ.
28 августа 2008 года, на праздник Успения Божией Матери и 210-летие со дня освящения Успенского собора, архиепископ Херсонский и Таврический Иоанн освятил венцы для иконы Божией Матери "Благодатное Небо». Венцы были изготовлены на пожертвования благодарных прихожан и благочестивых благодетелей.
В 2010 году, по ходатайству архиепископа Иоанна, Священным Синодом УПЦ было установлено празднование в честь Херсонской чудотворной иконы «Благодатное Небо» - в Понедельник Светлой седмицы.
По молитвам Божией Матери у иконы «Благодатное Небо» верующие получают благодатную помощь в исцелении от различных болезней, о даровании семейного благополучия, благополучном рождении детей, возвращении без вести пропавших, о помощи в учебе, работе и многих других житейских потребах.
Вот некоторые из свидетельств:
Елене К. из Херсона более 8 лет ничего не было известно о младшей сестре, которая после института уехала на работу заграницу. Елена молилась у иконы «Благодатное Небо» о возвращении домой сестры, и менее чем через 4 месяца сестра позвонила из аэропорта «Борисполь» о своем возвращении на Родину.
Светлана Г. из Херсона рассказывает: «21 сентября 2011 года, в праздник Рождества Богородицы, я, по совету мамы, просила Матерь Божию перед Ее иконой «Благодатное Небо» о даровании мне супруга и семейного благополучия. 20 апреля 2012 года я вышла замуж, счастлива в браке и уже жду ребенка».
В январе 2015 года Юлия П. из Харькова приехала в Херсон к своим родителям в гости. Вместе с мамой она молилась у иконы «Благодатное Небо» о семейном благополучии и даровании ребенка. В 2016 году она вышла замуж и 17 апреля 2017 года родила ребенка.
Татьяне Б. из Херсона был поставлен диагноз «бесплодие». Летом 2016 года она молилась Богородице у иконы «Благодатное Небо», чтобы стать матерью. Через три месяца, пройдя успешно лечение, она забеременела.
В 2012 году Елена Д. вместе с мужем обращалась с просьбой к Божией Матери о трудоустройстве. Через 2 недели ее мужа приняли на хорошую работу.
У Ольги Ж. из Новой Каховки была позвоночная грыжа, от чего она испытывала сильные боли. Находясь в Херсоне в больнице, она пришла в Успенский собор и молилась у иконы «Благодатное Небо» об облегчении болезни. В течение месяца боли прекратились, а также отпала необходимость в операции, на которой ранее настаивали врачи.
Херсонец Виктор Л. после открытия Успенского собора работал по его восстановлению. Тогда же он впервые увидел икону «Благодатное Небо» и стал обращаться к Божией Матери о даровании ему здоровья, т.к. у него хронически болели суставы. В соборе ему дали немного масла от неугасимой лампады, которая горит у этой иконы, и он с молитвой помазывал ним больные места. В течение нескольких лет Виктор практически излечился от этой болезни, хотя, по мнению врачей, она считается неизлечимой.
Прихожанка Успенского собора Ольга П. около 10 лет страдала болезнью коры головного мозга. После молитв у иконы «Благодатное Небо», в прошествии 3-х месяцев, боли прекратились и исчезли симптомы, сопровождающие данную болезнь.
По благословению
митрополита Херсонского и Таврического Иоанна