Празднование:
15 февраля (н. ст.)
Тропарь, глас 1
Радуйся, Благодатная Богородице Дево, из Тебе бо возсия Солнце Правды, Христос Бог наш, просвещаяй сущия во тьме. Веселися и ты, старче праведный, приемый во объятия Свободителя душ наших, дарующаго нам воскресение.
Кондак, глас 1
Утробу Девичу освятивый Рождеством Твоим и руце Симеоне благословивый, якоже подобаше, предварив, и ныне спасл еси нас, Христе Боже, но умири во бранех жительство и укрепи люди, ихже возлюбил еси, Едине Человеколюбче.
Кондак 1
Богомладенец Иисус, яко на облаце легце, во объятиях Пресвятыя Матере от Вифлеема в Иерусалим ныне носим бывает. Мы же, недостойнии, сретающе Царя Славы, с Симеоном старцем вопием: Иисусе, гряди в сретение души моея!
Икос 1
Да отверзется дверь Небесная днесь, Безначальное бо Слово Отчее, яко Младенец четыредесятодневен, Материею вольне приносится в церковь; сего ради зовем:
Иисусе безначальне.
Иисусе, Отцу единославне.
Иисусе единоначальне.
Иисусе несозданне.
Иисусе, гряди в сретение души моея!
Кондак 2
Украси твой чертог, Сионе, хвали Марию — Небесную дверь, Та бо престол Херувимский явися, носяще на руках Божия Сына, Егоже благовествуя, поем: Аллилуия!
Икос 2
Возсиявшаго прежде век от Отца принесе в церковь Неискусобрачная Мати, радостно вопия:
Иисусе, радости Моея исполнение.
Иисусе, сердца Моего веселие.
Иисусе, людем спасение.
Иисусе, Ангелов поклонение.
Иисусе, гряди в сретение души моея!
Кондак 3
Два птенца голубина, яко Начальника Ветхаго и Новаго завета, от Иосифа приемлет дары боголепно Церковь законная. Зряще Божие снизхождение, поем: Аллилуия!
Икос 3
Приими, Симеоне, — Всечистая вопияше, — во объятия Господа славы, яко Младенца, и Сему радостно возопий:
Иисусе, нас ради воплотивыйся.
Иисусе, яко тихий Свет невечерний открывыйся.
Иисусе, Истиною мирови явивыйся.
Иисусе, пророками провозвестивыйся.
Иисусе, гряди в сретение души моея!
Кондак 4
Богомладенца Иисуса видев, Симеон вопияше: страшуся и боюся руками объяти Тя, Владыко, но мира Твоего ищай, вопию со трепетом: Аллилуия!
Икос 4
Лик Ангельский да удивится чудеси, зря неизреченное Божие снизхождение: Егоже бо трепещут Силы Небесныя, ныне объемлют руце Симеоновы, Емуже вопиет:
Иисусе, отпусти ныне раба Твоего.
Иисусе, чаяние народа моего.
Иисусе, мирови просиявый.
Иисусе, мир в душу пославый.
Иисусе, гряди в сретение души моея!
Кондак 5
Глаголи, Симеоне, чесо в церкви Божией стоиши, со трепетом духом радуешися? Боговидец сподобился еси ныне быти, Зиждителя и Господа своего приемлеши, Сему радостно возопий: Аллилуия!
Икос 5
Во пророцех виден был еси Иисусе, якоже можно Тебе видети, ныне плотию всему миру явился еси волею; сего ради вопием:
Иисусе, како Себе Самому, яко Отроча, свято приносишися?
Иисусе, како плотию младенствуеши?
Иисусе, како во храм вносишися?
Иисусе, како всю тварь содержиши и руками Симеоновыми объемлешися?
Иисусе, гряди в сретение души моея!
Кондак 6
Со Отцем на Престоле Присносущий, пришел еси на землю, от Девы родився, Симеоном во объятия приемлешися, веселиши раба Твоего, поющаго: Аллилуия!
Икос 6
Видеша очи мои спасение Твое, от века таинство сокровенное, отпусти раба Твоего к нестареемей жизни, поющаго Ти:
Иисусе, Егоже трепещут Херувими.
Иисусе, Егоже благословляют Серафими.
Иисусе, Егоже славят Ангели.
Иисусе, Емуже кланяются Архангели.
Иисусе, гряди в сретение души моея!
Кондак 7
Крепитеся, руце Симеони, Христа в церкви, яко Младенца, держаще, Емуже, вернии, возопийте: Аллилуия!
Икос 7
Веселитеся, Небеса, радуйся, земля, исполнися хваления, Симеоне, зовый Ему:
Иисусе, жизни Источниче.
Иисусе, Человече видиме и Боже совершенне.
Иисусе, всю тварь премудростию сотворивый.
Иисусе, свет от тьмы разделивый.
Иисусе, гряди в сретение души моея!
Кондак 8
Сиону камень возложился еси, Господи, непокоривым претыкание, верных нерушимое спасение, Егоже восприявше, поем: Аллилуия!
Икос 8
Богородице Дево, Твое сердце оружие пройдет, — Симеон Пречистей возгласи, — на Кресте бо узриши Сына Твоего, Емуже воспоим:
Иисусе, землю на водах утвердивый.
Иисусе, море песком оградивый.
Иисусе, жертву о нас сотворивый.
Иисусе, мое естество освятивый.
Иисусе, гряди в сретение души моея!
Кондак 9
Свет во откровение языков явился еси, Господи, начало изъявления новыя благодати, Тебе вси поем: Аллилуия!
Икос 9
Анна пророчица, дщи Фануилева, прииди и стани с нами, благодари Христа Господа:
Иисусе, Агнче присно закалаемый.
Иисусе, всем благочестивым яко Хлеб Жизни подаваемый.
Иисусе, николиже иждиваемый.
Иисусе, Сыном Человеческим нарицаемый.
Иисусе, гряди в сретение души моея!
Кондак 10
Приидем, вси, Божественными песньми Христа прославим, приимем, якоже Симеон приял Его, и радостно воспоим: Аллилуия!
Икос 10
Людие православнии, славу Эммануила зряще, ныне ликуйте:
Иисусе, верою Тя поющих сохрани.
Иисусе, в храме стоящих спаси.
Иисусе, хвалу нашу приими.
Иисусе, сердце к любви обрати.
Иисусе, гряди в сретение души моея!
Кондак 11
Сам Господь во гласе трубнем снидет с Небесе, и мертвии о Христе воскреснут первее, потом же мы, оставшиеся, купно с ними восхищени будем на облацех в сретение Господне на воздусе, поя Ему: Аллилуия!
Икос 11
Приидет Сын Человеческий во славе Своей, сего ради во второе сретение паче снега просветимся, свещи Истинному Свету с мудрыми девами принесем:
Иисусе Милостиве.
Иисусе Правосудне.
Иисусе, в Царство Свое нас призвавый.
Иисусе причастниками сего соделай.
Иисусе, гряди в сретение души моея!
Кондак 12
Сам сый Законодавец закон совершает, пришед бо не разорити закон, но исполнити, да, суда ради боящеся, сохраним закон, да будем споспешницы Богу, любяще Его всем сердцем своим, да услышим во второе сретение Его: Приидите, благословеннии Отца Моего, приимите уготованное Царство от сложения мира. Того приемницы будем, славяще песнию: Аллилуия!
Икос 12
Светло Сретение Господне, духом играющее, провождаем. Свет от Света изыде, выше горлицы на Небо возлетим, на облацех противу Божию сретению изыдем, со Ангелы ликуем, с Девою Богородицею возрадуемся, с Иосифом принесем, с Симеоном на руку Христа приимем, со Анною пророчицею исповедуем:
Иисусе, смерть поправый.
Иисусе, клятву разоривый.
Иисусе, тварь всю украсивый.
Иисусе, мир обновивый.
Иисусе, гряди в сретение души моея!
Кондак 13
О Пресладкий и Всещедрый Спасителю наш, младенствуяй плотию Иисусе! Приими убогое моление сие наше, просвети нас сиянием Твоим, да во веки поем Тебе: Аллилуия!
(Этот кондак читается трижды, затем икос 1 и кондак 1)
Молитва
Господи Иисусе Христе, Единородный Сыне и Слове Божий, древле во пророцех виденный якоже зерцалом в гадании, в последняя же лета плотию от Пресвятыя Девы Марии нетленно рожденный и в четыредесятый день во святилище во сретение всему миру от Тоя, яко Младенец руконосим, явленный и во объятиях праведнаго Симеона во спасение всем сущим от Адама носимый! Коль преславно и пресветло Твое на руку Богоматери во храм Господень принесение и от святаго старца Божественное Сретение Твое! Сего ради прославляем неизреченное снизхождение и велие человеколюбие Твое, яко пришествием Твоим даровал еси ныне Небесную радость падшему древле роду человечу. Нам же всем, Божественное Твое Сретение воспоминающим, сподоби с мудрыми девами изыти на сретение Твое, Небесному Жениху нашему, с горящими светильниками веры, любви и чистоты, да узрим очами веры Божественное лице Твое, да восприимем Тя в душевныя объятия своя и да понесем Тя в сердцах своих во вся дни живота своего, да будеши нам в Бога и мы в людие Твои. В последний же и Страшный день пришествия Твоего, егда вси святии изыдут на последнее и великое сретение Твое на воздусе, сподоби и нам усрести Тя, да тако всегда с Тобою будем. Слава милосердию Твоему, слава Царствию Твоему, слава смотрению Твоему, Едине Человеколюбче! Яко Твое есть Царство, и сила, и слава, со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.
По благословению
митрополита Херсонского и Таврического Иоанна